1 Miika hiyyemaak manjichchi tullichiinke Efireemike boga'ni hedhaamman. 2 Isinna barra mitte amaa ifixxa hiyyee qici, «Mitti manjchchi mitte kumanna mitte dhibba sibiljo birre atenaa'n mooree wodda ookkone'e mooremmaka manjichcho baddaa'naa laqeennan: iikki birretik siblji anixxe anga'ni hedheen; ookkone birreti sibljonna ante aadheennani.»

Ookkoneechchi uduma ama isixxinna isoo'o, «Anike beltoo! Duuchchi Woddik Gootti atee'e eebisoo!» hite.

3 Beltkinna ookkone mitte kumanna mitte dhibba birreti sibljo aadheexxi ama isixxee uwwe; amatinna, «Sibljo birre anixxenni bonce giissendeexxa fakkuwwa baqinse giisineexxa misile giisedhatee anke beltixxe hiyye'e anga anixxenni Duuchchi Woddike Gootti'a gargar foyanon; ta'anna ati'aani hiise uwwanen» isoo hite. 4 Tennexxee belti birreti sibljo ama isixxee'e hiise; ama isixxinna isi hanii'ni lame dhibba birreti sibljinaa'n aaxxe'e birreti sibljo baqisaammake'e uutte; baqisanjikinna bonceexxe fakkenna baqinsee giisineexxe fakke asse. Iitti fakkuwwanna Miikake mine'ni ofolde.

5 Kunni Miika hiyyemeek manjichchi ifika magenoonfachchotixxa bakka afeemman; isinna heddo fakkuwwa mitte Efuudinna Teraafemi'i hujeexxi isixxe oose giddii'n mitti ookko qeese kade ergatemmaashsha asse. 6 Ookkone baro'ni Isira'eelike boga'n moyanji hedhemmabaan; mitti mitting manji ifi'aa eldeenxa yaane assaamman.✝

7 Eettene yanna'n Yihudake boga'ni, Beetelihemike qachcha'n hedhaammak mitti Leewwichchi dargaggeesi hedhemman; 8 kunni manjichchinna hedha'neka booncho halsatee'e ookkone Beetelihemi Yihudake qachchinaa'ni fule. Isi me'ande'ni hedhe'naa tullichiinke Efireemike boga'ni hedheeke Miikake minibaa dage.

9 Miikanna isoo'o, «Ati habaa'ni daggette?» Hiyye qore.

Isinna, «Ani Yihudake bogi giddo hexxeexxe Beetelihemi'n dageeneke Leewwichchon; ani hedhanno bonchonna harsedhaannen» hiyye.

10 Miikanna, «Yoonna amoo ani bira ofo'li, anke annanna qeesichcho anke kadi; aninna woggate'ni tomme sibiljo birrenna iittanni seemmanna ittaa uwwannon» hiyye. 11 Tennexxe iikki Leewwichchi Miikanni welti hedhatee'e mudhdhe iikki dargaggeessi qeesichchi Miika'aa isixxe oosse giddii'ni mittiinsha kade. 12 Ookkoneechchi uduma Miikanna Leewwichcho qeesette asse file; Miikanna isike mine'ni ofo'le. 13 Miikanna hiisexxi; «Kunni Leewwichchi qeesete ani'aa kadeexxe'e, Duuchchi Woddik Gootti duuchchiinxa yaane ani'aa qajeelchaaxxa ege'neenen» hiyye.