1 Eehuudi reyeechchi uduma Isira'eelk ardi higgeen Duuchchi Woddike Gootti edo elobaaxxa huje huje. 2 Tennexee Duuchchi Woddik Gootti Isira'eelito Hatsoorike qachcha'n hedhammake Kenaanike moyanjo Liyaabi'ni insa'nee sa'isse uwwe. Sannachchuwink sooressi ardiinke boga kaddeeke Haroosheetike qachcha'n hedhaammake Sisaaratemman. 3 Yaabin sallane dhibba gaaruwwa afedheeman: eetene Isira'eeli'i lame tomme wogga yo'oshsha rakkise: okkoneechchi uduma Isira'eelk ardi gargaaraashsha Duuchchi Woddike Goottibaa raarre.

4 Ookkone wodda Lafidootixxi are «Diboora» hiyyendaaxxi wabeekatemman: isenna ookkone wodda Isira'eelike ardixxe sooreettemman 5 Tinni wabeekitte koobatike Efireemike boga'n Raama'ninna Beeti'eelixxe oddo'n hedheeke Diboorake Timaarike haqichchi hunda ofolde murtaammaxxe'e Isira'eelk ardi murte alfatee'e isebaa mara'nemman. 6 Abini'aamika belto Baaraqi'i Nefitaalemika qoobbo kaddeexxe Qaadeesike qachchiba'a ye'isseexxi hitee qici: «Duuchchi Woddik Gootti Isira'eelik Mageni konne ajaja ati'a uwwe hiyyee qici ‹Nefitaalemi'inna Zabilonik min hadinaa'n tomme kuma manna fildettexxi Taaboorixxe koobabaa aaxxe mari. 7 Aninna Liyaabisek sannachchik ajajjallo Siisaara sarageeluwwa ifikeninna sannachchuwwik welti Qisoonike galaanibaa lolakee dagaashsha tirtirsanon; isoonna anga atixxe'ni sa'isse uwwanon.› »

8 Ookkoneechchi uduma Baaraqi ise'e, «Ati aninn welt me'itottole aninna me'anoni: duuka anxa me'a gophphottole kinni aninna marabo'non» hiyye.

9 Isenna hiissiteexxi, «Eloxxeni aninna atinninni welti me'annon; yaane kinni Duuchchi Woddik Gootti Siisaaraa'a meyyaxe'e sa'isse uwwammaxxee injifattottolenna ulfina alfitabexxon» hite. Tennexxe Diboora Baaraqiininni welti Qaadeesi'a duulde. 10 Baaraqinna Nefitaalemikanna Zabilonika mini hado Qaadeesi'a ye'ise: insa'neba'n tommi kumi manni duuka isixxa hordofe: Dibooranna welti duulde.

11 Ookkone wodda iikki Qenaanichchi Hebeeri, Muuseka ballo Abaabixxe oosenaa'ni wele Qeanaatona'n gargar hige Qaadeesi bira Tse'ineenimi hiyyemaake booncho'n hedheeke lumoke qilxi bira duunkaana ifika olteemman.

12 Abini'aamik belti Baaraqi Taaboorixxe koobaba me'eexxa Siisaara'n kulle 13 Siisaara sallane dhibba sarageeluwwanna isinni welti hedhemmaka sannachchuwwa duuchcha wele ardinke geego kademake Haroosheetii'n Qisoonike galaaniba'a bukki asse.

14 Ookkoneechchi uduma Diboora Baaraqi'i «Duuchchi Woddik Gootti Siisaara'a anga atixxe'n sa'isse uwwa'neexxi barra telchote kaddemmaxxe'e ke'i! Yoona Duuchchi Woddik Gootti atee akeekaan» hite: Baarqinna tomme kuma sannachchuwwa abixxe Taaboorixxe koobabaa'n dirre. 15 Duuchchi Woddik Gootti Siisaaranna sarageeluwwa duuchcha Baaraqi edo wolaantichchik injifatemeexxi udumi'a baqantaasha asse; Sisaaranna sarageelakenaa'n dirreexxi wonshe baqate. 16 Baaraqinna sarageeluwwakanna sannachchuwwa ardiink geego kadee'ek Ariisot Haroosheeti qico'n shorre: Siisaaraka sannachchuwwa duuchcha wolaantichchik shinne: mitti manji midde gateeban.

17 Hatsoorik moyanji Liyaabin Habeerike mini hadinni welti nage'ik hedhaamaxxe'e Siisaara baqate Qenaanichchi Hebeerxe arke Yaa'eelike duunkaanebaa e'ye. 18 Yaa'eelinna Siisaaraa'a qophphexxo'a fuldeexxi «Anke gootta amo duunkaane anxe'ni e'yi» hite: isinna e'yee wodda ise seemmat buqqe:

19 Siisaaranna «Amo ballo yo'oshsha dheebo'enen wede'e ha'wonna uwwi» hiyye. Isenna adotika qoonjo bande ha'waashsha uute; higgeeni iisite buqqe.

20 Ookkoneechchi uduma isi isee «Duunkaaniinxe hula edo uurri;» huuni manjinna dageexxi «Kaba manji hedhee?» Atee hiyyoole atinna «Hedhebaani» hiyye.

21 Yaane kinn Sisaara yo'oshsha gophpheemmaxxee cokkokki hiyye diiphee; ookkoneechchi uduma Hebeerixxi are Yaa'eeli duunkaaniinxa kaaso abideexxite laanchite isibaa shikki hite; isenna eettene kaasonni isixxe manshaka guuna urte buttinake'ni moxxi assitee'naa isinna reye.

22 Baaraqi Siisaaraa'a shorra'n daga wodda Yaa'eeli qophexxo'a duunkaani giddii'n fuldeexxi «Kabaa amo! Ati hassatteka manjo leellishannon» hite. Eettene yanna'n duuka isexxa e'yeeshshan duunkaaniinxi kaaso Sisaarake guuna'n gannendee'na'aa renshi diriireexxa uude.

23 Mageninna eettene barra'n Isira'eelika arda Kenaanike moyanjo Liyaabin'i anga insa'nexxe'n sa'isse uwwe.

24 Insa'nenna booso isixxa balleessinaa qico'n Isira'eelk ardi Liyaabini'ni itti jabaate.