1 Gorsa boro haachabbee'na Yiruba'aali hiyyemeek Gedewooninna hordofeeyye isixxi gorsa bariisa ke'neexxi Haaroodixxe muummeba qecence. Midiyaamitotixxi baxxe insa'neexxe baxxenaa'n middi darre'n Moorexxe kooba bira dhooqa giddo hexxemman.

2 Duuchchi Woddik Gootti Gedewoonii'i hiyyee qici: «Midiyaamitotixxe anga'n insa'neexxe'n sa'isse uwwabe'noshsha atinni welt hedheek manni heddoken; Isira'eeli ifixxi hunna isee anjirte'eeshsha hedati ifi dukkabaashsha, 3 ‹Ha'no giddii'n godoba gureek manji hedheexxe kaddoole Gele'adixxe koobanaa'n ille iima higowwaal› hitetexxi konne arda'n lalab» tenne buuton lame tommena lammi kumi manni hingee'na tommi kumi gate.✝

4 Konneechchi uduma Duuchchi Woddik Gootti Gedewoonii'i hiyyee qici: «Ta'ana heddo sannachcha affeetten; insa'ne'e gaalaniinbaa aaxxe sa'i; ookko ani insa'nee hega uudannon; atixxa duuka me'annon hiyyaak manji hedheexxe kaddole me'uun; marabe'non hiyyaak hedhoole kinni higuun.» 5 Gedewooninna arda galaaninba'a adhdhe me'e; Duuchchi Woddik Goottinna isoo «Gulufate wode'e wonshiinsha arraaphpha'n ha'waaka duuchcha ayyumma uude insa'nee foyi!» hiyye. 6 Angat wode'e oobesa'n ha'waake manniki laakkoossi sase dhibba geye: gateek manni duuchchi kinni guluffate ha'weemman. 7 Duuchchi Woddik Gootti Gedewoonii'i «Angat wode'e oobesa'n ha'weeke konne sase dhibba mannixxe buuton ha'noo anjirannon: Midiyaamika manna loldine injifattinaashsha midditte ha'no'a uwwannon; gateek kinn dage dagemanbaa higaashsha kuli» hiyye. 8 Tennexxee Gedewoon ardiinxa itanna suusu'luwwa adhemak sase dhibba manna malee wele Isira'eelika manni duuchchi ifi ifike duunkaanibaa hingaashsha asse; tinni duuchcha kadda wodda Midiyaamitotixxi kaambe insa'ne aadi darre wolo'oti giddo hexxemman.

9 Eettene gorsa Duuchchi Woddik Gootti Gedewonii'i hiyyee qici «Insa'nee lolde injiffattattoshsha anga atixxe'n sa'isse uwwannon marte loli. 10 Ati eettene kaambe lolatee sodaattottole kinni Puura hiyyemaake atike erganjinni welti adadde'a dirri; 11 insa'ne hinaaxxanna laqqi; ookkoneechchi muduma insa'ne'n lola ke'issate'e hunna alfitatton;» Tennexxee Gedewooni ifika erganjo Puuranni welti naaphi hedheebaa adaadde marre. 12 Laakkossi insa'nek koro'miisiinke haaganiinsha hexxeemmaxxi Midiyaamito, Amaaleeqitonna miidik manni dhooqa giddo bukki hiyyeemman; insa'neke gaaluwwik laakkossinna laakko'emmammabaake abbaayyatike maanchishatemman.

13 Gedewoon ookko geyeeshshann mitti manjichch oojjoteexxa oojjo ifike jaaloke'n haaso'a'na laqe: iitti oojjotinna «Mitte so'iinxi kebbo iimi'n goggo'mita'n dagge'e Midiyaamike mannixxe kaanbe'n hedheeke duunkaani hana ibbeexxi ookkonee duunkaana kandaa wodda ganetixxe hunnaxxe birasa'nenaa'n kexeexxa iikki dunkaani fottoqe digemee'naa uudenne.»

14 Iikki jaali isikinna, «Tinni Isira'eelichcho Iyyo'aasika belto Gedewoonike wolaantichcha malee'e wele yaanebaan; Kunse Mageni Gedewoonixxe anga'n Midiyaamika mannanna sannachcha isika duuchcha sa'isse uwwe'en» hiyye hiise haaso'e.

15 Gedewooni eettene oojjonna tika isexxa laqeexxi guluffate Mageno sagade; ookonechchi uduma Isira'eelike ardiba higeexxi insa'nee «Duuchchi Woddik Gootti Midiyaamika mannanna sannachcha insa'neeka anga ha'nooxxe'n sa'isse uwwammaxxe ke'we!» hiyye. 16 Sase dhibba manna saseba foyeexxi mitti mittinge manjo'n suusu'lenna giddo xassa afeexxa mitte odolcho uwwe. 17 Gedewooninna insa'nee hiyyee qici «Ani kaanbe eetteneba mare geyeenexxi assaannexxa ha'no hubattine uuddineexxi iseenni asse. 18 Aninna aninni welt hedheek duuchchi malagatuwa ufuunfanno wodda ha'nonna baxxe ha'nooxxe'n malagata ufuuffina'n ‹Duuchchi Woddike Gootti'anna Gedewooni'a!› hitine raarre.»

19 Heqanjuwwi jijjiiremee'naa hashsha wodhakiinxi heqqa saffemma wodda Gedewooninna isin welti hedheemmak dhibbi manni eettene kaambe qarqar genne; insa'nenna ifi ifika malagatakanna ufuunfe; anga angate'n anfeemmaxxa odowwanna shinne. 20 Weleba hexxemmaxxi lame gamo tenneen assite; duuchchiingi ookkone xassuwwa bita'ixxe anga'n, suusu'letanna middixxe anga'n abixineexxi «Duuchchi Woddik Gootti'anna Gedewooni'a lollaannen!» hina'n raarre. 21 Mitti mittingi manji eettene kaambe qarqara'n isi'a dhaabemmaxxe bakka'n uurre wodda duuchchiing Midiyaamik sannachchi raara'n baaje. 22 Sasi dhibbi Gedewoonik manni suusu'le ufunfaa wodda Duuchchi Woddik Gootti mitti mittingi naaphiink sannachchuwi ifi ifike jaalo'ni wolaantichchik ke'ashsha asse; iikki sannachchi kinna udumi'a Tsiireera'a wirri hiyye higeexxi Beetishiixxa, ookko'ni sa'eexxi Xabaati bira hedheeke Abeeli Mehoolaxxe gabala qico'n ke'ne baanje.

23 Konneechchi uduma Nefitaalemik, Aseerikenna Minaasek mini hado duuchcha ye'nee'naa insa'nena fulleexxi Midiyaamika manna shorrine 24 Gedewooninna koobatike Eefireemike boga'n hedheeke manna duuchcha'n «Fuldineexxi Midiyaamika manna lolle; Midiyaamik manni foofe angii'n fulche'nabaashsha Yordaanoosika galaananna wele yaasu wode'e Beetibaara qico'n hedheeka heqqe» hiyye. Tennexxee Efireemiki mann duuchcha ye'ne; Yordanosika galaanana ookko'a yaa'a'neka wele wode'e Beetebara qico'n abinde. 25 Hereebinna Zeebi hiyyemaak lame Midiyaamike mannik akeekisanjuwwa boojiine; Hereebii'i Hereebixxe rassa qarqara iittanni Ze'ebininiinna Ze'ebike woyine miicatixxe bakka hanna insa'nee shinne. Ookkoneechchi uduma gateeka Midiyaamika manna shorrine; Oreebikanna Ze'ebenika gooba kunteexxi Gedewooni hedheeba'a Yordaanoosi'a aa'ne dange.