1 Barra mitte Somisooni Gaaza'a me'e. Isinna ookko mitte yabaabulto manjichcho uudeexxi isenni welti galo'a iseke minibaa e'ye. 2 Gaazak manninna «Somisooni kaba hedheen!» hitaa odo insa'ne gelte; tennexxee mannikinna ookoone booncho buqeexxi hashsha duuchcha qachchiinke dalla'ixxe hulabaa rinphe isoo heqqine; «Bariisanni isoo shinnannon» hina'n bogi soodaa qico'ni rinpheenba galle. 3 Yaane kinni Somisooni manjichchoti welti diiphemak hashshixxe jaane saate qico'n callamman; isinna ke'eexxi qachchiinke dalla'ixxa hula, lamiinga utuphanna danqarisanjo fottose. Ookkoneechchi uduma isi konneechuwwa dugummoti uggudheexxi Kebirooni edo hexxeexxe tullichuwwiinxe xungo qico'ni dulke qabate.

4 Ookkoneechchi uduma Saamisoon Sooreeqixxe dhooqa'ni hexxa'neexxa Deliila hinaaxxa manjichcho eeyye. 5 Filisixeemik galchalluwwi isebaa mareexxi, «Maxxisse'e iso'ni hexxeexxi jabaxxi hunna tinni maachcho kaddeexxa, no'onna iso'o usurree anga no'oxxe'ni hitta ibirsa dandeennanoxxa ati no'aa isoo qori. Tenne assitottole no'o mitti mittiingi mitte kumanna mitte dhibba sibiljo birre uunannon.»

6 Tennexxe Deliila Somisoonii'i, «Konne qico atee'e Jabake assa'negeechchi maachcho kadeenxa ane'ni haaso'i ballo; mitti manji atee usure'e hunna affabexxoshsha hite gophisaa qici hedhee?» hite.

7 Somisooninna ise'ni, «Shamoke torbaane teephuwwinni fedheeki manji anee usurreele hunna afabo'no.»

8 Ookkoneechchi uduma Filisixeemik galchaluwwa shamoka torbaane teephuwwa Daliila'a aa'ne dange: isenna konneechchinn Saamisoon'i usurte. 9 Mannikinna goli giddo sho'omeeman; isenna, «Koo, Somisooni! Filisixeemito kunni ate'n daggeen» hite. Yaane kinn Somisooni suqendeexxa shalo giira tuqqoole husuphphi hitammashsha ookkonee teephuwwa sholla qicinni husuphphi asse. Tennexxee isixxe hunna mayenaa'nite kaddeexxa ege'nendebaan.

10 Ookkoneechchi uduma Deliilanna Somisoonii'i, «Yoonna ati anee gowwiseeten; dhugaa fulchite ane'ni haasootebexxon; ballo maganne ta'anna atee hitta usura dande'anoxxa ane'ni kuli!» hite.

11 Isinna Daliila'a, «Dullootebaaxxe haaroxxe wodaronni ane'e usurreele wele manjishshann hunna afannabaan» hiyye.

12 Deliilanna haarooxxa wodaro aaxxe Somisoonii'i usurte; manni goli giddo sho'omeemman; isenna, «Koo Saamisooni Filisixeemito kunni ate'n daggeen» hite. Yaane kinn isi usureemmaxxa wodaro agooda ifikenaa'ni fuufa sunqeekishsha usurra tanshe.

13 Higgeeni Deliila Somisoonii'i, «Ta'i qico'ni anee'e gowwiseeten; dhugaa fulchite ane'ni haasoteeboxxen; ballo maganne hitta atee'e usurra dandeessisaaxxa ane'ni kule» hite.

Isinna hiisexxi, «Anka konne torbaane umiinka shuroota umiinke ordichchinni welti gudunfite'e isoo tutunjoke'ni sagartetele; ani wele manjishshanni shaqqake kadanon» isee hiyye.

14 Ookkoneechchi uduma Daliilanna isi diipheexxa affeexxi ookkone torbaane isike umika shuroota umiinxe ordichchinni welti gudunfite tutunjoke'ni sagartetteexxi «Koo, Somisooni! Filisixeemito kunni ate'n daggeen!» Hite. Isinna mugokenaa'ni dammaqe, tutunjo umiinke haadinninni fooqqi asse ke'ise.

15 Ookkoneechchi uduma isenna, «Godobi atik aninni welti hedhebaang hitta ‹Ate'e eeyyanen› hitattoo? Ati anee'e sobbaa'naanna ta'i qico'ni tenne hunna duuchcha habaa'ni aaxxetexxa ane'ni haasoteboxxon» hite. 16 Isenna barra barrande'ni isoo nunnusita'ni reyo yoraa qico'ni wixixxi assite. 17 Tennexxe isi duuchchiinxa yaane ise'ni hiyye kulee qici, «Ilemeennexxinninni Magenokee gargar foyemeeneke kadeennaxxe'e umo ankikka ordichcho haado tuqqebaan. Yaane kinn umo anika haadoti haandele hunna anenaa'ni me'itaani; aninna shaqqe wele manjishshanni kadanon hiyye'e godobixxa ise'ni haaso'e.»

18 Deliilanna isi duuchchiinxa yaane farri asse haaso'eexxa affeexxi, Filisixxeemmike galchaluwwi'a «Isi duuchchiinxa yaane farri asse ane'ni haaso'eemmaxxe'e higgine dagge» hiteexxi Filsixeemike galchaluwwibaa erga ergite. Insa'nenna sibiljo birre aa'ne dange. 19 Deliila, Saamisoonii'i isenge gudeedda'ni diiphisse'e mugaashsha assiteechchi uduma mitte manjo yexxeexxi ookkone torbaane isike umika shuroota insa'ne haadisse. Isenna Saamisooni'i wixixxi assate'ni kexxe; hunnatinna isonaa'ni adhdhende. 20 Ookkoneechchi uduma isenna, «Koo, Somisooni! Filisixeemito kunni ate'n daggeen!» Hite. Isinna diiphokenaa'ni dammaqeexxi, «Edi woddishshanni hasaphi asse me'ano» hiyye hede. Yaane kinni Duuchchi Woddik Gootti isinaa'ni gargar higeexxa afeemmabaan. 21 Ookkoneechchi uduma Filisixeemito Saamisoon'i abideexxi ille isixxa balleesine Gaaza'a aa'ne dirrine. Insa'nenna isoonna sageettotike haachchabinni usurreexxi ookko'o usuremmeeba midha dayaashsha assine: 22 Yaane kinni umo haadeemmeechchi haaroba umi isiki late.

23 Filisixeemik galchaluwwanna, «No'oki magen naapha no'oka Somisoonii'i anga no'oxxe'ni sa'isse uwween» hina'ni mageno insa'neeke Daagoni'a lumoka tolcha shiqishatee'e bukki hine.

24 Ardikinna Saamisonii'i uude wodda, mageno insa'neka Daagooni'i galateefatati, «Boga no'oo tutunseeka heddo no'oka manjo shiyeeka, no'oka naapha, no'oki magen anga no'oxxe'ni sa'isse uwween» hine.

25 Qalbe insa'nexxi yo'oshsha gammaddee wodda, «No'o geebiso'a Somisooni'i ye'we» hine. Insa'nenna Saamisoonii'i usuriinke minenaa'ni ye'ne, isinna insa'ne edo sirbe; isoonna ookkone utuphuwwiinxe odo'ni uurrinse. 26 Somisooninna anga ifixxa abide akeekammaka belto, «Mine kiphe abideemmake utuphuwwa'ni irkattonna'a anee'e shikki assi» hiyye. 27 Ookkone mini giddo labballinna dubarte wo'miteemman; Filisixeemik galchalluwwi duuchchinna ookko'o hedheman; ookkone minixxe xelpho'ni Somisooni sirbaa'na uudamak sase kuma geyaak labbalinna dubarte hexxeman. 28 Ookkoneechchi uduma Somisooninna «Lamiinxe ille anxee'e Filisixeemika manna ta'a halo fulonnaa'a, Ee, dada duuchchike Duuchchi Woddike Goottaa, ballo anee'e hedi, Ee, Magenoo tennee'e mittele calla ballo anee jabeessi» Hiyye Duuchchi Woddika Gootta soodate. 29 Ookkoneechchi uduma Somisooni mine kiphe abideemmaka lamiinga utuphuwwa abixxe; mitte middixxe anganni mitte bita'ixxe anganni jabeesse abixxeexxi, 30 «Filsixeemike manninni welti reyannon» hiyyati afeexxe hunnanni utuphaa dhiibe wodda, iikki mininna Filisixxeemmike galcha; uwwa'ninna ookko'o hedheeke duuchcha'ni ibe. Somisooni lubbo hedhemma wodda shiyeeke manni caala reyee wodda shiyeeke mannik bira sa'e.

31 Isixxi dayyuwwanna gateek isik mini hadi rensha aadhdhatee ookko'aa dirrine; insa'nenna idangeexxi isike annik Maanuhek hirreesi hedheeba Tsoori'axxenna Eshita'oolixxe oddo'ni isoo moonge. Saamisooni Isira'eeli'ni lame tomme wogga akeekisanjo kade.