1 «Boga dhaalatee summi borreessemeke gosatik minuwwi konnechchinn butti'a hedheeken: middi darre'n Daanik gosatik mini mitte qoobo afa; kunninna Hetiloonika ora abixxe Hamaatixxe hula qico gaya. Hetseer'eenaaninna Hamaati'n itti aande hexxeexxi middixxi Demasiqoxxi gabala borotenaa'n dhidhimi qico'n hexxeexxe Danixxe gabalaxxe mitte kuta kaddaan.

2 «Aseerik gosati mini mitte qoobbo alfa; kunninna borotenaa'n dhidhimiin qico'n hedheek Daanik bogi isoo gabalaan.

3 «Nefitaalemik gosatik mini mitte qoobbo alfa; kunninnaa Aseerika boga borotenaa'n dhidhimi qico'n gabalaan.

4 «Minaasek gosatik mini mitte qoobbo alfa; kunninna Nefitaalemika boga borotenaa'n dhidhimi qico'n gabalaan.

5 «Efireemik gosatik mini mitte qoobbo alfa; kunninna Minaaseka boga borotenaa'n dhidhimi qico'n gabalaan.

6 «Roobelik gosatik mini mitte qoobbo alfa; kunninna Efireemika boga borotenaa'n dhidhimi qico'n gabalaan.

7 «Yihudak gosatik mini mitte qoobbo alfa; kunninna Roobelika boga borotenaa'n dhidhimi qico'n gabalaan.

8 «Yihuda'a borotenaa'n dhidhimiqico'n gabalaaka boga gargar hexxeexxe uwwa'a shiqaake qoobbo kadaan; godobikinna lame tommenna onde kuma ciqile kada; borotenaa'n dhidhimi qico'n hedheek isik qeerrinni mitte gosatike minuwwike mitte qoobbixxe qixxe kadee'na'a galmi oddo isixxe'n hedhaan.

9 «Kunni Duuchchi Woddike Gootti'a gargar hexxeexxe uwwa'a shiqishina'neek bogi qeerne lame tommenna onde kuma ciqile, godoba tomme kuma ciqile kada. 10 Qeesoletinna tenne woyyondeexxe bakkanaa'n qoobbo alfa; kuninna middi darrenaa'n qeerrinne lame tommenna onde kuma ciqile; dhidhimi darrenaa'n godoba tomme kumma ciqile, boroti darrenaa'n godoba tomme kuma ciqile kadeexxi, bita'i darreenaa'n qeerrinne lame tommenna onde kuma ciqile kada; Duuchchi Woddike Goottik galmi isixxe oddo'n hedhaan. 11 Tinni bakka Isira'eelito deetee wodda deetemmaxxe Leewwitoshsha deetebaang gatteexxe, addatemati ani'a ergatendeexxe woyyitte qeesole Sadoqittotixxe bakka kadda. 12 Tinni bakka bogiinxe woyyitte bakkanaa'n insa'ne'a gargar hexxeexxe uwwa kadda; kunninna hara woyyichcha booncho kadeexxi gabala Leewwitotike boga kaddaan.

13 «Qeesoletike bogike cinaacha'n Leewwito qeerrinne lame tommenna onde kuma ciqile, godoba tomme kuma ciqele boga alffa; konne bogik duuching qeerrinni lame tommenna onde kuma ciqile godoba tomme kuma ciqile kadaan. 14 Konne boganaan'n insa'ne gurgura yookaan jijjiira hassisaba'a; kunni boga duuchanaa'n Duuchchi Woddike Gotti'a foyyemeexxi woyyichchake kademmaxxee wele manna'n sa'aba'a.

15 «Godoba onde kuma ciqilek, qeerrinne lame tommenna onde kuma ciqile afeek gateek bogi qachchinxe gollotixxe la'o'a, minuwwinke ijaarsi'anna hore bobarsatee kadeexxi qachchinxe oddo'n hedha. 16 Konne qachchixxi mike middi darree'n shoole kumanna onde dhibba ciqile, bita'i darree'n shoole kumanna onde dhibba ciqile, boroti darree'n shoole kumanna onde dhibba ciqile, iittanni dhidhimi darree'ninna shoole kumanna onde dhibba ciqilen. 17 Qachchikinna horiinxe boba'aka booncho afa, middi darree'n lame dhibbanna onde tomme ciqile, bita'i darree'n lame dhibbanna onde tomme ciqile, borot darree'n lame dhibbanna onde tomme ciqile, dhidhimi darree'n lame dhibbanna onde tomme ciqile kada. 18 Konnenaa'n gateek woyyiitte kuta'n gabalema'n iseke cinaacha'n hedheek boonchi, borot darree'n tomme kuma ciqile, dhidhimi darree'n tomme kuma ciqile kada; isixxi midhanna konne qachchike hujjaluwi'a itatee kadda. 19 Boga wiilsaak hujalluwwi duuchinge Isira'eelike gosatike minenaa'n daga. 20 Bogink shooling kasi weli qixxete kadaa wodda, mitti mittin kasi lame tommenna onde kuma ciqilen; qachchinxe kuttanninni mitteba gargar hexxeexxe uwwa'a woyyichcha booncho gargar hiissitinaan.

21 «Woyyichcha booncho'ninna qachchinxe kuttake middi bita'a'n gateek bogi galchallinke kada; kunninna lame tommenna onde kuma ciqile kade'eke woyyichcha boonchinaa'n boroti darrexxe gabala qico'n mare geyaleni; dhidhimi darre'ninna iittanni lame tommenna onde kuma ciqile kadeeke boonchinaa'n dhidhimiinxe gabala qico'n mare geya; gosatike mini minike qoobbo kade'eeke bogike cinaachcha abixxe me'aak boonchi duuchchi galchalliinke kada; woyyichchi boonchinna galmi isixxe oddo'n hedhaan. 22 Tennexxee Leewwitotixxi karranna qachchinke mannixxi karra galchallokee uwwemeeke bogixxe oddo'n kaddaan; galchallink boginna Yihudaxxenna Biniyaamixxe gabalaxxe oddo'n kaddaan.

23 «Wele gateeke gosa gosake mini mini hadik qoobbi konneechchinni butti'a hedheeshshaten: Biniyaamik gosatike mini mitte qoobbo alfa; kuninna borotenaa'n dhidhimii qico'n mare geya.

24 «Simoonik gosatik mini mitte qoobbo alfa; kunninna borotinaa'n dhidhimi qico'n Biniyaamika boga gabalaan.

25 «Yisakoorik gosatik mini mitte qoobbo alfa; kuninna borotenaa'n dhidhimi qico'n Simoonika boga gabalaan.

26 «Zaabilonk gosatik mini mitte qoobbo alfa; kunninna borotenaa'n dhidhimi qico'ni Yisakoorika boga gabalaan.

27 «Gaadik gosatike mini mitte qoobbo alfa; kunninna borotenaa'n dhidhimii qico'n Zaabilonka boga gabalaan.

28 «Gaadixxi bita'i darrexxi gabala bita'a Taamarkenaa'n kexxeexxi Meribaa Qaadeesi wodu'uwwin qico'n gelta; okkoninna Gibtsexxa bogoxxa oyyoxxa duuka me'ite Lumoxxa Abbayya qico'n marte geltaan.

29 «Kunni qici Isira'eelike gosatike mini mini'a qadaadake kado'a boga qoodinaa qicon; mitti mittingik qoobbinna konnenden» hiyya'nee'n Lumok Duuchchi Woddik Gootti.

30 «Qachchinxi fulatixxi huluwwa konnechchinni butti'a hexxeeshshaten: middi darree'n shoole kumanna onde dhibba ciqile qeerrinne afeexxi hula, 31 Qachchinxa hulluwwa Isira'eelike gosatike mini minike summinni ye'endaaxxe kaddaan; middi darree'n hexxeexxi sase huluwwa Roobelike gosatike minixxi hula, Yihudake gosatike minixxe hulanna Leewwike gosatike minixxe hula kaddaan.

32 «Boroti darree'n shoole kumanna onde dhibba ciqile qeerrinne afe'exxi sase huluwwa hexxaan; tinnirinna Yooseefike gosatike minixxi hula, Biniyaamike gosatike minixxi hulanna Daanike gosatike minixxe hula kaddaan.

33 «Bita'i darree'n shoole kumanna onde dhibba ciqile qeerrinne afe'exxe sase hulluwwa hexxe; tinniriinna Simoonike gosatike minixxi hula, Yisakoorike gosatike minixxe hulanna Zaabilonike gosatike minixxe hula kaddaan.

34 «Dhidhimi darre'n shoole kumanna onde dhibba ciqile qeerrinne afe'eexxi sase hula hexxeen; tinniirinna Gaadike gosatike minixxi hula, Aseerike gosatike minixxe hulanna Nefitaalemike gosatike minixxe hula kaddaan.✝

35 «Konne qachchixxe dowwek duuching qeerrinni tommenna saddeeta kuma ciqile kadaan.

«Eettene yannanaa'n qachchiink summi: Duuchchi Woddik Gootti ookko'o hedhe hiyyemaan.»