1 Duuchchi Woddike Goottik hiyychchi ane'n dageexxi:✝ 2 «Koo manjiinke belto alba Amoonitotibaa wirri hitettexxi raaga insa'nexxe'e raagi. 3 Insa'ne'n hite haasotatto qici, ‹Lumoke Duuchchi Woddike Goottika hiyyichcho laqqe. Lumok Duuchchi Woddike Gootti hiyya'nee qici: Galmi anki battoo'emma wodda, Isira'eelik bogi urmake kadeemma wodda, Yihudiink ardi booji'emeemma wodda: «Hashshu» hitinemmaxxee, 4 tennexxee borotike ardi'a hirendino'a anga insa'nexxe'n ha'no'o sa'isse uuwwannen. Insa'nenna ha'nooxxe oddo'ni kaambuwwa giisse'neexxi dunkaana ookko oltinaan; ha'no wilissitineechcho duuchcha indaan ha'noxxa adonna ha'winaan. 5 Ani Rabaaka qachcha gaaluwwinke bobba'i, Amoonika boganna gedhebi ciisake assannon; ookkone wodda ani Duuchchi Woddike Gootta kadennexxa egendinaan. 6 Tennexxee Dada Duuchchik Duuchchi Woddiki Gootti hiyya'ne qici: Godoba afinemmake fuggoke yaadinaa'n kexxeexxa, Isira'eelike boga'n ba'ne geltee wodda gammadat anga caldinnemmaxxeenna utaldina'n qeexaldinemmaxxe'e, 7 tennexxe'e irre anxa ha'no'n ke'issennexxi gosa gosak ardinna ha'noo assamaashsha assannon; arduwwiinxe oddona'inna ha'no'o qurbi assannon; boguwwakenaa'ninna ha'no'o balleessannon. Ookkone wodda ani Duuchchi Woddike Gootta kadennexxa egendinaan.› »

8 «Lumok Duuchchi Woddik Gootti hiyya'nee qici: ‹Mo'aabinna Seyiiri «Kunnise Yihudak ardi wele gosa gosake ardi duuchchishshande kadde'een» hine'een.✝ 9 Tennexxe'e Ba'aalme'oonike bogixxe gabala'n isi'a gaachchannake kade'eeka qachchuwwa, Beetiyeshimootii'n, Be'aalimewo'niininna Qiryaatayimii'n safennexxi Mo'aabixxa kollo banqara assannon. 10 Mo'abikanna Amoonka manna mittenba borotike ardi'a hiremo'a insa'nexxe anga'n sa'isse uwwannon. Amoonik ardinna gosa gosake ardixxe oddo'n qaabatemaba'a; 11 aninna Mo'aabi'i xixannon; eettene yanna ani Duuchchi Woddike Gootta kadennexxa egennaan› » hiyye.

12 «Duuchchi Woddik Gootti hiyya'nee qici: ‹Eedoomik ardi Yihudake arda'n halo fuliyyot, yo'oshsha balleessanjoke kademmaxxee, 13 tennexxee Duuchchi Woddik Gootti hiyya'nee qici: Hirre anxinni Eedoomi'n ke'annon; isika hore manjo shiyennexxi boga urmake assannon. Temaanike qachchinaa'n Dedaanke qachchi qico'n ardi wolaantichchik mudaan. 14 Arda anke Isira'eel gamii'n Eedoomi'n halo fulannon; Insa'nenna anxe mufexxe qixxe'ninna anxe aarexxe qixxe'n Edoomike arda'n halo fullaan; Edoomik manninna anxa halo fula ege'naan hiyya'neen Lumok Duuchchi Woddik Gootti› » hiyye.

15 «Lumok Duuchchi Woddik Gootti hiyya'nee qici: ‹Filisixeemik ardi godoba abixxemmaxxe fuggoxxenni ke'eexxi halo fulemmaxxeenna hosse galdeexxe naaphuntenni Yihudaka ardanna biro'a yoremmaxxee,✝ 16 tennexxee Dada Duuchchik Duuchchi Woddik Goottinna kunnise hirre anxa Filisixeemitote'n ke'issonnaten; Kelitotanna birannon; abbaayyatike kasike boga'n gatemmakaaranna kutti assannon. 17 Jaba qico insa'ne'n halo fulannon; anxe balanninna insa'nee xixanno wodda, ookkone wodda ani Duuchchi Woddike Gootta kadennexxa egennaan.› »