1 Duuchchi Woddik Gootti ane'ni hiyyee qici: 2 «Koo manjiinke belto! Atike ardi'a hitatto qici: ‹Ani bogake'n bagedo iyyedaganno wodda, bogiink ardinna insa'ne giddi'n mitte manjo fi'line ifike heqqanjo asse'noole, 3 heqqanjikinna bagedi dageexxa uudeexxi arda xexxe'achchiisatee'e malagata ufuufoole, 4 ookkoneechchi uduma huuni manji malagatinka hafuura laqeexxi ifi xexxe'ata gophoole, bagedi dageexxi isoo shiyoole, munde isixxee isonde qoreman. 5 Malagatiinka hafuura laqeexxi ifi haqqedha gopheemmaxxee shiyemiyyotee geessiseeki ifinge dedhan. Ifi heqqedheele kinni ifixxa hedho gatirsamman. 6 Yaane kinni heqqammak bagedi dageexxa uudeexxi, arda xexxe'achchisate'e malagata ufuufebaang gatee'na insa'nexxe oddonaa'ni naaphi dage mitte manjo bagedi shiyoole iikki manjichchi reyeek isixxe cubbonniten. Ani kinni ookkone manjichchixxa munde heqqanjo laqannon.›

7 «Koo manjiinke belto atee Isira'eelike ardike heqqanjo assennen: tennexxee hiyyaannexxa laqi; anxa xexxe'achchiisa insa'ne'n haaso'i. 8 Cubbaaleessa manjo, ‹Koo ati cubbaaleessa manjo dhugaadinni rertaton› hiyyanno wodda isinna fuggoke oranaa'ni higaashsha assa gophphotole, iikki fuggichchi manji cubbo ifinxeninni reyaan; ati kinni munde isixxee laqendatton. 9 Yaane kinni fuggichcha manjo fuggoke oranaa'n higaashsha xexxe'achchiisee'naa'a higa gophoole, isi ifinxe cubboxxee reyaan; ati kinni ifixxa hedho gatirsitatton.

10 «Koo manjiinke belto, Isira'eelika arda hitatto qici, ‹Ha'noonna hitina'nee qici: «Balleessa no'oxxinna cubbo no'oxxi ha'urte'een, tennenaa'n kexxexxa yayate'ni he'nennen; habata ganta'enne?» › 11 Insa'ne'e hitatto qici, ‹Ani hedhannoke kadeennaxxee; fuggoke ora ifikenaa'n hingeexxi hedhoti he'naashshate male'e cubbaaleeyyetixxi reyo anee gammachchiisabaan. Hiyya'neen Lumooki Duuchchi Woddiki Gootti. Higgee! Fuggoke ha'nooke oranaa'n higge! Koo Isira'eelike arda; maa rertinata?›

12 «Higgeen koo manjiinke belto; atike boga'n hedheeke arda'n hitatto qici, ‹Qullichchi manji anka seera sa'oole edi woddixxi eloxxi huje isoo anjirtabaan; cubbaaleessi manji cubbo ifixenaa'n higo'oole edixxe fuggoxxe huje isixenaa'n kexxeexxa ba'abaan. Qullichchi manji cubbo hujoole edi wodda huje'exxi qullumma reyotenaa'n isoo gatissabaan.› 13 Qullichcha manjo dhugaadinni lubbot hexxatton hiyye'naa isinna ifixxa qullumma addateexxi cubbo hujoole; hujemmaxxi qullumma mittetinna isi'a hedendabaan; isixxe cubboxxe buutonni reyaan. 14 Iittanni fuggoka manjo, ‹Dhugaandinni rertatton,› hiyye'naa isinna hujammaxxa cubbo waale'e eloxxanna qajeela yaane hujoole, 15 liqeesemmake liqi'a abixxemmaka miya hiisoole, mooremmalchonna hiisoole; hedho uwwaaka ajajuwwa hordofoole; fuggoxxa yaanenna assa gophoole; dhugandinni isi hedhondinni hedhaan; reyabaan. 16 Hujemmaxxe cubbonaa'n mittetinna laakko'endabaan; eloxanna qajeelto yaane asse'een, dhugaandinni hedhondinni hedhaan.

17 «Atike bogik manni, ‹Lumoke Duuchchi Woddike Goottik ori qajeelakebaan› hiyatte'n hedheen. Qajeelake kada gopheek kinni insa'neke oran. 18 Qullichchi manji qullumma hujammaxxa waaleexxi fuggoxxa hujoole hujemmaxxe cubboxee reyaan. 19 Fuggichchi manji fuggoxxa huja waleexxi eloxxanna dhugaatixxa yaane assoole tenne eloxxa assemmaxxee hedhoti hedhaan. 20 Kaddo malee'e koo Isira'eelike ardaa, ‹Lumoke Duuchhi Woddike Goottik ori qajeelakebaan› hiyyate'n hexxineen. Yaane kinni mitte mitte hannoge'n huje huje ha'nooxxishanni ani murte murannon.»

21 Booji'emmennexxe tommenna langaxxe wogga'n tommike agenjo'n ondixxe barra'n Iyyerusaalemii'n baaje dageek mitti manji anibaa dageexxi ane'n, «Qachchi naaphiinxe anga'n ibe!» hiyyeen.✝ 22 Manjichchi soodishsha dagaa'naa eettene hashsha Duuchchi Woddike Goottixxi hunna ane'n hexxemman; soodimaro manjichchi aniba dagebaa edi darre Duuchchi Woddik Gootti afo'o anka bane; afo'i ankinna baneme; ookkoneechchi uduma sammi hiyyebo'nonn.

23 Ookko'ninna Duuchchi Woddike Goottik hiyyichchi aniba dageexxi: 24 «Koo manjiinke belto Isira'eelike boga'n oletixxe tuulo giddo hedha'nek ardi, ‹Abirihaami qofitti hedhemman ikki mitti ookkone boga dhaale; no'o kinni heddoken; dhugaadinni iikki bogi geego no'oke asseme uuneme'en› hinaa'neen. 25 Tennexxee insa'nee hitato qici, ‹Lumok Duuchchi Woddik Goottinna Munde giddo hexxeeka maala ittina'neen; ille ha'nooxxanna magenoonfatinammaxxe fakkuwwaba'a hisitine'een; manjokanna anga saxxina'neen; konne qicinni ookkone boga dhaaldino'a heddina'neeta? 26 Wolaantichcha ha'nooka addatine hollitina'neen; battitte yaanuwwa hujina'neen; mitti mitti ha'noogi ha'nooke jaaluwwixxa are battoonsitina'neen; eegata konne qicinni ookkonee boga dhaaldinaata?›

27 «Insa'neenna hitatto qici: ‹Lumok Duuchchi Woddik Gootti hiyya'nee qici: ani hedhaaneke kadeennaxxee ifi'n kakataannen; oletixxe tuulo giddo gateekiir wolaantichchake'n reyaan; qachchi gadho hadi giddo hedheekaara biniinchi ninnife itaashsha assannon; kollote'ninna wolo'oti giddo hedheekiir dhukkubik mudaan. 28 Bogakanna urmakenna duwwike assannon; Isira'eelito ifi saadammaxxa hunna isexanna gophphaashsha assannon; Isira'eelixxi koobuwwanna ondee'naa ayyinna ookko'n sa'aak hedhabaan. 29 Hunjemmaxxe diqachchisaaxxe yaanenaa'n kexxeexxa bogakanna urmake assanno wodda ani Duuchchi Woddike Gootta kadennexxa tenne'n egennaan.›

30 «Koo manjiinke belto atike bogik ardi ifi ifike minixxe hula'ninna ora ora'n afemeeba atixee'e insa'ne hina'ni weli'anni weli haasona'nee qici, ‹Amme Duuchchi Woddik Gootti no'o'a hiyya'neeka hiyyichcho lanqo.› 31 Guremee ardi atibaa'a dagaan: hiyyichcho atika laqatee ati edo ofo'laan; yaane kinni hitaatexxa duuchcha muunxabaan, eeyya insa'nexxi suume callixxen; godobi insa'nek seeribeloxxe la'o hendaan. 32 Hiyyichcho atika lanqe hujete'n hosissammabaaxee ati insa'ne'a meelinxe qonqonni jaalalatika sirba sirbaakenna, elo qica faarotike miyyinni sirbammaka sirballo insa'ne'a kaddeetten.

33 «Ati haasotetaxxi duuchchi dhugaati muuxxendaa wodda eettene yanna wabeekichchi insa'nexxe oddo'n hedheexxa egennaan.»