1 Duuchchi Woddik Goottik hiyyichchi higgeen ane'n dageexxi: 2 «Isira'eelike bogixxee;

« ‹Annuwwi dhangaggoteexxe woyinexxa gumma iteen;

oosetixxa issonna tutunsite hitina'n mammakina'nek mammaasi maa hiyyoteete›?

3 «Dhugaa anee hedhaanekixxa! Ta'inni edi'a konnee mammaasa Isira'eelike boga'n mammaakinabaan; hiyyannen Duuchchi Woddik Gootti. 4 Kunnise lubbo duuchcha anxen; annixxi lubbo anxe kaddemmashshanni beltiinxi lubbonna anxen; cubbo hujjaaxxi lubbo ise rertaan.

5 «Dhugaatanna qullumma hujaak

qullichchi manji afemeele,

6 Koobuwwate'n magenoonfatendaaxxe fakkuwwa'a tolchemeechcho itaba'a;

yookaan Isira'eelik ardixxa fakkuwwanna magenoonfatabaan;

Jaalo ifikixxa areninna yabaabulaba'a;

aada dubartetixxe'n hexxeexxe manjichchonni welti diiphabaan.

7 Ayeenna miicabaan;

yaane kinni liqeesatee abixxemalcho liqefatemmakee illee iima hiissa;

Solo'wekee itaalcho uwwa;

daareekee seemma uwwa malee'e hunnat mulqedhabaan.

8 Dhalakee liqesabaa;

yookaan serbeloke orinni lephpha adhdhabaan;

Fuggoxxa yaane huja giba;

manji manjiinxe oddo'n dhugaate mura.

9 Seera anka hordofaan;

ajaja ankanna addatemati heqedha;

Kunni manji qullichchaken;

dhugaaten isi hedhoti hedhaan;

hiyya'neen Lumok Duuchchi Woddik Gootti.✝

10 «Yaane kinni kunni manjichchi mulqedhaakee yookaan munde manjiixxa dunaaka yookaan tenne cubbuwwanaa'n heenee cubbonna hujaaka belto afo'oole, 11 anni isik qullichchi asseexxa duuchchanna assagophoole,

«Belt isik kinni koobuwwate'n fakkuwwatee tolchemeelcho itoole,

Jaalo ifikixxe arenni yabaabuloole,

12 Hiyyeeyyetanna rakkiyye micoole,

Hunnati mulqedhoole,

Liqeesatee abixxemalcho liqefatemakee illeema hiissa gophoole,

Fakkuwwanna magenoonfatoole,

Diqachchiissa'neexxa yaanuwwa assoole,

13 Dhalakee yookaan lephpho'a liqqeesoole,

Iitta hedheek manji hedhoti hedhaata? Haranga hedhabaan; diqachchiissa'neexxa tennee yaanera assemmaxxee dhugaaten isi reyaan; munde ifixxeenna laqemaak umo isingen.

14 «Kunni belti isinna belto i'leenna kunni belti anni asseenxa cubbo duuchcha uudee kaddomalee huja gophoole; tinninna:

15 «Koobuwwate'n fakkuwwatee tolchemeechcho ita gophoole,

Isira'eeli ardixxa fakkuwwanna magenonfata gophoole,

Jaalo ifikixxa areninna yabaabula gophoole,

16 Ayeenna miica gophoole,

liqeesate abixxemalcho liqefatemakee illeema hiissa gophoole,

Hunnati mulqedha gophoole,

yaanne kinni itaachcho solo'weekee,

seemma ifixxanna daarekee uwwoole,

17 Hiyyeyyete'n elobaaxxa assa gophoole,

lephpho'a yookaan dhalakee liqeessa gophoole,

Seera anka heqedhoole, ajaja anka hordofoole,

Isi hedhoti hedhaa malee annixxe cubboxxee reyabaan. 18 Anni isik kinni manjo balleessemmaxxee, dayyo ifikee'n hunnati mulqedhemmaxxeenna ardi ifik giddo fuggoxxa assemmaxxee ifixxe cubboxxee reyaan.

19 «Ha'no kinni, ‹Belti anna ifikixxe cubbo'a mayee xixema gophaa?› hitine qortina. Belti isik dhugaatixxanna seeriinxa yaane assemmaxxee, ajaja ankanna duuchchanna xonxomate heqedhemmaxxee dhugaten hedhoti hedhaan. 20 Rertaaxxi cubbo hujjeexxe lubbon. Belti anna ifikixxe cubboxxee xixemabaan; annikinna belto ifikixxe cubboxxee xixemabaan; qullichchi ifixxee qullummatike hira alfaan; cubbichchikinna ifixxe cubboke hira alfaan.✝

21 «Cubbichchi hujemmaxxe cubbo duuchchinaa'n illee iima higeexxi seera anka duuchcha heqedhoole, dhugatanna qajeelto yaane assoole dhugaaten isi, hedhoti hedhaa malee reyabaan. 22 Assemmaxxi balleessa duuchcha isi'a gattowaal hiyyendaan; hujemmaxxe qullummaxxee hedhoti hedha. 23 Dhugaandinni cubbichchiixxe reyo'n gammadannota? Cubbotenaa'n illema higeexxi hedhoti hedhooleteba gammadannok? Hiyya'neen Lumok Duuchchi Woddik Gootti.

24 «Qullichchi manji kinni qullumatenaa'n higeexxi cubbo hujoole, cubbichchi manji assemmaxxa diqachchiissaxxa yaanenna assoole, kunni manji hedhoti hedhaata? Assexxe qullummaxxe yaanuwwanaa'n mittettinna qaabatendabaan; addatemeeke kada gophemmaxxeenna hujemmaxxe cubboxxee reyaan.

25 «Hano kinni, ‹Duuchchi Woddike Goottik ori dhugaatikebaan› hitina. Koo Isira'eelike arda laqqe: ori ank dhugatikebaa? Dhugaatike kadebaak ha'noke orabaa? 26 Qullichchi qullummatenaa'n illeema higeexxi cubbo hujoole cubbo ifixxee reyaan; balleesseexxe balleessaxxeenna reyaan. 27 Cubbichchi manji kinni assemmaxxe fuggonaa'n illeema higeexxi dhugaatixxanna seerinxa yaane assoole lubbo ifixxa anjira. 28 Balleessemmaxxe balleessa duuchchanaa'n hubateexxi illeema higemmaxxee dhugaaten, hedhoti hedhaan; reyabaan. 29 Yaane kinni Isira'eelik ardi, ‹Duuchchi Woddik Goottik ori dhugatikeba'a› hiyya'neen; koo Isira'eelike arda! Ank or dhugaatikebaa? Dhugaatike kadabaaki ha'nokebaata?

30 «Tennexxe'e koo Isira'eelike arda ha'noxxe huje hujeshshanni mitte mitte ha'no'nge'n murannon; hiyya'neen Lumok Duuchchi Wodik Gootti. Yoona aade aagge; cubbo ha'noxxi ha'noo balleessitabaashsha cubbotenaa'n illeema higge hiyya'neen Lumok Duuchchi Woddik Gootti. 31 Balleessitineexxa balleessa duuchcha ifinaa'n fuggusse; haaroka hedumanna haaroxxa qalbe horatte; koo Isira'eelike arda mayee rertattota? 32 Ani ayyixxe reyo'ninna gammada gophannaxxe'e aadde aagineexxi hedhoti hedhdhe hiyyanneen Lumok Duuchchi Woddik Gootti.