1 Duuchchi Woddike Goottik hiyyichchi higgeen ane'n dageexxi, 2 «Koo manjiinke belto murtabexxoo? Manjo anga sa'eek mannike konne qachcha'n murtabexoo? Diqachchisa'neexxa huje isixxa iso'n farrasite kuli; 3 iso'ninna hitatto qici: ‹Lumok Duuchchi Woddik Goottinna oddo atixxe'n manjiinxa munde dhangalaasatokinna fakkuwwa giissita'n ifi battoossati murte ifi'ni iyyedaqitaateek qachchaa, 4 dhangalaassetaxxe mundexxee ati balleessanjo kaddeeten; hujjetexxe fakkuwwanni battooteeten; barra atixxa shiqilshitee'eten; baro atikanna haruunsexeeten. Tennexxee ani atee gosa gosake arda'n gacifachchotike, boginke arda duuchcha'n tuffatendeeteke assannon. 5 Koo summa baxxe'etekenna weekensha wo'mite'eekee qachchaa, shiqikinna bayyik ate'n gacifataan.

6 « ‹Ati giddo hedheek mitti mittingi Isira'eelik akeekisanjuwwi baalloma ifika manjiinxa munde dhangalaasatee la'onfanta'neen. 7 Ati giddo annuwwikinna amuwwa salphatte; ati giddo hedheek alagi sobeme'een, ati giddo anna affebaaxxi oosenna aro'o shi'witeexxi melaalle miicende.✝ 8 Anka woyyichcha miyuwwa tuffatette; Sanbatuwwa ankanna battoossiteeten.✝ 9 Manjiinxa munde dangalaasatee dhara odeesakiir ati giddo hedhemma'a; koobat hana fakkuwwatee tolchemeeka itaakiirinna fuggoke adabikiriinna atinni giddo hedhe. 10 Annuwwa ifikixxe areni welti diiphaakiir ati giddo hedheen; aadatike seerishsha qulootebaxxe yanna'n dubartetixxe aadanni hexxe'naa hunnat melaalleti welti diiphaakiir ati giddo hedheen. 11 Ati giddo mitti jaalo ifikixxe arenni yabaabula; weli belto ifikixxe are battoossa; weli ifike annixxe beltonni dayyo ifixxenni diipha.✝ 12 Ati giddo manjiinxa munde dhangalaaso'a manni matta adhdha; atinna dhalakeenna lephphatee liqeesat jaalo atika miice seeribeloxxa la'o gudhitette; aneenna deetette hiyya'neen Duuchchi Woddiki Gootti.✝

13 « ‹Seeriblo alfitetexxe la'oxxeenna atixxe oddo'n dundettexxe manjinxe mundexxee anga mufeti ate'n calannon. 14 Ate'n muronnaa ke'annoxxa bara godoba dandeette jabaatatto? Yookaan hirre atixxa jabeessexxato? Ani Duuchchi Woddik Gootti tennee'e haaso'ennen: haaso'ennexxanna muuxannon. 15 Gosa gosake ardi giddo atee xeerannon; boga boga duuchcha'ninna atee xeelagannon; battumma atixxanna atenaa'n qurubbi assanno. 16 Gosa gosake ardi edo battoondatto wodda ani Duuchchi Woddike Gootta kadennexxa egendatton› » hiyye.

17 Ookkoneechchi uduma Duuchchi Woddike Goottik hiyyichchi ane'n dageexxi, 18 «Koo manjinke belto, Isira'eelik ardi ani'a wayifulabaake kade'een; insa'ne duuchchiingi ani'a sibliji baqeechchi uduma finiini gatammake sageettotike sibljike, qorqoorotike, addichcha siblikikenna maalde'inke finiina kande'een. 19 Tennexxee Lumok Duuchchi Woddiki Gootti hiyya'nee qici, ‹Ha'no duuchchiing siblinke finiina kaddineemmaxxee Iyyerusaalemi ha'noo bukki assannon. 20 Manji birretika siblo, sageetotika siblo, addichcha siblonna maalde'a ittanni qorqooro basso'a boosumma giddo bukki assammashsha aninna iitanni mufe anixinninna aare anixxinni ha'no qachchi giddo bukki assannon; ookkonna ha'no bassannon. 21 Aninna Ha'noo bukki assennexxi aare anxixxa giira ha'noo'ni busse ha'ishanno; ha'nonna ookko giddo baqqinaan. 22 Birretik siblji boosumma giddo baqammashsha iittanni ha'nonna qachchi giddo baqqinaan, ani Duuchchi Woddik Gootti aare anxa ha'noo ganennexxa egendinaan.› »

23 Higgeenna Duuchchi Woddike Goottik hiyyichchi ane'n dageexxi, 24 «Koo manjiinke belto, ookkone boga hitatto qici, ‹Ati luqqi hitebexxoken aaretixxa barranna xeeni ate'n ganebaake bogan› hiyyi. 25 Isixxi Hayyoole adamemmalcho ita'n ininifammake neeqishsha mitte afo'o kadde kakatte; insa'nee ardake shinne'een, karranna wele fiixxeexxa yaanuwwa mulqe'ne'een; haddo melaallenna aro'i belo gatinse'een.* 26 Qeese isixxinna seera anke'n jallitee; woyyichcha anka miyuwwanna battoosite; woyyitte yaanuwwa battootexxenaa'n gargar hiissiteba'a; xuritte yaanuwwa ca'itetenaa'n gargarumma affebaashsha barsiisse; sanbatuwwa ankenaa'n ille hoyye'ne; aninna oddo insa'nexe'n tuffatemenne✝ 27 Isi giddo hedheek ja'laabuwwi adandeexxa ninifammaxxe yayyuwwashshaten; seeribeloxxa la'o alfatee munde dhangalaaseexxi manjo anga sa'ne. 28 Isi giddo hexxeexxi wabeekole tenne cubbo duuchcha sobiinxe waleellanninna dharite moronni buqqa; Duuchchi Woddik Goottinna haaso'ebaangi, ‹Lumok Duuchchi Woddik Gootti hiyya'nee qici› hita'n haasotta. 29 Ookkone bogik ardi mucuqe, mulqedhe, seera xe'ishiyyot hiyyeessakanna rakkichcha miice; alagakanna rabe. 30 Boga ookkone'e balleessabe'noshsha dalla'a ijaara'n, diigemeexxe bakka'n ookkone bogixxee ani edo uurraaka manjo insa'ne giddo hasenne; yaane kinni mittekanna afebe'no. 31 Tennexxe aare anxe'n insa'ne gananno; mufe anxixxe giiraninna insa'ne birenne; assinemmaxxi duuchchanna insa'ne'ninni higgaashsha assenne, hiyya'neen Lumok Duuchchi Woddik Gootti.»