1 « ‹Boga hixik ifike qadaada asedhdhate qoodendinnaa wodda, qeerrine lame tommenna onde kuma ciqile, godobakanna lame tomme kuma* ciqilexxa mitte kuta Duuchchi Woddike Gootti'a woyyitte bakka assitine uwwe; itti bakka duuchchinba woyyitete kaddaan; 2 Tenne bakkanaa'n qeerrine onde dhibba ciqile godobikinna onde dhibba ciqile kaddeexxi shoole gama affe'exxi bakka galmakee kadda; isexxe dowwe'ninna onde tomme ciqilexxi duwwixxi bakka hexxa. 3 Eettenne woyyitte bakka giddo qeerrinne lame tommenna onde kuma ciqile, godoba tomme kuma ciqilexxa bakka mik; ookko giddonna galmi, woyyo woyyitte bakka hexxaan. 4 Tinni bakkanna galmi giddo ergatendaaxxenna Duuchchi Woddike Gootti edo ergatenshatee shiqqaaxxe qeesole'a, boginxe woyyitte bakka kaddaan; tinni bakkanna qeesoletike galdumi'anna galmiinke ijaarsi'a kaddaan. 5 Qeerrine lame tommenna onde kuma ciqile, godobi tomme kuma ciqile kaddaaxxi bakka galmi giddo ergata'neexxe Leewwito'a hexxaaka mine ijaadhitaashsha qadaada insa'neke kaddaan.

6 « ‹Woyyitte bakkake maxxana'n godobi onde kuma ciqile qeerrinni lame tommenna onde kuma ciqilexxa bakka qachchakee qadadiinsha uwwi; kunninna Isira'eelike ardi duuchchike kaddaan.

7 « ‹Bogink galchalli qadaadi elqe kayyii'n woyyitte bakkanninna qachchiinxe bakkanni gabalemaake kadaan; tinninna dhidhimakenaa'n dhidhimidare'n borotinaa'ninna boroti darre'n me'eexxi dhidhimakenaa'n boroti qico'n hexxeexxe gabalak qeerrnni mitte gosatike mini'a uwwemeeke qadaadike cinaachcha'n me'ita. 8 Kunni bog Isira'eli giddo galchalliinke qadaada kadaan. Ta'inni edi'a ank galchalluwwi anka arda miicabaan; yaane kinni Isira'eelik ardi'a gosatike mini minishshanni qadaada insa'ne'a uuna.

9 «‹Lumok Duuchchi Woddik Goottinna koo Isira'eelike galchalluwwa! Sara saxxine'een; jallonna miica fuggussitineexxi, qajeellummatanna qullumma hujje; anke ardanaa'n afeechcho mulqedha waalle; tenne haaso'ek Lumoke Duuchchi Woddike Goottan. 10 Seeriinxa kiilo, Iffi* hiyyemaaka seernka safarsanjonna Badoosi* hiyyemaaka seeriinka miksanjo la'offatte. 11 Iffixxinna Badoosixxi mike weli qixxete kaddowaal; mitti Badoosik miksanji Homer* hiyyemaake miksanjixxe tommixxe anga, iittanni mitte Iffi Homerrixxe tommixxe anga; laminig mikisanji, Badoosikinna Iffik akeekemaak Homorkenten. 12 Mitte Seqili mikisanji lamme tomme Geera hiyyemaake mikisanjinni weli qixxeten; lame tomme seqilenna tommenna lame Seqile lebendaa wodda mitte Minaane kaddaan.

13 « ‹Shiqishshinaaxxi gargarti gargar hexxeexxi uwwa konnechchin butti'a hexxeexxen: mitte Homerke mikisajixxi dinnenaa'n iffike mikisanjixxa jaane anganaa'ni mitte, iittanni mitte Homerke mikisajo so'inaa'n iffike mikisanjixxe jaane anganaa'n mitteteten. 14 Zayitetixxi mika, mitte mittinge Homerike mikisajonaa'n Baadoosike mikisanjixxa tommete'naa'n mitte anga; Tinninna tomme Baadoosi mitte Homerinni qixxeten. 15 Iittanni Isira'eelixxa quffeexxa badda'a iteeke lame dhibba gedhebinaa'n mitte gedhechchi uwwemuun. Kunni duuchchi ardixxa cubbo biratee kaddaaxxe midhatixxe uwwa'a, ciinacatike tolchi'anna mittumatike tolchi'a kadaan; tenne haaso'eek Lumoke Duuchchi Woddike Goottan. 16 Bogink ardi duuchchi tenne gargar hexxeexxa uwwa Isira'eelike galchalli'a uwwaan. 17 Ayyanuwwa ayyanuwwa'inna, baate haroxxi fulatike ayyaana'ninna edi sanbata sanbata'n, Isira'eelike ardi'a murreeke ayyaanuwwa duuchcha'n ciincatixxa uwwa, midhatika tolchanna ha'watika tolcha shiqishiyyo ookkone galcallixxen; Isira'eelike ardixxa cubbo birate'e kaddo'a cubbotika tolcha midhatixxe uwwa'a, ciinacatike tolchi'anna mittummatike tolchi'a shiqishaan.

18 « ‹Lumok Duuchchi Woddik Goottinna siretike aganjixxe siretixxe barra'n fafa mitte afebaaka jibichcha aadhi; galmakanna ca'assi. 19 Qeesichchikinna cubbotik tolchixxe mundenaa'ni aadheexxi galmiinxe hulake mikikilanjuwwa'n, tolchimalchii iimike irgik shoolinge kasuwwa'ninna giddixxe wuddummexxe hulaxxe gubane'n fixowaal. 20 Mitti manji afebang yookaan haakitik hujeexe cubbo'a agenjixxe torbesoxxe barra'n iimi darra ku'liinemmashshan assitton; konne qicininna galmixxa cubbo birtaton.

21 « ‹Siretike aganjixxe tommenna sholgeesoxxe barra'ni sa'atika ayyana ulfeessitinaan; kunninna lebele e'yiteebaaxxa kebbo torbaane barra qico'n ittinaan. 22 Eettene barra'ni galchalli ifixxeenna bogiinke ardi duuchchixxee mitte jibichcha cobbotike tolchi'a shiqishaan. 23 Ayyanni ulfeessema'neke torbaaninixxe barra'ni galchanlli barra barra'ninn fafa afebaaka mitte fafa afebaka torbaane jibootanna torbaane gedhebinxa korbeeyye ciincati tolchi'a Duuchchi Woddike Gootti'a shiqinshowaal; barra barra'ninni cubotike tolchi'a mitte mitte labbaka recco qophpheesinowal. 24 Mitti mitting jibichchinna mitte mitte gedhebiink korbeesi tolchemaaxxa yanna mitte mitte Ifi ifike mikisanjixxi midhatixxi uwwanna mitte Iinke mikisanjixxe shoole literexxe zayitenni welti shiqishowaal.

25 « ‹Torbesoke agenjixxe tommenna ondeesoxxe barra'n safemeek torbaane barrake ayyaana'n, cubbotika tolcha, ciincatika tolcha, midhatika tolchi'anna zayite ittanni shiqishowwal.