1 Boji'emmennexxe lame tommenna ondixxe wogga'ni, woggatike siretike agenjo'n, tommeesoxxe barra'ni, Iyerusalemik qachchi ibeexxe tommenna shoolgaxxe wogga'ni, eettene barra'ninni Duuchchi Woddike Goottixxi hunna ane'ni hexxemman; Isinna ookko'a ane'e idage. 2 Magen waleellati Isira'eelike bogibaa anee iyyemare: yo'oshsha qeerraxxe kooba'ni anee uggen; koobateba'n bita'i darre'n, qachcha fakkaataak qeerrarrammi kinjiink minuwwi hedhemman.✝ 3 Ookko'anna anee iyemare; bifa sageetotike sibljishsha ifaaka manjichcho uudenne; isinna suqemeeke fuutixxa wodaronna miketixxa siqichcho abixxe wudumete'n uurre'emman.✝ 4 Manjichchikinna anee hiyyee qici, «Koo manjinke belto uudi: mansha atixxinni laqi: leellishaannexxanna duuchcha qalbeeffati; tennexxeeten Mageni kaba atee idage'eechchi; tennee uudettexxa duuchcha Isira'eelike arda'n haaso'i» hiyye.

5 Galmiinxa dowwe duuchcha buqeeka dalla'a uudennen; manjichiinxe anga'ninna qeerrinni jaane ciqilenna taakko gelteexxa miketixxa siqichcho uudennen; mitte mittendi ciqile taakko affe'emman; isinna dalla'a mikee wodda furdinne mitte miketixxa siqichcho, hojjatinna iittanni mitte miketixxa siqichcho kadde.✝

6 Ookkoo'n boroti darre edo hexxeexxe wudumeba dage; hulatika hadhisanjo da'meexxi wundumetixxe hulaxxa buttixxe gubaneka godoba mike; isenna mitte miketixxe siqichchomman. 7 Heqqanjuwwiink minuwwi, ejjuma mitte mitte miketixxe siqichcho, furdinenna mitte mitte miketixxe siqichchomman; minuwwinxe oddo oddo'ni hexxeexxe mitte mitte gimok furdinninna onde onde ciqilemman. Galmiba'a me'iyyotee buttike hadhisanjixxe sorok godobi mitte miketixxe siqichchomman.

8 Ookko'ni e'yatixxe hulaxxe wuddummexxa soro mike; 9 Godobikinna saddeetta ciqile, iseke utuphuwwik furdinninna lame ciqilemman. E'yatixxe hulake wuddummexxi soro, galminii albi edomman.

10 Dalla'inxe hulaxxa boroti darrexxa heqanjuwwiinxe kuttuwwaxxi middixxinna bita'ixxi kutuwwa weli qixxete kaddeexxi lami darre'n sase sase heqqanjuwwinke minuwwa hedhemman; minuwwinxe oddo oddo'n hexxemmaxxe gimoxxi mike welqixxetemman. 11 Ookko'ni e'yatixxe hulaka godoba tomme ciqile, iseen giddi'a me'aake orika godobanna tommenna sase ciqile mike. 12 Mitte mittinge heqqanjuwinke mini edi darre qeerrinne mitte mitte ciqile furdinne mitte mitte ciqile kaddaaxxe gimo hexxemman; mitte mitte kutak duuchchi darrek qeerinni jaane jaajne ciqilemman. 13 Ookko'n mitte heqanjinke minixxe udumixxe gimonaa'n wele gimo qico'n hexxeexxa e'yatixxe hulaxxa kuta mike; mitte kutaxxe udumixxe gimonaa'n ise kallachcha'n hexxeexxe kutaxxe udumixxe gimo qico'n hedheek bayyinni lame tommenna onde ciqilemman. 14 Galmiba'a e'yatixxe hulaxxe soro gami gamixxa gimo mike; mitte mitte gimok qeerrinni jaane jaane tomme ciqilemman; mikemebinna wuddumeti edi darre hexxeexxe soron. 15 Edixxe eyatixxe wuddumenaa'n giddixxe hulaxxe soroti qico hedheek qeerrinni onde tomme ciqilemman. 16 Heqanjuwwiinxi kutuwwanna isixxi gimuwwa giddi darre dowwe'n sorote'n hexxemmaxxixxa shixxaramma masikootuwwa affe'een. E'yatixxe hulake middi bita'ixxi gi'mo'n meexxetike haqichchixxe misile giissende'emman.

17 Ookko'ninna siretike dalla'ixxe baxxeba'a anee idage; ookkonna wuddummetixxe dowwe'n ijaarendeexxa kutuwwanna kinji fayemeeka ora uudennen; ookkone orixe dowwe'n sase tomme kutuwwa hexxemman. 18 Ikki or aadi darre dala'inxi hulanni welti abidiseme hujemeeke kadaa wodda godobikinna dalla'inxe hulake qeerrininni qixxetemman. 19 Ookko'ni aadi darrexxe hulabaa'n, langaxxe wuddume qico'n hedheeka bayyinne mike; kunninna boroti darre'ninna kadi middi darre'n hedheek bayyinni mitte dhibba ciqilemman.

20 Ookko'ninna middi darre edo hexxeexxi siretixxe wuddumeba'a geessissaaxxe hulaxxa qeerrinnenna godoba mike. 21 Tinni heqajuwwinxi wuddumenna middi bita'n sase sase kuttuwwa affe'emman; kutuwwatixxe oddo oddo'n hexxeexxi gimonna hulatixxe sorok siretixxe wuddummexxe mikenni qixxetemman; qeerrinnikinna onde tomme ciqile godibi lame tommenna onde ciqile. 22 Isixxi masikootuwwa, wuddumetixxi soronna meexxetixxe haqquwwaxxe misilexxi mike borotixxe hulaxxenni qixxetemman. Ookko'a qabatatee torbaane hadhisanjo hedhemman; hadhisanjii albi edi darre dalla'inixe wuddumeke kasa'n sorote hexxemman. 23 Middi darrexxe hulaxxe soroke kallachcha'n, boroti darrexxe hula'n hexxeexxi wele langaxxe wuddumeba geessissaaxxe hula hexxemman; manjichchikinna tenne lame hulaxxe oddo'n hedheeka bayyine mikee wodda dhibba ciqile kade.

24 Ookko'ninna bita'i darre'n anee idage: ooko'ninna bita'i darre'ni wirri hiteexxa hula uudennen; Iseka utuphanna wuddummexxa soro mike; miketinna wele hulaxxe gimonninna utuphinni qixxetemman. 25 Heqqanjuwwinxe hula'ininna wuddummetixxe qarqara'ni masikoote affeemman: qeerrinne onde tomme ciqile; godobi lame tommenna onde ciqilemman. 26 Wuddumetixxe soroke kallacha'n hedheek torbaan iimi'a da'minammak hadhisanji e'yatixxe hulaba'a geessisaan; gami gamii'ni hedheek hulatixxe gomo'n meexxetixxi misile hexxeen. 27 Langaxxi wuddume kinni bita'i kinni welti weli fakkaataxxa hula afeen; isinna tenne hulanaa'ni ke'isse bita'i darre'n hexxexee gadhixxe hula qico'ni mike; tinninna mitte dhibba ciqilemman.

28 Ookko'ninna bita'ixxe hula darre'n langaxxe wuddume giddi'a anee idage; bita'i darrexxa hulanna mikee wodda wele huluwwanni qixxetemman. 29 E'yatixx ehula heqqanjuwwik minuwwinni welti, oddo oddote'n hexxemmaxxi gimuwwanna soro wele huluwanni qixxetemman. E'yinammaxxi hulanna isexxi soro dowwete'n masikootuwwa affe'emmani. Heqqanjuwiinke minuwwinna isixxe sorok qeerrinni onde tomme ciqile, godobi lame tommenna onde ciqilemman. 30 Langaxxe wuddume qarqara'ni hexxeexxe edixxe hulatixxe soruwwak qeerrini lame tommenna onde ciqilen, godobi kinn onde ciqilemman. 31 E'yatixxe hula heqqanjuwiinke minuwwixxi soro takkaxxe wuddume albi edomman; meexetike haqichchi utuphuwwi hana giissemeemman; e'yatixxe hulaba geessisaak saddeeta lekati hadhisanjo hedhemman.

32 Ookko'ninna boroti darree'n langaxxe wuddumeba'a anee idagee e'yinammaxxa hulanna mike wodda wele huluwwanni qixxetemman. 33 E'yatixxe hulak heqqanjuwwike minnuwwinni welti, oddo oddote'n hexxemaxxi gimuwwanna soro wele huluwwanni qixxetemman; e'yatixxi hula heqqanjuwwiinke minuwwanna gimmuwwaxxe dowwe'n maskotuwwa hexxemman; isek qirrinni onde tomme ciqilen, godobi lame tomme ciqilemman. 34 E'yatixxe hula heqqanjuwiinke minuwwixxi soro taakkaxxe wuddume albinnii edomman; meexxetike ehaqichchike utuphuwwi hana giissende'emman; e'yatixxe hulaba geessisaak saddeeta lekati hadhisanjo hedhemman.

35 Ookko'ninna middi darrexxe hulaba'a anee aadhe dage mikee wodda wele huluwwanni qixxetemman. 36 E'yatixxi hula heqqanjuwwike minuwwin welti, oddo oddote'n hexxemmaxxi gimuwwanna soro wele huluwwanni qixxetemman. Hexxemaxxi gimuwwa dowwete'n masikotuwwa affemman; soro wele huluwwanni qixxetemman; qeerrinni onde tomme ciqile, godobikinna lame tommenna onde ciqilemman. 37 E'yatixxe hula heqqaanjuwinke minuwwixxi soro taakkaxxe wuddume albinnii edomman; meexxetike haqichchi utuphuwwi hana gisende'emman; e'yatixxe hulaba geessisaak saddeeta lekati hadhisanjo hedhemman.

38 Mitte mittendi giddi darre e'yatixxe hulaxxe wuddumetixxe soro bira, ciincatika tolcha anshecatixxe kutaxxi hula hexxeen. 39 E'yatixxe hula'n hexxeexxe wuddummexxe soro hunda middi bita'ii'n ciincessinaaka tolcha, cubbotikanna balleessati tolcha dullaab lami lami beeruwwi hedheen. 40 E'yatixxe hula'n hexxeexxe wuddummexxe sorobaa'n gadhi darrexxe gimo'n middi darrexxe hulake hadhisanji bira middi bita'ii'ni lami lami beeruww hedheen. 41 Tennexxee mitte darre'ni shooli wele darre'n shooli beeruwwi tolchiinka hore hana gora'ate mitteba saddeeta beeruwwa hedhemman. 42 Ciincatike tolchi'a la'o uwwa'neka miyuwwa, bonceexxe kinonaa'ni hunjeexxa shooli beeruwwi hedhemman: mitti mittingixxi ejjuma mitte ciqile; godobinna qeerrinni mitte ciqilenna gamisa; konne beeruwwi hana ciinceessina'neke tolchanna wele tolcha gorra'atee kaadkinna miyuwwi hedhaamman. 43 Iittanni mitte taako kadaak lame dhanko afe'ek cunnichchuwwi gimotixxe dowwe'ni rarra'emman; beeruwwikinna tolchinka maala ugginammake boonchomman.

44 Giddi darrexxe wuddume'n giddixxe hula gadho, lame kuta hexxemman; mitti bita'ii'ni albinii edo middixxe hula darree'ni, weli middii'ni albinii edo bita'ixxe hula darre'nitemman. 45 Isinna ane'e hiyyee qic, «Bita'i darre'n wirri hiteexxi kuta galmi giddo ergatendammaxxe qeeseke, 46 middi darre'n wirri hiteexxi kuta kinni tolchimalchi hana ergatenda'neexxe qeesolexxen. Tinniirinna Saadoqixxe oose kaddaa wodda, Duuchchi Woddike Gootti edo shiqqe ergatema dandeettaxxi leewwitotenaa'n insa'ne callan» hiyye.

47 Ookko'ni wuddumme mike; qeerrine lame dhibba ciqile, godobikinna dhibba ciqileke shoolini kasi weli qixxetemman. Tolchimalchikinna galminii albi edo hedhemman.

48 Manjikinna galmiinxe soroba'a anee idage; sorotika utuphuwwa mikee wodda mitte darre'n onde ciqile wele darre'ninna ittanni onde ciqilemman. E'yatixxi hulak godobi tommenna shoole ciqile, gama gamake'n hexxeexxe gimok ba'linni mitte darre'ni sase ciqile, wele darre'ninna ittanni sase ciqilemman. 49 Sorotixxe wuddume qeerrini lame tome ciqile, edii'ni udumi qico'ni hedheek godobink ba'linni tommenna lame ciqile, edii'ni udumi qico'ni hedheek godobi tommenna lame ciqilemman. Galmi giddi'a e'yatike hadhisanjo afe'eken; erqenna kayyiki kasa kasake'n utuphuwwi hedhemman.