1 Duuchchi Woddike Goottik hiyyichchi ane'ni dage hiyyee qici: 2 «Koo manjinke beltoo! Isira'eelike akekisanjuwwa'n raaga raagi; hite, insa'ne'n raagatto qici: ‹Lumok Duuchchi Woddiki Gootti hiyya'nee qici, ifi calla kookirsexxa'neexxe Isira'elixxe allallisanuwwa'a aanne! Allallisanjuwwi gedhebo bobbaasa hasisamabata? 3 Ha'no adotanna ha'witinaan; oridati hunjeexa fuuttiinxa seemma odo'witinaan. Eloxxa munde afeeka du'litineen; yaane kinni gedhebo elo qicinni abidinebaani. 4 Gopheeka jabeessitinebaan; elagopheeka dhukkussiisinebaan; enqemeeka xaassinebaan. Milqeeka hiissitinebaan; ba'eka hassinebaan; hunnatinna miicamik konne gedhebo mootineen. 5 Tennexxee allallak hedha gophemmaxxee gedhebi xeeremeen; tenne buutonni biniinchuwwi iteen.✝ 6 Gedhebi anki tullichchuwwa duuchcha'ninna koobuwwate'n jeekki hiyye. Boga duuchcha'ni xeereme; hasito me'ekinna haba gante hiyyek hedhebaan.

7 « ‹Tennexxeenna ha'no allallisanuwa, Duuchchi Woddike Goottika hiyyichcho laqqe. 8 Ani hedhanneke kadennexxee, hiyya'neen lumok Duuchchi Woddiki Gootti allalisanjuwwi gedhebo anka hasito fula gophemmaxxee, gedhebi anki irra ifi xoo'mamik uundemmaxxee, anki gedhebi allallisanjo afa gophe butemeen; biniichuwwi duuchchi'a itate kadeen. 9 Tennexxee ha'no allallisanjuwwi Duuchchi Woddike Gootti haaso'a'neexxa laqqe. 10 «Ani Lumok Duuchchi Woddik Gootti anke gedhebixxe allallisanuwwa'n moronshate afeennen. Gedhebokanna allallisanotenaa'ni aadhennexxi allallabaashsha assannon. Telchinni elqi'a alalsanuwwi gedhebo anka allallabaashshanna ittabaashsha anka gedhebo afo'o insakenaa'ni hunsiisannon» hiyye.

11 « ‹Lumok Duuchchi Woddiki Gootti hiyya'nee qici, ani ifi'anni gedhebo anka harsannon; xexxe'atenna heqqedhannoni. 12 Allallisanji xeremeeke gedhebi giddii'ni ba'eeka harsedhammashsha aninna anka gedhebo harsedhannon. Duumanchiinxenna dimma dukkana barra'ni xexerememmake booncho duuchchana'n gedhebo anka anjirannon. 13 Konne qicin ani anka arda gosa gosake ardi giddii'ninna boga bogana'ni bukki assee fulchennexxi insa'neke bogibaa idagannon. Isira'eelixxe koobuwwa'n wode'uwwinxe dhooquwwa'n bogi giddo he'nemmaxxe bakka duuchcha'n insa'nee bobbaasannon. 14 Eloke booncho'ni gedhebo bobbaalsannoni; bobba'aabinna Isira'eelixxe koobuwwake tullchchuwwa'ni kadaan. Gedhebikinna Isira'elixxe koobuwwa'ni hana eloba anso dheede eloxxe anso hana ciisaan. 15 Ani ifi'anni gedhebo anka bobalsannon; ti'ni hinaashsha assannon. Hiyya'neen lumok Duuchchi Woddik Gootti. 16 Ba'eka halsannon; milqeeka hiisannon. Enqemeeka xaasannon; gopheeka jabesannoni; Ani dhugaatike allallisanjo kadenaxxee furdateekanna uduuda jabaateeka kinni ballessannon.

17 « ‹Anke gedhebo kaddineeka ha'no lumok Duuchchi Woddiki Gootti hiyya'nee qici, elokenna fuggoke gedhebinxe oddo'ni; gedhebinxe korbeyye'nina re'etixxe korbeyyexxe oddo'ni murte anxa muraannen. 18 Eloke boncho'ni allalendine qici hanqate'natteta? Gateeka ha'no allalendinaba lekkat hirbeessa hasissaata? Ca'ichcha wode'e ha'witinechchin gateeka lekkat booressa ha'no'a hasissaataa? 19 Konne qicin weli ank gedhebi ha'no lekkati hiribeesitineexxa bada'a ittanni ha'no lekkati booreesitineeka wode'e ha'wa hasissaata?

20 « ‹Tennexxee lumok Duuchchi Woddiki Gootti ifika gedhebo ani ifi'anni ha'yakenna huqqateeke gedhebi ankixxe oddo'ni murannon. 21 Ha'no hunna afebaaka gedhebo cinaachchikinna dugomoti dhiibina'n fulchitinammaxxee, gophaaleesa gaafik tundine bayyisinee shorritina'mmaxxee, 22 Yaane kinni ani gedhebo anka anjirannon, langaxxa ayyinna dannabe adhdhabaan. Ani elokenna fuggoke gedhebixxe oddo'ni murannoni. 23 Anke erganji Daawwitishsha hedheeka mitte allallisanjo anke ardi'a ke'iisannon. Isinna insa'nee xoo'mamik heqqaan. 24 Ani Duuchchi Woddike Gootta insa'neeke Mageno kadannoni; erganji anki Daawwitinna oddo insa'nexxe'ni galchallo kadan. Tennee haaso'ennek ante Duuchchi Woddike Goottan.

25 « ‹Aninna insa'ne nage'ik he'naashsha insa'ne'a kako aagaannon; fuggoke kadeeka biniinchcha anke ardike boganaa'n fugussannon. Tennexxee gedhebi anki gongomake'ninna kado booncho duuchcha'n nage'ik diiphaan. 26 Insa'neenna anxe koobake qariqara'ni hedheka boonchuwwa eebisannon. Xeenakanna mayete'ni ganissiisannon; kunni xeeninna goddiinke kadaan. 27 Fichchi giddixxi gargarti hexxeexxi haquwwa gummisaan; bogikinna missaaxxa midha fulchaan. Ardinna ifike boga'ni nage'ik hedhaan. Insa'neka qanbara enqano wodda insa'ne miicammake mannixxe anganaa'ni qullo fulchanno wodda, Ani Duuchchi Woddike Gootta kadenexxa egenaani. 28 Ookknechchi uduma wele bogike gosa gosak ardi'a insa'nee mulqe'nabaan; biniinchuwikinna insa'nee ninnifabaan; insa'ne sodachisake hedheban nage'iki he'naan. 29 Misseexxa midha fulchati ege'nemeeka boga insa'ne'a qopheessannon; insa'ne langaxxa solo'okee sa'issemmabaan; gosa gosake arda'ninna oso'lemmabaan. 30 Insa'nenna ani Duuchchi Woddiki Gootti insa'neki Mageni insa'nenni welti hedhennexxanna Isira'eelik ardi anke arda kadeexxa egennaani. Ani lumok Duuchchi Woddik Gootti tenne'e haaso'eennen. 31 Ha'no ani alla'lannoke anke gedhebon; Aninna ha'noke Magenon, hiyya'neen lumok Duuchchi Woddik Gootti› » hiyye.