1 Booji'emmennexxe tommixxe wogga'n, tommeessoke agenjo'n, tommenna langaxxe barra'n Duuchchi Woddike Goottik hiyyichchi aniba dage hiyyee qici:✝ 2 «Koo manjiinke belto Gibtseeke moyanjo Feri'ooniba'a alba wirri hiyyi,

iso'ninna Gibtseke arda duuchcha'n raaga raagi. 3 Dada Duuchchik Duuchchi Woddik Gootti Gibtseeke moyanji'a hiyya'neen hitatto qici:

« ‹Atike galaanike yaasumuwwixxe oddo'n ciisseetteke galaanike

lumoke biniinchaa Gibtseke moyanjo koo Feri'ooni ate'n ke'eennen;

«Abbayik galaan anken;

ifi'aana hucceenen» hitaatten.

4 Yaane kinn qeqqeshsha atike'n fixa uggannon;

galaaninka yaasumuwwa atikixxa qulxu'muwwanna atike biso'n mexxi assannon;

Atike bisike hommorrichcha goga'n mexxi assenexxe quluxu'muwwa duuchchin welti

atike galaanike yaasumuwwi giddi'n atee harkise fulchannon.

5 Ateenna atike galaanike yaasumuwwixxa quluxu'muwwa duuchcha,

qiila gammooje'n hunannon;

Atinna diidake'n ibbatton;

Ate'e bukki assaak, ke'isaakinna hedheba'a.

Biniichchuwakeenna ci'uwatee

itate kaddatoshsha ate uwwannon.

6 Ookkoneechchi uduma Gibtsee hedheek duuchchi

ani Duuchchi Woddike Gootta kadeeneexxa ege'naan.

« ‹Ha'no Isira'eelike ardi'a woyi fuldabaaxxe shonbooqiinxe siqqichcho kaddine'een.✝ 7 Anga ifixxen atee abindee wodda, qosho'mi hitee boba insa'nexxa otteten; ate'n irkantee woddanna qurubi hitee dudduro insa'neke duuchchinni miciremmaashsha assitette.

8 « ‹Tennexxee lumok Duuchchi Woddik Gootti hiyya'nee qici: bagedo ate'n idagannon; manjo atikanna horuwwa insa'neka birannon. 9 Gibtseek bogi urummakenna olete kadaan;

ookkoneechchi uduma ani Duuchchi Woddike Gootta kadeennexxanna egenaan.

« ‹Tinninna kaddaachchi isi hiyyee qici, «Abbayik galaan anken; ante isoo giisennen,» hitee'etten. 10 Tennexxe kunse ani ate'ninna atike galanike yaasumuwwa'n mufeti ke'enne; Gibtseeka boganna Migidooli'n Asiwaan qico'n ookko'ninna Tophiyiinxe gabala qico'n haranga oletanna urumake assannon. 11 Lekka manjiinxi yookaan hori ise giddii'n sa'abaan; shoole tomme wogga qico'n ayyinna ise giddo hedhabaan. 12 Urmmemake boguwwishsha Gibtseeka boga urumake assannon; diigememmake wele qachchuwwishsha isek qachchuwwi shoole tomme wogga olete kadaan. Aninna Gibtseka manna gosa gosake ardi giddo xeerannon; boga boga'ninna insa'ne xeelagannon.

13 « ‹Dada Duuchchik Duuchchi Woddik Gootti hiyya'nee qici: shoole tomme wogga uduma Gibtseeka manna xeeremeke gosa gosake ardi giddii'n bukki assannon. 14 Booji'otenaa'n insa'nee illeema hissennexxi hundaayye ifixxike boga'n Phaxxiroosi insa'nee iyyedagannon. Ookkonna insa'nee salphatexxe mootumma kandaan. 15 Wele Mootumuwwa duuchchanaa'n caala salphateexxe kaddaan; ta'anni edi'a wele gosa gosake ardi caala ifi lumisaba'a. Wele gosa gosake arda'n haranga langaxxa mootabaashsha. Ani isee hara gophaaletette assannon. 16 Isira'eelik ardi gargarsa halsa Gibtse mare wodda isee insa'ne'n assitemmaxxa balleessa qalli hiyyaa malee ta'inn edi'a Isira'elik ardi Gibtse addatabaan. Ookkonechchi uduma ani Duuchchi Woddike Gootta kadeneexa egennaan.› »

17 Boji'emennexxe lame tommenna torbeesoxxe wogga'n taakesoke agenjixxe siretixxe barra'n Duuchchi Woddike Goottik hiyyichchi ane'n dage hiyyee qici: 18 «Koo manjiinke belto Baabiloonik moyanji Naabukadanatsoor Xiroosi'i lolatee umi insa'nek luqa'eexxi dugumo insa'nexxi madoota qico'n ifike loliinke manna'n a'uraaka miya ba'isseen. Kaddo male'e moyanjikinna kaddi isiki sannachchi tenne duuchchanaa'n alfineexxi la'o hexxeba'a. 19 Tennexxee Dada Duuchchik Duuchchi Woddik Gootti hiyya'nee qici: Kunse ani Gibtseeke boga'n Baabiloonike moyanjo Naabukadanatsoorixxe anga'n sa'isse uwwe'na'a isinna ifike loliinke manni'a rundiinshsha uwwo'a Gibtsee bogika qabeena booji'e adhdhaan. 20 Isinna isik loliink manni ani'a ergatememmaxxee isike eloke hiri'a Gibtsee isi'a uwwe'ennen; tenne haaso'ennek ante lumoke Duuchchi Woddike Goottan.

21 «Eettene barra Isira'eelike mannixxa hunna jabeesannon; koo Hiziqeel insa'nexxe oddo'n afo'o wo'mite haasotattoshsha assannon; ookkoneechchi uduma ani Duuchchi Woddike Gootta kade'ennexxa egenaan.»