1 Duuchchi Woddike Goottik hiyyichchi ane'ni daggeexxi: 2 «Koo manjiinke beltoo! Tullichchi callixxa Isira'eeli'i elobaaxxe illenni udda'ni wabeekkumma tullichuwwake'ni hite wabeekuma insa'ne'ni haaso'i 3 hitatto qici: ‹Ha'no Isira'eelike tullichuwwa Lumoke Duuchchi Woddike Goottika hiyyichcho laqqe; Lumok Duuchchi Woddik Gootti tullichchuwwanna goorruwwa dareerruwwanna dhooqquwwa hiyya'nee qici: Bagedo ha'noo'ni iyyedagannon, ha'no giddo magenoonfachchotika qephphichcha boonchuwwa balleessannon. 4 Tolchiink boonchi ha'nook diigemaan; hixaana ha'no gubbinaachchuwwi bututaan; han'nooka dulemeemaka manna magenoonfachchottixxe fakkuwwa edo ibisannon. 5 Isira'eelika rensha insa'nexxe magenoonfachchotixxe fakkuwwa edo kitinsannon; miqe ha'nooxxanna ha'nooke tolchike bonchuwwi qarqara xeerannon. 6 Ha'no hexxinaammake booncho duuchcha'n ha'nooki qachchuwwinna ha'nooxxi magenoonfachchottixxi goorruwwa diigendaan; iittanni ha'nook tolchiink qephphichchi boonchuwwi batto'aan, diigemaan; magenoonfachchotixxi ha'nooxxi fakkuwwa enqendaan; hixaana guphphitinaachchuwwi bullo'aan; anga ha'nooxxenni giissitinemalchi duuchchi bundulli hiyye ba'aan. 7 Dulememak ha'nok manni ha'no giddo hunemaan, aninna Duuchchi Woddike Gootta kadeennexxa egendinaan.

8 « ‹Yaane kinni gosa gosake ardi bogi giddo xexxeerendinaa wodda ha'nonaa'n mitte mitte wolaantichchakenaa'n fuleeka heenoka mannanna gatisannon. 9 Kunni wolaantichchakeenaa'n fuleek, anenaa'ni bayyatteexxi insa'nexxe yabaabbulto qalbenninna magenoonfachchotixxa fakkuwwa hordofa'emmaxxee insa'nexxe illenni qalbe anxa hittee qico gunbeemmaxxee booji'emmeeke gosa gosake ardike bogi giddo he'nee anee qaabantaan; assineemmaxxe fuggoxxeenna hunjeemmaxxe diqqachchissaaxxe insa'nexxe magenoonfachchotixxe fakkuwwanaa'n kexxeexxa ifinna xireeffantaan. 10 Insa'nenna ani Duuchchi Woddike Gootta kadeennexxa egennaan; tenne fuggoxxa yaane insa'ne'ni idaganno hiyye haaso'ennek tolakebaan.

11 « ‹Lumok Duuchchi Woddik Gootti anee: Isira'eelik manni asseexxe fuggoxxe hujeexxeenna diqqachchiisaaxxe yaane duuchchi'a wolaantichchik, solo'ikinna dhukkubik mundaammaxxee aareti anga calda'ni lekkatinna hirbeesita'ni «Aane'e!» hite raare hiyye. 12 Bayya hedheekiir dhukkubik reyaan; shiqa hedheekiirinna wolaantichchik mudaan; lubbo gateekiirinna solo'ik mudaan; konnee qicinni bala anixxa insa'ne'ni ibissannon. 13 Dulemeemak insa'nek manni tolchimmalchik qarqara'ni insa'nexxe magenoonfachchotixxe fakkuwwaxxe oddo'ni, qeerraramma gooruwwa duuchcha'ninna koobbuwwatixxe xunguwwa duuchcha'ni, shafi qufeeke haqichchuwwi duuchcha'inna shafik bankaraarake qilxi hunda duuchcha iittanni fakkuwwate'e fishshaake foolika tolcha tolchineemmaxxe bakka duuchcha'ni rensh hunnee'naa uunda wodda ani Duuchhci Woddike Gootta kadeenexxa egennaan. 14 Ani anga anxa insa'ne'ni ke'issennexxi, he'nammaka booncho duuchcha bita'ii'ni qiilla gammoojenaa'n midha Reebilake qachchii qico'n boga onake assannon; eetene yanna ani Duuchchi Woddike Gootta kadeennexxa egennaan.› »