1 Mageniink Hafuurinna anee iimi'a qophphi asseexxi borroti darrexxe Duuchchi Woddike Goottixxe hulaba iyyedage; hulatibaa e'yinammaba lame tommenna onde manna hedhemman; insa'ne giddo ardiinka akeekisanjuwwa Azuurika belto Azaaninna Banayaaka belto Felaxiyaasi'i afenne. 2 Duuchchi Woddik Goottinna, «Koo manjiinke belto kunni manni fuggoxxa hedaakenna konne qachcha'n figgoxxa mari'ataake mannann. 3 Insa'nenna ‹minuwwi ijaaremexxi yannata shiqotebaata? Kunni qachchi oddolchote, no'o kinni maalinsha oddolcho giddo heqqemmenne› hine'een. 4 Tennexxee raaga insa'ne'n raagi; koo manjiinke belto raaga raagi.»

5 Ookkoneechchi uduma Duuchchi Woddike Goottik Hafuurinna ane'ni dageexxi hiyyi hiyyee qici: «Duuchchi Woddik Gootti hiyya'nee qici: Koo Isira'eelike arda ha'no tenne yaane haasotine'een, ani ha'noke godobika yaada ege'neennen. 6 Konne qachcha'n ha'no heddo manna shiltineexxi ora isike'n rensha wonshitine'een.

7 «Tennexxee Lumok Duuchchi Woddik Gootti hiyya'nee qici: Ookko hundine'ek renshuwwi isi maalaken; kunni qachchinna oddolchoten; ani kinni ha'noo isi gidd'n fulchannon. 8 Ha'no wolaantichcha sodatine'een; ani wolaantichcha ha'no'n ergannon hiyya'een Lumok Duuchchi Woddik Gootti. 9 Qachchakenaa'n ha'noo fulchenneexxi ha'noo alagiinxe anga'n sa'issannon; murte anxanna ha'no'n murannon. 10 Wolaantichchoke'n rertinaa'n; Isira'eelike bogi giddo ha'no'n murannon; ookkone wodda ani Duuchchi Woddike Gootta kadennexxa egendinaan. 11 Kunni qachchi ha'no'a oddolchote kadabaan; ha'nonna isi giddo maaliishsha kaddinabaa; ani ha'no'n Isira'eelike bogi giddo murannon. 12 Ookkone wodda ani Duuchchi Woddike Gootta kadennexxa egendinaan; ha'noo qarqara ha'noke'n hedheeke gosa gosak ardika seera hordofinee malee ajaja anka muuxinebaan; seera anka heqexxinebaan.»

13 Aninna raaga raagande'n hedhe'naan Banayaak belti Felaxiyaa reye; aninna albik butta gonbisemennexxi, «Koo Dada Duuchchike Duuchchi Woddike Gootta aane'e Isira'eelike ardixxa hafe haranga balleessitatota?» hiyya'n hafuura gikki asse oodhenne.

14 Duuchchi Woddike Gootti hiyyichchi anee dageexxi, 15 «Koo manjiinke belto atike dayyuwwixxee, atike firuwwixxenna Isira'eelik ardi duuchchixxee ‹Insa'nee Duuchchi Woddike Goottinaa'n bayyante'een› kunni bogi geegoke kadee'e ‹no'o'a uwwemedheen hiyyeexxi Iyyerusaalemi hedhammak manni haaso'edheen› hiyye.

16 «Tennexxee Lumok Duuchchi Woddik Gootti hiyya'nee qici: ‹Gosa gosake ardi giddo insa'ne'e me'inashshanna assonnole, boga boga duuchcha'ninna insa'ne'e xeeronnolenna heenoxxe yanna'a insa'ne'a galmake kade'ennan› hiyye.

17 «Tennexxee Lumok Duuchchi Woddik Gootti hiyya'neenni hitato qici: ‹Ani insa'nee gosa gosake ardi giddii'n insa'nee bukki assannon: xexeerremmemmakee boguwwinaa'n insa'ne'e illeema hissannon; Isira'eelika boganna haaroba ha'no'a uwwannon› hiyye.

18 «Konne bogibaa hingaaxxa yanna battotteexxa diqachchiissaxxa yaanuwwa bogakenaa'n fugusinaan. 19 Ani insa'ne'a mitte godobanna haaroka hafuura insa'ne giddo uggurannon; kinjiinka godoba insa'ne giddi'n fulchennexxi ajajenda qale insa'ne'a uwwannon.✝ 20 Tennexxee insa'ne ajaja anka muunxaan; seera ankanna heqqe'naan; insa'nenna arda anke kandaan; aninna insa'neeke Mageno kadannon. 21 Yanne kinni godoba ifike'n battitte fakkuwwaba'anna diqachchisaaxxe miisilewwabaa wirri hiyyaakaara huje insa'nexxishshanni insa'ne'a uwwannon hiyya'neen Duuchchi Woddik Gootti.»

22 Eettenne yanna Kirubeele keela ifika bande; moluwwatinna ise bira hexxemman; Isira'eelike Mageniink gaachchanninna ise hana hedhemman. 23 Duuchchi Woddike Goottik gaachchanninna qachchi giddii'n keexxi alalle me'e; qachchakenaa'n borroti darre'n hexxeexxe kooba hana uurre.✝ 24 Mageniink Hafuurikinna ane'e iimi'a qophphpi asseexxi Mageniike Hafuurinni uwweendeexxe waleellanni Baabiloonke boga'n booji'eme hedhemmake manniba anee iyyedage; ookkoneechchi uduma uudennaxxi waleella aneenaa'n me'ite. 25 Aninna Duuchchi Woddik Gootti ane'ni leelishemmaxxa yaane duuchcha booji'eme hedhemmake manna'n haaso'enne.