1 Isira'eelixxe geedhuwwanaa'n mitte mitte anba dageexxi ani edi darre ofolde; 2 Duuchchi Woddike Goottik hiyyichchi ane'n dageexxi, 3 «Koo manjiinke belto kunni manni magenoonfatammaxxa fakkuwwa godoba masse'ne'een; ifixxa fuggonna gugufachotike kinjishsha ifi edo uggudhine'een. Hittata ane'e mise yaane laqqe'naata? 4 Tennexxe ati insa'ne'n ‹Lumok Duuchchi Woddik Gootti huuni Isira'eelik ardi magenoonfachchotixxa fakke godobi giddo abixxeexxi fuggo ifixxanna gugufachchotike kinjishsha ifi edo uggudheexxi wabeekichchinba'a maroole ani Duuchchi Woddik Gootti ookkone manjixxe fakkuwwaxxe birasa'neshshanni isi'a geyaaka hiissichcho uwwannon. 5 Tenne'e assannochchinna fakkuwwa magenofatati anenaa'n gargar higeemmake Isira'eelike ardi duuchchika godoba aniba'a wirri assona'aten.›

6 «Tennexxee Isira'eelike arda'n Lumok Duuchchi Woddik Gootti hiyya'ne'n hitatto qici, ‹Aade aagineexxi ha'noxxe fakkuwwanaa'n illeema higge; diqachchiissa'neexxa ha'noxxa magenofachchonna waalle.›

7 « ‹Huuni Isira'eelik manji yookaan Isira'eeli giddo hedheek alag ifi anenaa'n gargar hiissati fakkuwwa godoba abixxoole, fuggotanna guggufachchotike kinjishsha ifi edo uggudheexxi anee laqedho'a wabekichchiba'a dageexxe kaddoole, ani Duuchchi Woddik Gootti umo angeninni hissichcho isia'a uwwannon. 8 Alba anka fuggoxxenni ookkone manjo'n wirri assannon; beessisakeenna mammakemaake assannon; anke ardi giddi'ninna isoo fuggussanon; eettene yanna ani Duuchchi Woddike Gootta kadennexxa egendinaan.

9 « ‹Mitti wabeekichchi wabeekumma haaso'o'a sobemoole, ookkone wabeekichcho sobennek ante Duuchchi Woddike Goottan; hirre anxa iso'n ke'ennexxi arda anke Isira'eeli giddi'n isoo balleessannon. 10 Wabeekichchikinna isoo qodhdho'a dageekeerinna welti qixxe balleessanjoke kandemmaxxee balleesa insa'nexxee insa'ne xixemmaan. 11 Ta'anni edi'a Isira'eelik ardi dedheexxi aninaa'n gargar higabaan; higgenna cubbo ifixxe duuchchinni ifi battoossabaan; insa'ne anke arda kandaan; aninna insa'neke Mageno kadannon; hiyya'neen Lumok Duuchchi Woddik Gootti› » hiyye.

12 Duuchchi Woddik Goottik hiyyichchi ane'n higgeen dageexxi, 13 «Koo manjiinke belto mitte bogik manni ani'a addatema gophiyyoti anee balleessoolenna aninna anga anxa iimi'a adhee ita insa'neexxixxa muumme bassonnole, solo'okanna iyyedagennexxi manjo hore isa'neka bironnole, 14 Nohi, Dani'eelinna Iyoobi kunni sasi manni ookkone boggi giddo he'neelenna midde insa'ne qullumma ifixxenni anjirraak umo ifinge callamman; tenne haaso'ek Duuchchi Woddik Goottan.

15 «Yookaan fuggichcha biniichcha bogake'n wocci asse'naa boga ardi belo gatisoolenna biniichchakenaa'n kexxeexxa bogi manji giddii'n sa'abaake onake kadoole, 16 Duuchchi Woddike Gootta hedhaa'neke kadenneshshanni kunni sasi manni ookkone boga'n hedheexxenna kaddoole midde ifixxa labbaxxanna meyyaxxa oose anjira dandeenabaan insa'ne calla anjiremmaan; bogi ikki kinni onake kadaan.

17 «Ookkone boga bagedo erge, ‹hore manjo birennele› 18 ani Duuchchi Woddik Gootti hedhaannekixxa kunni sasi manni ookkone bogi giddo hedhoole midde umo ifinge calla anjira malee ifixxa labbaxxanna meyyaxxa oose dande'e anjirabaan.

19 «Yookaan ookkone boga'n bala ibisonolenna aare anxa munde dhangalaase'e hore manjo birennele, 20 ane'e hedhaanneke Duuchchi Woddike Goottixxa, Nohi, Dani'eelinna Iyyoobi ookkone bogi giddo he'noole midde qullumma ifixxenni umo ifinge calla anjirra malee ifixxa labbaxxanna meyyaxxa oose anjira dandeennabaan.

21 «Lumok Duuchchi Woddik Gootti hiyya'nee qici, hore manjo ise'nenaa'n bironna'a anxa bajabaja assitaaxxa shoole murtuwwa: bagedo, solo'o, fuggichcha biniichchanna bala Iyyerusaalemi'n iyyedaganno woddafa'a hittatta fuggattuta! 22 Yaane kinni ookko'n gateexxi fulaak labba meyyak hedha; insa'nenna ha'noba'a dangaan; ha'nonna insa'neka fuggoka me'injonna fuggoxxa huje insa'nexxa uuddinaa wodda ani Iyyerusaalemi'n idagenexxe ba'ne duuchcha uuddaaxxenni baganni hitinaan. 23 Insa'neka fuggoka me'injo insa'nekanna insa'nexxa fuggoxxa huje uuddinaa wodda ani mitte yaanenna insa'ne'n tola boddichcha assebe'noxxa wo'mitinammaxxee baganni hitinaan; Lumok Duuchchi Woddik Gootti tennee haaso'edheen.»