1 Duuchchi Woddike Goottik hiyyichchi ane'n dageexxi 2 «Koo manjiinke belto jallichcha ardi giddo hexxeten; insa'ne jallichcha arda kandeemmaxxee uuddaneexxe ille anfe'een yaane kinni anfabaan: lanqaaneexxe mansha anfe'een yaane kinni lanqabaan.✝

3 «Tennexxee koo manjiinke belto insa'ne atee uunda'naan barra banteessa booji'eme me'ammake manjishsha mi'ya atika bukki assexxi hexxetebaa'n kexxettexxi wele boonchiba'a me'i; jallichcha arda kandoolenna akimagaada tennee qalbeeffantaaxxe hexxeen. 4 Barra atee unda'naa booji'emeeke manjishsha miya atika bukki assedh; bogi siphphi hiyyamma wodda insa'ne ate uunda'naa'a booji'emeeke manji fulammashsha fuli. 5 Insa'ne uunda'naa'n dalla'a enqittetexxi ookko'n miya atika gadhi'a fulchi. 6 Insa'ne atee uunda'naan miya atika gurummote'n dulkite hashsha fuli; Isira'eelike ardi'a atee beessisake asseennaxxee boga uuddabexxoshsha alba buqedhi.»

7 Aninna ajejemennashshanni assenne; barra miya anka bukki assedhennexxi booji'emeeke manjishsha mi'ya anka gadhi'a fulchenne; hashshaa woddanna kinjiinka dala'a anga anxenni enqennen; ane'e uunda'naa'n hashshati miya anka gurummote'n dulkennexxi gadhi'a fulchenne.

8 Langa barro gorsa Duuchchi Woddik Goottik hiyyichchi ane'n dageexxi 9 «Koo manjiinke belto jallichchi Isira'eelik ardi ‹Kunni assitateechi maachcho?› hiyye atee qore'emman.

10 «Insa'ne'n hitato qici: ‹Lumok Duuchchi Woddik Goottinna kunni wabeekumiik hiyyichchi Iyyerusaalemi hedheeke ja'labixxeenna ookko afemaake Isira'eelike ardi duuchchixxeeten› hiyye. 11 Insa'ne'e ‹Ani hano'a beessisaken› hiyyi.

«Ani assenashshanni insa'ne'ninna iittanni assendaan. Booji'emmexxi adhdhemme me'inaan.

12 «Insa'ne giddo hedheek jallaabinna hashsha miya ifika gurummote'n dulkeexxi fulaan; gadhii'n luuxxe sa'ashsha kinjika dalla'a insa'ne isi'a enqinaan; boga afabaashshanna alba buqe'naan. 13 Ani fonxoro anxa isi'a uggannon; isinna fonxoro anxe'n abidemaan; aninna isoo Kaladaanike bogibaa Baabiloonike qachchibaa iyyedagannon; yaane kinni boga ookkone uudebaang ookko reyaan.✝ 14 Qarqara isike'n hedheeka isika gargaarsanjuwwanna isika loliinka manna duuchchin darre'n xeerannon; wolaantichchikinna insa'ne'e shorannon.

15 «Gosa gosake ardi giddo insa'nee xeeranno woddanna boga duuchcha'n insa'nee facaasanno wodda, ookkone wodda ani Duuchchi Woddike Gootta kadennexxa egennaan. 16 Yaane kinni insaneeke gosa gosake ardi giddo diqachchiisaaxxa insa'nexxa huje haasonnashsha insa'nenaa'n heenoka manna wolaantichchokenaa'n solo'okenaa'inna balatenaa'n gatisannon; ookkone wodda ani Duuchchi Woddike Gootta kadennexxa egenaan.»

17 Duuchchi Woddike Goottik hiyyichchi higgena ane'n dageexxi, 18 «Koo manjiinke belto ittatto wodda alayyik iti; ha'witatto woddanna sodatta'ninna culphissa'n ha'wi. 19 Boginke arda'ninna ‹Lumok Duuchchi Woddik Gootti Iyyerusaaleminna Isira'eelike boga'n hedha'neekaara hiyya'nee qici: Ookko hedha'neeke manni duuchchixxe xaqaronaa'n kexxeexxa bogi insa'nek duwwi gatamaaxxee ita ifixxa abarat indaan; wode'ekanna alayyik ha'winaan. 20 Manji hedhammaki qachchuwwi diigemaan; bogikinna onake kadaan; eettene yanna ani Duuchchi Woddike Gootta kadennexxa egendinaan› hiyyi.»

21 Duuchchi Woddike Goottik hiyyichchi higgeen ane'n dageexxi: 22 «Koo manjiinke belto Isira'eelike boga'n ‹Bari qeeredhe'een; waleella duuchchanna wayi fuldabaaxxe kadde'een; hitina'neek tinni hiyya maachcho?› 23 Ati insa'nee ‹Luomok Duuchchi Woddik Gootti tenne hiyya ani gatisannon; Isira'eelike boga'n langaxxa haaso'ake'n isoo la'ofantabaan› hitato qici, ‹leella duuchcha muuxendaaxxi barra shiqqe'een. 24 Isira'eelike ardi giddo dhariinxi waleellanna elle alfatee dhariinxa moro mora hexxabaan. 25 Yaane kinni ani Duuchchi Woddik Gootti haaso'annon; haaso'annoka hiyyichchinna turebaang muxemaan; koo ha'no jalliyye arda haaso'ennexxa duuchcha ha'noke barro'n muuxannon› hiyye ani Duuchchi Woddik Gootti haaso'ennen.»

26 Duuchchi Woddike Goottik hiyyichchi ane'n higgeen dageexxi, 27 «Koo manjiinke belto Isira'eelik ardi ‹Kunni manjichchi uuda'neexxi waleella edi'a qeerrake baro'n kaddaaxxen; haaso'aneexxi wabeekummanna qeerrake barixxen› hiyyaan.

28 «Tennexxee hitatto qici, ‹Lumok Duuchchi Woddik Gootti haaso'enneke hiyyichchinaa'n ta'anni edi'a hekki hiyyaak hedhebaan; haaso'annoxxi duuchchi muxendaan› hiyya'neen Duuchchi Woddik Gootti.»