1 Duuchchi Woddike Goottiki hiyyichchi higgeen ane'n dage hiyyee qici, 2 «Koo manjiinke beltoo, Iyyerusaalemi darre'n alba wirri hiyyi magenoonfachchotixxe bakkuwwa'n lallabi. Isira'eelike boga'n raaga raagi; 3 hitatto qici: ‹Duuchchi Woddiki Gootti hiyya'nee qici: ani ate'n ke'ennen; wolaantichcha ankanna gonofakenaa'n luqqilsaannen; qulichchakanna, fuggokanna ati giddii'n fugusanoon. 4 Qulichcha fuggichcha fugusannaxxe'e bita'i'ni middi qico'n hedhdheke arda duuchcha'n wolaantichchi anki gonofakenaa'n goshemeeshanni hedhaan. 5 Anka wolaantichcha gonofakenaa'n luqqisennek ante Duuchchi Woddike Gootta kadennexxa ardi duuchchi ege'naan; wolaantichchikinna gonofi giddi'a illee iima higabaan› hiyye.

6 «Tennexxee koo manjiinke belto aadi; enqendeexxe qalbenninna qaraartaaxxe yaaddonni insa'ne edo aadi. 7 Insa'nenna atee, ‹Mayee fooxxitaatte?› hine qorroole, ‹Dagga'neexxe elobaaxxe odoxxeeten; godobi duuchchi culphisa; anga duuchchi shaqqita; hedho duuchcha wode'eke kadde mikiti duuchchi gilligilan› insa'ne'a hiyyi. Tinni dagga'neen; muxxendaan; hiyya'neen Lumok Duuchchi Woddik Gootti.»

8 Duuchchi Woddike Goottiki hiyyichchi higgeen ane'n dageexxi: 9 «Koo manjiinke belto raaga raagi, ‹Duuchchi Woddik Gootti hiyya'neen hitatto qici:

« ‹Wolaantichchi! Wolaantichchi,

qaremeek morodemeek.

10 Qaremeek shiwo'a,

morodemeekinna banqotishsha calacala hiyyo'aten!

« ‹Yoona no'o gammandannoxxeeta?

Walaantichchi beltiixxa mootummatixxa siqqichcho wele siqqichchoshsha tuffate'een.

11 «‹Wolaantichchi anga abixxemo'a,

morodemaashsha uwwe'een;

Shiyalli anga abixxo'a

qaremedheen; morodeemeen.

12 Koo manjiinke belto tinni arda anke'n,

Isira'eelixxe hayyoole duuchcha'ninna daggeemmaxxee,

ooxxa'n, woo woo hiyyi.

Ardi ankinni welti,

wolaantichchik insa'ne rennaan.

Tennexxee ifi hoqqedhi.

13 « ‹Dhuganden hega uushsho daggaan; wolaantichcha tuffatteexxi itti mootummatixxi siqqichcho hegere gophphoolena'a? Hiyya'neen Duuchchi Woddiki Gootti›

14 «Tennexxee koo manjiinke belto raaga raagi.

Angatinna cali;

Wolaantichchikinna lamele,

sakkaxxa yannanna daguun;

Yo'oshsha biraake,

shiyateenna,

ora elqe kayyii'ni insa'ne buqaake wolaantichchon.

15 Godobi insa'nek culphisaashsha,

ribbi hiyyakiriinna bira sa'aashsha,

Insa'nexxe hulluwwa duuchcha'n

shiyaaka wolaantichcha uggenneen.

Aanne'e! Wolaantichi Calacala hiyyo'a morodeme'een;

shiyo'anna gonofake'n uggeennen.

16 Koo wolaantichcha qari atik wirri hiyye darre duuchcha'n,

middi'anna,

bita'i'a woxi.

17 Aninna mufet anga calannon;

aare anxinna qiiddaan;

Ani Duuchchi Woddiki Gootti tenne haaso'eennen.»

18 Duuchchi Woddike Goottiki hiyychchi higgeen ane'n dage hiyyee qici: 19 «Koo manjiinke belto Baabiloonike moyanji wolaantichchi ifikenni dagaaka lame orika karta giissi; laminge orik ke'it mitte boginaa'nten; oruwwi gargari higgaabanna beessisa oti. 20 Amoonitotike qachcha Rabaatiba dagaake wolaatichchi'a takake ora'n beessisa uggi; Yihudaba'anna Iyyerusaalemi'i kinjiinke dalla'ike qachchibaa dagaake wolaantichchi'a langake ora'n beessisa ugi. 21 Baabiloonik moyanji orii isi'a qajeelo'a kaayyo uuxxedhiyyotee weldenate'n lami ori afemaaba uurraan; gabuwwa wirrissa'n hixxa ibirsaan; fakkuwwa ifixxenaa'ninna gorsa qodhdha'n; mooro'o faro uuxxedhdhaan. 22 Dalla'a diigaatika lumoke haqichchika gubbo iyyedage uuriso'a, shiyatee ajaja uuwwo'a, geeraraashsha asso'a, dalla'a diigaatika lumoke haqichchika gubbo hulate'n uggo'a, buttina tullube giiso'anna kollo ijaaro'a Iyyerusaalemi'n ibaaka hixxa ifixxe middixxe anga'ni fulchaan. 23 Tinni mitti mittingi manji isi'a addatema gopheeke kadabaashsha kakatemakeeri'a dhariinxe moro labbaan; isi kinn insa'ne balleessa ifixxa qalli hinaashsha assaan; booji'enna insa'ne adhdhe me'a.

24 «Tennexxee Lumok Duuchchi Woddiki Gootti hiyya'nee qici: ‹Ha'no assitinaaxxe duuchchanni cubbo ha'nooxxa leellishinemmaxxee, leelli shiyyotinna xaqaro ha'nooxxi qalli hiyyendaashsha assitinemmaxxee, tenne assitinemmaxxee booji'endinaan.

25 « ‹Ati fuggallesinna battichchi, muuxamiinxi atixxi mura woxatixxi barra gelte'eke koo Isira'eelike ja'laaba 26 Lumok Duuchchi Woddiki Goottinna umokenaa'ni ruufa hoyyedhdhi kallaachcha atikanna huni: konnechchi edo kaddamaashshtebaan heeshshi hiyyemak ulfataan ulfatemmakinna heeshshi hiyyaan. 27 Murtetixxa deette afeek dagee'naa anga isixxe'n sa'isse uwwanno qico'n edo haranga kade ege'nebaaka urma Iyyerusaalemik qachchi urmaashsha assanno.›

28 «Koo manjiinke belto raaga raagi, ‹Amoonitotixxeenna insa'neke yowwichchixxee Duuchchi Woddik Gootti hiyya'neen hitatto qici:

« ‹Wolaantichchi! Wolaantichchi!

Shiyo'a goshemeek,

Biro'anna fiyemeek,

banqotishsha calacala hiyyo'a morodemeeken!✝

29 Koo wolaanticha ati'a uudendeexxi dhariinxi leella,

ati'a morendeexxi dhariinxi moro,

Barra insa'nexxi gelteeke,

xixemmo'a yannanna dagge shiqqe'eexxe

Gorra'emiyyo hassissaneexxe fugalleeyyeke,

gooba'n wolaantichchi uggemaan.

30 Wolaantichcha gonofi giddi'a hiissi;

Koo wolaantichcha,

Dadendeteke boncho'n,

Ilendeteke boga'n,

ookko ate'n murannon.

31 Aare anxenni atee ganannon;

anxe mufexxa giiranna ate'n ha'ishannon;

Birat muxxe fuleeke

mararabaake mannixxe anga'n ate'e saisse uwwannon.

32 Giiratee haqqete kaddatto;

munde atixxi boga atingi giddo dhangalata;

Ookkoneechchi udumi'a ayyinna atee qaabatabaan;

tenne haaso'eneki ante Duuchchi Woddike Goottan.› »