1 Boji'emmennexxe tommeenna langaxxe wogga'n, tommenna langake agenjixxe siretixxe barra'n Duuchchi Woddike Goottik hiyyichchi anibaa dagee hiyyee qici: 2 «Koo manjiinke belto Gibtseeke moyanjo Fari'ooni'a boochchisa boochchise iso'ni hitatto qici;

« ‹Ati gosa gosake ardixxe oddo'n ifi Neenqinsha uuddete;

yaane kinni ati lumoolla abbaayyuwwa giddo burraqa'n sodaachchiisammake galaani giddike lumoke biniichchishshaten;

Gaalanuwwi atiki giddo ga'nitaatek;

wode'e leekkati ga'nitaatek;

muummuwwa booreesitete.

3 « ‹Lumoki Duuchchi Woddiki Gootti hiyya'nee qici:

« ‹Ani heddo arda bukki asse;

marabe anxa ate'n darbannon;

insa'nenna anxe marabenni atee harkinsee fulchchinaan.

4 Buttinake'n atee ibisannoni;

diidake'ninna atee fanxaraarisannon;

Allaattuwwa duuchchi ate'n bukki hitaashsha assannoni;

bininchchuwwi duuchchi atee'e ninnifee itaan.

5 Maala atika koobuwwate'n xexxerannoni;

gatemmakanna dhooquwwate'n wonshannon.

6 Koobati qico'ni heheeke ora duuchcha'ni

duneda'neexxe atixxe mundeni ookkone boga lashshi assiteten;

dhooqate'ninna wo'mitaan.

7 Ani ate'e bakka atixxa balleessanno wodda iimuwwa buqannon;

urijuwwatinna iffabaashsha assannon;

Arishshotanna duumanchchik buqannoni;

agenjikinna iffa ifisabaan.✝

8 Imate'n ifaaka iffuwwa duuchcha,

ate'n dukkanaashsha asannoni;

boga atike'n dukkanna dukandaashsha asannoni;

hiyya'neeni Lumooki Duuchchi Woddiki Gootti.

9 Egendeboxxoke boga'n

gosa gosake ardixxe oddo'n ba'ne ate'n geessisanno wodda,

heddi ardik godobi raafemaan.

10 Heddi ardi ate'n geltaaxxe ba'nenaa'n kexxeexxa

alanne qexeri hinaashsha asannoni;

wolaantichchi ankinni insa'ne uunda'naa'a ate'n ke'anno wodda

Ate'n gelteexxe yaanena'n kexxeexxa;

moyanjuwwi insa'neki alaayye culphise.

Atinna ibattoxxa barra,

mitti mittingi ifi ifinxe lubbo'a sodaante roqonsinaan.

11 « ‹Lumooki Duuchchi Woddiki Gootti hiyya'nee qici:

« ‹Baabiloonik moyanji atee lolo'a dagaan,

12 Gosa gosake arda duuchchanaa'ni jajjaba mannike wolaantichcha'n,

bukki assiteteka atika lolinka manna shiyyemaashsha assanon;

Gibtseexxa holla balleessinaan,

laakkosi bira sa'eeke lolink isek manninna mudaan.

13 Heddi wode'i bira hedheeka horiinka bobba'a balleesannon;

atinni udumi'a manjiinxinna horniixi lekka isoo booressitaba'a.

14 Ookko'n wodu'uwwaa iseka quloonsannon;

wodu'uwwa isekanna zayitetishsha tululli hiyya'n yaa'ashsha assannon;

Hiyya'neen Duuchchi Woddik Gootti. 15 Gibtsee urumake assanno wodda;

boga iseke'n hedhaachcho duuchcha gophphe ondaa wodda;

Ookkonna hedha'nekaara biranno wodda;

Eettene yanna ani Duuchchi Woddike Gootta kadennexxa insa'nenna egenaan.›

16 «Kunni isexxee'e boochchinsaaka boochchisa gosa gosake ardi xxi dubarte wi'lishitaan; Gibtseexxeenna heddo iseke lolinke manni duuchchi'a boochchisaan; hiyya'neen lumok Duuchchi Woddik Gootti» hiyye.

17 Boji'emmennexxe tommenna langaxxe wogga'n siretike agenjixxe tommenna ondixxe barra'n Duuchchi Woddik Goottik hiyyichchi aniba gage hiyyee qici: 18 «Koo manjinke belto heddo Gibtseeke lolinke mannixxe'e oodhi; reyemmak manni e'yammake buttati hundike wiidda'n isenna jajjabba gosa gosaka manna sa'na'ashsha assi. 19 Insa'ne'e hitatto qici, ‹Danchummati ha'no wele mannana'n caldinaata? Butti'a sa'we; Mageno addatebake manninn moogemme.› 20 Insa'nenna wolaantichchik shiyemeemake manninni welti shiyemaan; wolaantichcha gonofakenaa'n fulchine'een; heddo iseke lolinke manni duuchchinni welti harkisemmowaal. 21 Buttati hundike wiidda'n jajjabbi akeekisanjuwwi Gibtsexxeenna isenni welti guddammakeerixxe'e,

‹Moogiinxe bale giddi'a e'yine'een wolaantichchik shinnemmakeerinninna Mageno addatabaake manninni welti irkate'een› hina'neen.

22 «Asoori iseke lolinke manni duuchchinni ookkonni hexxe; wolaantichchik reyemmakinna gorranemmake iseke mannik hirreesi oddote'n isee buqeen. 23 Mooggi ins'nekinna hundike wiiddike wiiddi giddon; lolink isek manninna iseke mooggi qarqara ibe'een. He'nammaxxe butta'n manna culphisashsha assammak duuchchi wolaantichchik shiyyemmedheen.

24 «Laakkonne dhaqqanbabaak Elaamike ardik mooggi ookko'o qarqara iseke'n hedheen; duuchchingi wolaantichchik gorra'emmee mundeen. He'nammaxxe butta'n manna culphisammak duuchchi Mageno addatebang butinni hundike wiidda'n sa'ne'een; bale giddo moogememmakeerinni welti shooko oddo'wine'een. 25 Hirreessi iseke qarqara'n hedheeke lolinke manninni welt, gorra'emeeke mannixxe oddo'n bakka qopheende'een. Insa'ne duuchching Mageno addantebaakenna wolaantichchik sheyemme'ekeerin; manna culphisiisa insa'nexxi he'naaxxe butta'n oodesendemmaxxe'e moogemammakinni welti shooko oddo'winaan; wolaantichchik shiyememmakixxe oddo'ninna irkantaan.

26 «Meesheekikinna Tubbalik moogi heddi insa'neke lolinke mannik mooginni erqe kayyii'n qoqqobeme hedheen; insa'ne duuchching Mageno ege'na gonpheemmaxxe'e, he'nammaxxe butta'n manjo culphisinsemmaxxe wolaantichchik shiyeme'een. 27 Baruwwi edi darre reyemmaki jajjabi mann; ookko wolaantichcha boraaffante; wonte qomate'n uggu'dhine lolinka miya ka'line'eshshanni moogemeeke manninni welti moogemmaba? Ookko lolinke mannixxi manna culphisiisa ha'nammaxxe butta'ni hedheeke jajjaba'n geltoolenna cubbo insa'nexxik hiri insa'nenden.

28 «Atinna Koo Fare'ooni atinna insa'neshshann enqendatton wolaantichchik shiyememmake Mageno ege'nebaakenni welti moogendatton.

29 «Eedoomik ardik moyanjuwwinna akeekisanjuwwi duuchchi ookko'o he'neen; hunna anfoolenna wolaantichchik shiyemeekiirinni welti moogemme'een; bale giddo moogemmeek Mageno ege'nebaake manninni welti buttati hunda wiiddake'n sa'ne'een.

30 «Middi darrek moyanjuwwi duuchchi Sidoonk manni duuchchi ookkoo he'neen; konneechchi edo hunna insa'nexxixxe buutonni manna culphisiinsolenna gorraanemmakiirinni shiyyemme, Mageno ege'nebaake bagedik shiyemeekiirinni moogemaan; bale buttati hunda wiiddake'n shooko oddo'winaan.

31 «Feri'oonninna isik lolink manni duuchchi insa'nee uundaa wodda isi wolaantichchik shiyemeeke ifke laakkossi bira sa'eeke lolinke manni duuchchixxee yaaddo waalle dayyeenfataan, hiyya'neen lumok Duuchchi Woddik Gootti. 32 He'nammaxxe butta'n manna culphisiissashsha eeti'i isi'a uwwoole midde, Feri'oonninna isik lumok sannachchi duuchchi wolaantichchik shiyemeekiirinni welti Mageno ege'nebaake mannixxe oddo'n moogemman; hiyya'neen Lumok Duuchchi Woddik Gootti» hiyye.