1 Ookkoneechchi uduma iikki manjichchi anee boroti darre'n wirri hiteexxe gatexxe galminxe hulaba illee iima iyyedage; hulatinna cufendemman. 2 Duuchchi Woddik Goottinna anee hiyyee qici: «Tinni hula cufendeeshshanni hexxaa malee'e banedaba'a; ayyinna isenaa'n e'yaba'a; Duuchchi Woddik Gootti Isira'eelik Mageni isenaa'n e'yemmaxxee cufendeeshshanni hexxa. 3 Ardink akeekisanji Duuchchi Woddik Gootti edo ito'a, eettene hulanaa'n e'yeexxi giddo offo'laak ison callan; isinna hulatixxe soroke oranaa'n eyammashshanni fulaabinna ookko'nidden.»

4 Ookkoneechchi uduma iikki manjichchi middi darrexxe galminxe hula'n anee iyyedage; aninna tami asse uudanno wodda Duuchchi Woddike Goottik ulfinni Duuchchi Woddike Goottika galama wo'mee'na'a afennexxi albik gonbisemenne.

5 Duuchchi Woddik Goottinna anee hiyyee qici: «Koo manjinke belto Duuchchi Woddike Goottike gamixxa aada uuddaaxxenni ate'n kulaanexxa duuchcha hubate uudi, dho'ote laqqi qalbeeffat; minika e'yinjonna galmiinxa hulaara hubbat. 6 Ookkone jallichcha Isira'eelike ardi'aa hitato qici: Lumok Duuchchi Woddik Gootti hiyya'ne'ni hitatto qici: ‹Koo Isira'eelike arda ha'noxxi diqachchisaxxi huje yoona gelte'e! 7 Tenne diqachisaaxxe ha'noxxe huje gadhi darre, ha'no ani'a ita, ha'yonna munde shiqishshinaa wodda qalbenna biso ifika jila ofo'lebaaka alaga anke galmi giddi'a e'yishshiyyoti galma anka battoossine kako anxanna diigine. 8 Ha'no ifi'anni woyyitte anxa aada hujinammaxxa bado wele manna anke galmi giddo baaloonsitine. 9 Lumok Duuchchi Woddik Gootti hiyya'nee qici: Qalbenna biso ifika jila ofo'lebaak, Isira'eelike ardi giddo hedheeke kadoolenna midde galma anka e'yoqqe.

10 « ‹Leewwito anee hordofatenaa'n bayyatee wodda, anenaa'ni bayyateexxi fakkuwwa hordoffa'n doonsakiyya hitammaxxe cubbo ifixxika hira adhdhitaan. 11 Insa'ne anke mini giddo ergatemat galma ankixxe hulla'ninna baaloomeexxi galmi giddo ani'a ergatema dandeenna; ciincatike tolchi'a dulleexxi arda ankee tolchati insa'ne edo uurine insa'ne'a ergatema dandeena. 12 Yaane kinni Leewito arda magenoonfatamaxxe fakkuwwa arda ergatendemaxxenna Isira'eelik ardi cubbote'n ibaashsha assitemaxxe, tennexxe hujjeexxe cubboka hira alfitaashsha anga ke'ise kakate'enen» hiyya'neen Lumok Duuchchi Woddik Gootti. 13 Qeesummatinna ani'a ergatemmo'a aniba'a shinqabaan; yookaan anxe woyyitte yaane duuchchiba'a, yookaan hara woyyichchake kadeeke anke tolchuwiba'a shinqabaan; ifixxe diqachchiisaaxxe hujeka shooko oddo'winaan. 14 Yaane kinni galmiinxa hujenna giddo hujendaaxxa huje duuchcha'n baaloomik ergatemmaashsha assannon.

15 « ‹Yaane kinni Isira'eelik ardi anka ora waale dedhake'n me'ee wodda, anke galmixxa huje addatenshati muunnxe'ek Leewwitotenaa'n Saadoqixxe horte anee ani edo shiqqeexxi ani'a ergatendaan; insa'nenna ani edo uurrineexxi ha'yokanna mundetika tolcha ani'a shiqinshaan; tenne haaso'ek Lumoke Duuchchi Woddike Goottan. 16 Insa'ne calli anke galma e'yinaan; insa'ne calli ani edo ergatemmo'a, aada anxanna muunxo'a anke tolchimalchibaa shinqaan.

17 « ‹Insa'ne giddi darrexxe wuddummexxe hula e'yinaa wodda, layinotixxa seemma oddo'wina; giddi darrexxe wuddummexxe huluwwaba galmi giddo ergatemmaa wodda gedhebinxe ordaxxa seemma oddo'winoqqe'e.✝ 18 Insa'ne layinoti umoke'n layinotixxe seemmaka ruufa mirqe'neexxi hidhake'ninna layinotika gonfa ka'linowaal; daffisaaxxa seemanna oddo'winoqqe'e. 19 Ardi hedheeba gadhixxe wuddummeba'a fullaa wodda, oddo'wine ergatemammaxxa seemma fulche'neexxi woyyitte kuta'ni uggine wele seemma oddo'wina; tinninna insa'ene arda ifixxe seemmanni woyyoonsinabashshaten*.✝

20 « ‹Qeesetinna umo haaxxitoqqe'e, yookaan nossexxoqqe'e; yaane kinn harunsexxe woxxexxowaal.✝ 21 Huuni qeesichchinna giddi darrexxe wuddummeba'a e'yaa wodda woyinetixxa booka ha'woqqe'e.✝ 22 Aro'i reyeexxa melaalle yookaan aro'ik weli tikke'eexxa melaalle aa'noqqe'e; yaane kinni Isira'eelitotika dubara yookaan qeesichchi aro'i reyeexxara melaalle aadha dandeena.✝ 23 Insa'ne woyyittenna woyyitte kaddebaaxxe yaanexxe oddo'n hexxeexxa gargarumma arda ankee barsinsaan; batto'ekanna batto'ebaaka hitta gargar hiissemaaxxa insa'ne'n leellinsha.✝

24 « ‹Heene weli gonphenna qeesoole yaane uudeexxi anke seerishsha murtowaal; anka ayyaanuwwa uudaxxenni anka seeranna anxa aada duuchcha he'qe'nowaal; anke edi sanbatixxa woyyummanna he'qe'nowaal.

25 « ‹Qeesichchi reyeeke manjike renshiba'a shiqiyyoti ifi battosoqe'e; kadomle kinni reyek manji annake yookaan amate, belto isike yookaan belto isixxe, dayyoke yookaan herundebaaxxe dayyo kaddo'ole ifi battoosa dande'aan.✝ 26 Battummatenaa'n ca'a hiyyechchi uduma torbaane barra turiyyo hasissa. 27 Galmi giddo ergatemo'a galminke giddi darrexxe wuddumeba'a e'yaaxxa barra, ifi'a cubbotika tolcha shiqishowaal; tenne'e haasoeek Lumoke Duuchchi Woddike Goottan.

28 « ‹Qeesetee ane callan insa'nek qadaad; Isira'eeli giddo insa'ne'a qadaada uutoxxe'e. Ani insa'neke qadaada kadannon.✝ 29 Insa'ne midhatixxa uwwa, cubbotixxanna balleessatixxa uwwa indaan; Isira'eelike boga'n Duuchchi Woddike Gootti'a uwwemeechchi duuchchi insa'neke kadaan.✝ 30 Umiinxe uwwaari giddii'n filendeexxa duuchchanna gargart hexxeexxi ha'noxxi uwwaari duuchchi qeesoletixxe kaddaan; atike mini hadi'a eebbate kaddo'a buttinakenaa'n alfitattoxxe ita duuchika umo insa'ne'a uwwi. 31 Qeese reyeeka yookaan biniinchi shiyeexxa ci'ate kaddo'o horiinka maala ittoqe'e.✝