1 Duuchchi Woddike Goottik hiyyichchi higge'n ane'n dageexxi, 2 «Koo manjiinke beltoo hibbo tenne'e Isira'eelike arda'n mammaasik, 3 Insa'ne'n hitatto qici: ‹Dada Duuchchik Duuchchi Woddik Gootti hiyya'nee qici, lumoka keelanna bisi isikixxi guchchenna taltalle calla kade'eek lumok sinbiri Libaanoosi dageexxi mitte birbirsiinxa qacce enqe aadhe, 4 qaccetenaa'ninna iimixxa reefixxa kichcho kute aadhe iyyemareexxi daddaltotike boga'n daddaltotike mitte qachchi giddo kaase.

5 « ‹Sinbir ikkinna Isira'eelike boganaa'n sanne aadheexxi shaqqake buttina'n gayaak wodde'e alfitaxxe bakka'n hokokotike haqichchishsha kaase. 6 Isenna lattee wodda hojja haru'meexxi dagale daaleeke woyyinetike hiddichcho kadde; damuwwa isixxinna sinbiri darre'n nophphite; hidduwwi isik kinni isinni hundi'a nophphe. Tennexxee woyyinetike hiddichcho kadeexxi damuwwatanna daddadhdhe shafuwwakanna fulche.

7 « ‹Iittanni lumoke keeluwwikinna biso isikixxi guchchenna taltalle calla kadeek weli lumook sinbiri hedhemman; iikki woyyinetik hiddichchi wode'e alfiyyotee kaasememmaxxe bakka'naa'n hidduwwa konne sinbiri darre'n yaase; damuwwatanna isi darre'n daalche. 8 Kunni woyyintik hiddichchi damuwwa daddadhaashsha, gumma gummisashshanna eloke woyyinteke hiddichcho kadaashsha geyaake wodi'i bira shaqake buttina'n kaasemeemman.›

9 «Innsa'ne'ni hitatto qici, ‹Lumok Duuchchi Woddik Gootti hiyya'neen hitatto qici: Kunni woyinetik hiddichchi abixaata? Goshemeexxi gumma harcaate'naa bagabaata? Kichchuwwa isixxi duuchchinna baggaan; iso'o hiddik goshiyyotee lumoxxi hunna yookaan heddi manni hasisabaan. 10 Wele bakka'n gosheme kaasemeele midde nophphaata? Boroti darree'n qilla gamoojjee'n gandaaxxi diidallo gandoole kaaseme hedhemmaba'a mitteshshumma bage gatabaata?› hiyya'neen.»

11 Ookkoneechchi uduma Duuchchi Woddik Goottik hiyyichchinna higge'n ane'n dageexxi: 12 «Konne jallichcha arda'n hitato qici, ‹Tenne yaanuwwaxxi tika maachcho kaddeexxa egendine'e?› Insa'ne'n hitato qici: ‹Baabiloonik moyanji Iyyerusaalemi mareexxi iseka moyanjonna iseka ja'laabuwwa booji'e insa'nee aadheexxi Baabilooni'a illeema hige. 13 Ookkoneechchi uduma Moyanjummatike mini hadinaa'n mitte aadheexxi isinni welti weli aage; isi'anna addatemeeke kadaashsha kakachchiise; bogiikinka akeekisanjuwwa booji'e adhdhe. 14 Tenneenna assechchi Yihudaxxi mootumma salphateexxi weli aaggo isixxa heqqexxa'n hexxaashshanna langaxxa nammi hitabaashsha assiyyoteetemman. 15 Yaane kinni haarok Yihudak moyanji iso'n ke'e; fadhadokanna heddo sannachcha alfiyyotee erganjuwwa ifika Gibtsee'a erge; tinni isi'a qajeeldaata? Iitta hexxeexxa yaane assek manji fulaata? Weli aago diigeek xixemebaak gataata?

16 « ‹Dhugaa ani hedhaanekixxa! Hiyya'een Lumok Duuchchi Woddike Gootti! Kunni moynji weli aago isixxa tufatemmakike, kako isixxa diigemmakikenna isoo moyaashsha assemmakike moyanjike boga'n Baabiloon reyaan. 17 Baabiloonk manni heddo lubbo biryotee qachcha qoqobe'e buttinna tullubaaxxanna kollo giissaaxxa yanna Feri'ooni ifike jajjabba sannachinninna heddo ifike loliinke manninni isoo lolik gargaara dande'abaan. 18 Kako diigiyyoti afo'o sa'emmaxxa yaane tuffatemmaxxenna anga uwweechchi uduma tenne duuchcha assemmaxxee fulabaan.

19 « ‹Tennexxee Lumok Duuchchi Woddik Gootti hiyya'nee qici: Ani hedhaaneke kadeneshanni! Anke summinni kakatemmaxxa kako tuffatee aagemmaxxa kako diigemmaxxee kako itti iso'ni geltaashsha assanon. 20 Fonxoro anxa isi'a fayyannon; fixi ankinna isoo abidaan; Baabilooninna isoo idagennexxi ane'n finqilemmaxxee ookko iso'n murannon. 21 Baajaak isik loliink manni duuchchirinna wolaantichchik shiyemaan; wele gateekaaranna ora ora'n xexeremaan; ookkone wodda ani Duuchchi Woddik Gootti haaso'eennexxa egendinaan.

22 « ‹Lumok Duuchchi Woddik Goottinna hiyya'nee qici: qeerrake birbissiixxe qaccenaa'n ani umo angenninni iimixxa reefixxa kichcho aadhennexxi isee kaasannon; eettene kichchuwwa giddi'ninna mitte kutennexxi hojja yo'oshsha qeerraxxe koobaxxe xungo'n isee kaasannon. 23 Yo'oshsha qeerraxxe Isira'eelixxe kooba hana isee kaasannon; isenna damuwwatanna daddadhittaan; gummatanna gummissaan; gurra fuleeke birbirsanna kaddaan; gargar gargar hexxeexxe sanne duuchchixxi ci'uwwanna ookko galdaan; damuwwa isixxike gaaddisi hundanna hafuura adhdhitaan. 24 Gongomiinka haqqichuwwa duuchcha, qeerraka haqichcho harunsannok, haru'meeka haqqichchonna qeerrisanok, ante Duuchchi Woddike Gootta kadennexxa ege'naan; ani haanjaka haqqichcho bassannok bageekanna haanjisannon.

« ‹Ani Duuchchi Woddik Gootti haaso'eennen; haaso'eennexxanna assannon.› »