1 Duuchchi Woddike Goottik hiyyichchi higgeen ane'n dageexxi, 2 «Koo manjiinke belto Iyyerusaalemi assiteexxa diqachchiissaaxxa huje ise'ninni kokeessi; 3 Lumok Duuchchi Woddik Goottinna Iyyerusaalemixxee hiyya'ne hitatto qici, ‹Hundaayye atixxinna ilendettebi Kenaanitotike boga'n, anni atiki Amooritote, ama atixxinna Hiititotemman. 4 Ilendettexxa barra ha'nurendebexxo; ca'a hitotta'anna wodi'ik anshendebexxo; maxinetinna dhidhibendebexxo; seemmatinna bukki assendebexxo. 5 O'wiinxe illenni atee uudeexxi yookaan ati'a yaadeexxi konneechchuwwinaa'n mittekanna midde ati'a asseek mitti manjinna hedhemmabaan; ilendettexxa barra tuffatendeetexxi diidake'n hunendette malee.

6 « ‹Aninna ookko'n sa'a'n ilendetteke gadabi giddo gangalataa'naa afenne; gadabi giddo hexxee'na'a ate'e «Lubbo gali» hiyyenne. 7 Fichchi giddixxe lattoshsha atee nophitattoshsha assenne; atinna nophphitette; danchootette; ununi atikinna guntute; umi atikinna nophphe; yaane kinni duwwi hexxetaan.

8 « ‹Langaxxa ati birii'n sa'anna wodda atibaa uudenne; halchematee gelteettexxa afenne wodda fuggateennaxxa seemmanni atee teele'e saala atika buqennexxi atee aadhona'a danchoossennexxi atinni weli aagenne, atinna anxe kaddette, tenne haaso'eek Duuchchi Woddike Gooottan.

9 « ‹Wodi'ik atee anshennexxi gadabokenaa'n luqqi assennexxi zayitetanna ate'n issenne. 10 Eloke kuulixxa qamise ate'n oddeessenne; yo'oshsha eloxxa goginxa kophe ate'n uggurenne; dancha layinotixxa boonde umo atike'n qaarenne; fiixxeeka kaabbanna ha'na lebe ate'n oddeessenne. 11 Seesuwwikinna atee danchoosenne: atixxe anga'n sageetto gooba atike'ninna uggeenne. 12 Sano atixxe'ninna sanotixxa qube, manshate'inna gutichcha umo atike'ninna biifaaka kallachcha uggenne. 13 Worqetinnaa birretike siblijinni danchoondette; seemma atixxinna biiffaxxa layino, haarretixxanna ganendeexxe kuula elokixxe seemmamman; atixxi itanna yo'oshsha eloxxa bulle, malebokenna ejersiinxe zayitemman; ati qubasaxxe danchoondette; mootitte kadateenna geltette. 14 Ani ati'a uwweneke gaachchanninaa'n kexxeexxinni danchumma atixxi qubasaxxeexxe kaddemmaxxee gosa gosake ardi giddo gurra fuldette, tennee haaso'eek Lumoke Duuchchi Woddike Goottan.

15 « ‹Yaane kinni ati danchumma atixxa addattette; gurra atikanna yabaabulletee la'onfattette; ora sa'aake duuchchinni yabaabula bira saxxette, danchumma atixxinna welekee hosse. 16 Seemmuwwa atixxenaa'n mitte mitte aaxxettexxi isenni atixxe magenoonfachchotixxa bakka danchoossite ookkonna yaababuldette; iitta hexxeexxi yaane konne edi darre kadde egendeba'a, edi'anna kaddaba'a. 17 Ati'a uwwennexxa anxe worqekanna anke birretike siblijuwwika elollamma seesuwwa aaxxettexxi labbakixxe misile'n fakke ifi'a giissexxe weltinna yabaabuldette. 18 Elolla kuuliixxa atixxa seemmuwwanna aaxxettexxi tenne misiluwwa'n buyyitette; anxa zayitenna anka hixaanna tenne misiluwwa edo shiqishshette. 19 Ittotta'a ati'a uwwennexxa ita, tinnirinna yo'oshsha eloxxa bulle, malebokanna ejersiinxa zayiteera, fishshake foolike hixaannishsha tenne misiluwwi'a shiqishshette; iitta hexxeexxe yaane assende'een; Lumok Duuchchi Woddik Gootti tenne haaso'edheen.

20 « ‹Ani'a ildettexxa labbaxxanna meyyaxxa oose aaxxettexxi itto'a tenne misiluwwa'a tolchitette; yababula atixxi shixxexxemaletee? 21 Oose anxaaranna duuldettexxi fakkuwwatee ciincessite shiqishitte. 22 Tenneera atixxe diqachchiissaaxxe hujuwwanninna atixxe yabaabulle duuchchanni ama atixxike godobinaa'n fuldeteshsha duwwi hexxe'e ilendeteke gadabi giddo gangallata'n hexxetta woddixxa atixxa oosummatixxa yanna qalli hitebexxo.

23 « ‹Lumok Duuchchi Woddik Gootti aanne'e! Aanne ati'a, hiyya'neen; assitettaxxe wele fuggo duuchchi hana lebbettexxi, 24 qephphichcha booncho ifi'a giissexxetexxi weldeenna weldeena'n magenoonfachchotika tullichcha giissitette. 25 Ora orike kurba'n fakkuwwa magenoonfachchotika qephphichcha boncho giissitette; ora sa'ake duuchchi'a biso atika uwwiyyoti yabaabulle birasa'issita'n danchumma atixxa battoossitette. 26 Yabaabulati kutegate'eke ola'a atike Gibtseeke manninni welti yabaabuldette; atixxe yabaabulaxxi birasa'ne mufatannoshsha assite. 27 Tennexxee anga anxa atee'n iimi'a adhdhee atike boginaa'n xe'ishenne; atike fuggoke adabixxee atixxe shooka'neexxe naapha atike Filisixeemixxe dubartexxe anga'n atee sa'isse uwwenne. 28 Ati ta'anna godda gophphettaxxee Asoorike manninninna yabaabuldette; ookkoneechchi udumanna midde godditebexxo. 29 Yabaabulle atixxanna Baabilooni daddaltuwwatike bogi qco'n birassa'isitette; kaddomalee ta'anna godditebexxo.

30 « ‹Ille inqaxxa itte'eexxi yabaabulto manjichcho assitaaxxa duuchcha assiteeten, hitta hexxeexxa gophaalette qalbe afeettexxe manjo ati! Hiyya'neen Lumok Duuchchi Woddik Gootti. 31 Ori orike gorsuma'n qephphicha boncho giissexxettexxi weldenna weldena'ninna tolchiinka boncho ijaartetten; kaddoolenna wele yabaabulto meelaalleshsha ate'n hedhemmakenaa'n maallaqa adhdhitebexxo.

32 « ‹Ati aro'o ifike'n hexxe'e wele labballinni hossammaxxe yabaabulto manjichchon! 33 Yabaabulto melaalle duuchchi isenni hosemmakenaa'n maallaqa adhdhita; ati kinni atee jaalateekeeri duuchi'a maallaqa giccato; ori orii'ni manji dageexxi atinni yabaabulo'a safatatixxa uwwa insa'ne'a uutatton. 34 Tennexxe'e atixxi yabaabulle wele dubartexxenaa'n gargar hexxeexxe; ate'ni hedho'a hasaak ayyinna atee ori'eexxi laqedhiyyo hassissaba'a; atete maallaqa uutato malee ati'a uwwemaba'a; ati wele yabaabulitto dubartexxenaa'n tenne yaanen haranga gargarite.

35 « ‹Tennexxe'e tee yabaabultoo! Duuchchi Woddik Goottika hiyyichcho laqi! 36 Lumok Duuchchi Woddik Gootti hiyya'nee qici: Kara atixxa dundettaxxee, atike jaaluwwinni yabaabuldetexxenna saala atika buqedha gophphettaxxee, atixxe diqachchiissaaxxe fakkuwwa duuchchixxeenna atixxe oosexxa munde tenne fakkuwwa'a tolchitettexxee, 37 tenne buuto'a jaaluwwa atika, itti gammaddatakaara, eetattakaaranna jibbitatakaara duuchcha bukki assannon; insa'ne'e ori ori'naa'n qarqara atike'n bukki assannon; insa'ne edonna atee duwwi gatiseena'a insa'ne saala atika duuchcha uundaan. 38 Yabaabulto mellale'ninna manjiinxa lubbo shilteexxe mellaale'n muremiyyo hassisaaxxa murte ani murte ate'n murannon; anxe aarenninna anxe hinaaffenni munde atixxa dune'e ate'n halo fulannon. 39 Jaaluwwa atikixxe anga'n atee sa'isse uwwanno; insa'nenna atika qephphichcha boonchuwwanna atika magenofachchotixxa bakkuwwa diingaan; seemmatanna atenaa'n mulqe'naan; dancha seessuwwa atikanna adhdhinaan, saalibelonna anga duwwi atee gatinsaan. 40 Insa'ne tuuta ate'n ke'issinaan; tuutatinna kinjikinna atee cancanqaan; wolantichchikinna atee kukkuntaan. 41 Minuwwa atikanna gunbaan; heddo melaalle edonna ate'e mura woxxinsaan; yabaabulle atixxa waaldattoshsha assanno, ta'anni edi'aa ani yabaabuldota'a jaaluwwa atikee maallakqa uutabexxon. 42 Ookkoneechhchi uduma aare anxi atenaa'n qiiddaan; hinaaffe anxenni ate'n mufatabe'no; aare anxanna qiidifatanon; ta'anni edi'anna ate'n mufatabe'non.

43 « ‹Ati tenne yaanuwwan anee mufachchiisette malee atika oosummatika baro qaabatebexxon; tennexxee huje atixxika hira ati'a uwwannon; hiyya'neen Lumok Duuchchi Woddik Gootti; wele atixxe diqachchiissaaxxe huje hana yabaabulle lebbe'ebexxoota?

44 « ‹Mammaakaaki duuchchinna: «Belto amande'n fulda» hiyya'n atixxee mammakaan. 45 Ati aro'o ifikanna oose ifixxa diqattammaxxe atixxe ama'ninni fuldette; ati aro'o ifikanna oose ifixxa tuffatamaxxe atixxe dayyuwa'inni fuldette; anni ha'nok Keexichchoke ama ha'noxxinna Amoorichchotemman. 46 Atixxi angafa dayyo atenaa'n middi darre'n ifixxe meyyaxxe oosenn hexxa'neexxe Semaariyate; atixxi maa'na dayyonna atenaa'n bitta'i darre'n ifixxe meyyaxxe oosenni hexxa'neexxe Soodoomite. 47 Ati insa'neka ora me'anna insa'nexxa diqachchiissaaxxa huje assa calla kaddebaak ikki woddi elobaake adabinni insa'nee caaldetexxe kaddette. 48 Ane'e hedhaaneke Dada Duuchchike Duuchchi Woddike Goottixxa, atinna oose atixxi meyyaxxi assitteexxa dayyo atixxi Soodoominna isexxi mayyaxxi oose midde assiteba'a.

49 « ‹Dayyo atixxe Soodoomi assita'emmaxxi cubbo: isenna isexxi mayyaxxi oose ifi duka, godoba eeneshsha goddanna fedhe galatemman; isenna hiyyeeyyetanna rakkiyye gargaratemmaba'n. 50 Insa'nee hollameyyetamman; ani edonna diqachchiissaxxa yaane assineexxa afennexxi ifi edi'n insa'ne fuggussenne. 51 Semaariya ati hujjettexxe cubboka gamisa midde hujjebaan; ati insa'ne caala hara diqachchiisseexxa yaane assiyyot, tenne huje duuchchinni dayyuwwa atixxa qulliyyete labbaashsha assitette. 52 Dayyuwwa atixxi qulliyyete lanbaashsha assitettexxe shookko oddo'wi, cubbo atixxi insa'nexxenaa'n hara diqachchiissaxxe kaddemmaxxe'e insa'ne ati caala qulliyyete lanbe; tennexxee dayyuwwa atixxa qulliyyete lambaashsha assitettexxee shooko oddo'wi.

53 « ‹Yaane kinni Soodoomixxenna isexxe meyyaxxe oosexxa, ittanni Samaariyaaxxenna isexxe meyyaxxe oosexxa booji'o hissannon; atixxa booji'onna insa'nexxa hiissanno wodda hiissannon. 54 Tinni iitta kaddaachchi ati assitettexxe huje duuchchanni insa'ne baseefantake kandaashsha assitettaxxe'e salphattattoshshanna assitettexxe duuchcha'n shookkattoshshaten. 55 Atixxi dayyuwwa Soodoomi'ninna isexxi meyyaxxe oose'n, ittanni Semaariya'ninna isexxe meyyaxxe oose'n edi wodda he'nemaxxe jiroba'a insa'ne'n higgaan; ate'ninna atixxe meyyaxxe oose'n edi wodda hexxinemmaxxe jiro'n ha'no higginaan. 56 Ifi dukaattaka sane dayyo atixxe Soodoomika summa midde afo'o atikenni tuqqa'atabaan. 57 Iikki woddinna cubbo atixxi farri hite leellitebaa edi darremman. Ta'a kinni atike qarqara'n hexxe'e atee tuffataaxxe Edoomixxe* meyyaxxe oose'anna isek olla'uwwi duuchchi'a, iittaanni Filisixeemixxe meyyaxxe oose'a Sodomishsha gacifachchotixxe kaddeeten. 58 Atixxe yabaabullexxeenna atixxe diqachchiissaaxxe hujexxee xixendatton; hiyya'neen Duuchchi Woddike Gootti.

59 «‹Lomok Duuchchi Woddik Gootti hiyya'enee qici: Kako anxa diigati afo'o sa'a anxa tuffatettexxee ate'e geyaaka xixichcho xixannon. 60 Kaddo malee oosumma atixxi wodda ati'a aagennexxa kako qaabatannon; duuchchi woddi'anna hexxaaxxa kako ati'a aagannon. 61 Ati'a angaffaaxxaranna ati'a maa'nitaaxxa atixxa dayyuwwara ati'a meyyaxxe oose kandaashsha uwwano wodda, ati me'injo atika qalli hitettexxi shookkatton; tinni kaddaak kinni ati'a aagennaxxe anxe kakoxxeetebaan. 62 Tennexxee ati'a aagennexxa kako anxa qamalchannon; hiyya'neen Duuchchi Woddiki Gootti; ookkone wodda ani Duuchchi Woddike Gootta kadennexxa egendatton. 63 Assitettexxe duuchchi'a ati'a gattowaal hiyyano wodda balleessa ifixxa qalli hitettexxi shookkatton; salphphine atikenaa'ninna kexxeexxa mittelchonna buccuqqi hitabexxo; tenne haaso'eek Lumoke Duuchchi Woddike Goottan.› »