1 «Koo manjike belto Isira'eelixxe koobuwa'a raaga raagi; hitatto qici, ‹Tee Isira'elixxe koobuwwa Duuchchi Woddike Goottika hiyyichcho laqqe. 2 Lumok Duuchchi Woddiki Gootti hiyya'nee qici: Naaphi ha'noxxee, «Hashshuu! Tinni olmixxi gooruwwa no'oke geego kade'een hiyye'een.» › 3 Tennexxee raaga hite raagatto qici, ‹Lumok Duuchchi Woddiki Gootti hiyya'nee qici: tee Isira'elixxe koobuwwa gateeki gosa gosake ardi bogi duuchchi ha'noke geegon kaddeeshshanna ardi ha'no hamata'n qacifatashsha naaphi elqenna kayyi'ni ha'noo bunqe lole urmake asseen. 4 Tennexxee tee Isira'eelixxe koobuwwa, lumoke Duuchchi Woddike Goottika hiyyichcho caqasse: lumok Duuchchi Woddik Gootti koobuwwatenna tullichchuwwake, dareeruwwakenna dhooquwwate, findigeme uruma kadeekenna wele qarqara ha'noke'ni hedheeke gosa gosake ardi mulqedhe qacifateke qachchuwwa'n hiyya'nee qici, 5 Lumok Duuchchi Woddik Goottinna jabaxxe anxe hinaafenni gateeke gosa gosake arda duuchcha'ninna Eedoomike arda duuchcha'n haaso'ennen; insa'ne godobi mittinni gammandenna haranga cee'mine anka boga hunnati ifi'a adhine ifike horike allaletike boga asse'ne.› 6 Tennexxee Isira'eelika boga uudaaxxinni raaga raage'e, tullichchuwwakee, wodi'inke yaasumuwanna dhooquwwatee, hitatto qici: ‹Lumok Duuchchi Woddiki Goottinna hiyya'nee qici: gosa gosake ardixxe qacififachonni bajabaja hitinemmaxxee anxe mufenninna anxe hinaafenni haaso'aannen. 7 Tennexxee Lumok Duuchchi Woddik Gootti hiyya'nee qici: qarqara ha'noke'n hedheeki gosa gosak ardinna ifi'anni salphataxxa jabeese kakataannen.

8 « ‹Insa'ne ta'a shiqonni ifigge bogiba'a illeema hinga'emmaxxee tee Isira'eelixxe koobuwwa, ha'no haqichchuwwi anka arda Isira'eeli'a dame daddadhaan; gummatanna gummisaan. 9 Tee Isira'elixxe koobuwwa ani ha'no'a xexe'ata'ennen; eloxxen ha'no'o uudannon; ha'no hunjendinaa'n midha ha'non facaasendaan. 10 Isira'eelike mannik laakkossi ha'no'n bira sa'issanonn. Qachchuwwake'n manji hedhaan; findigemeenk qachchuwwinna ijaremaan. 11 Ha'no'ni manjinkanna horinka laakkossa bira sa'issannon; horashsha assannon; edi woddishshanni manni ha'no giddo hedhaashshanna edi irra duroomaashsha assannon. Ookko'ni ani Duuchchi Woddike Gootta kadennexxa egendinaan. 12 Anka arda Isira'eeli ha'no giddo mammaremmashsha assannon; ha'no dhaalaani; ha'nonna geego insa'neke kaddinaan; ta'inni edi'a oose insa'nexxi ha'no hana langaxxa solo'ik midhendaba'a.

13 « ‹Lumok Duuchchi Woddiki Gootti hiyya'nee qici: ardikinna ha'noxxee, «Gossa gosa ardi ha'no'o Isira'eelixxi koobuwwa manjo birtaaxxen; ookko hedaaka ardakanna oose belo gatinsaan,» hinemaxxee, 14 Tee Isira'eelixxe Koobuwwa ha'no ta'inni edi'a manjo birtinabaan; ookko hedhaaka ardanna oose belo gatissinabaan; tenne haaso'ennek ante Lumoke Duuchchi Woddik Gootti. 15 Ta'inni udumi'a gosa gosak ardika yowwichcho wila laqinabaashsha assannon; ardinke yowwichchinni laalefatina'ni hexxinabaan; konnechchinni edi'a ha'no hana hedhaake ardi'a gufo kadinabaan; tenne haaso'enek ante Lumoke Duuchchi Woddik Goottan.› »

16 Duuchchi Woddike Goottik hiyyichchi higgeen ane'ni dage hiyyee qici: 17 «Koo manjinke belto Isira'eeliki ardi ifike boga'n hedhamma wodda hujetinna galdumik boga ookkone'e battessemman; adabi insa'nekinna ani edo, meyyaxxi agenjiixxi aada dagamma wodda battottammashshandemman. 18 Tennexxee ifike boga'n munde dunnemmaxxenna fakkuwwa insa'nexxe'ni battesinemmaxxe'e anxe mufenni insa'nee ganenne. 19 Gosa gosake ardi giddo insa'ne xeernneni; insa'nenna boga duuchcha'ni xexxereme; adabi insa'nekishshanna huje insa'nexxeke hirishanni insa'ne'a murennen. 20 Ardi duuchchi ha'no, ‹Kunni Duuchchi Woddike Goottik ardan kinni isike boganaa'n fuleeke› hiyya'n haaso'emmaxxe martine geltine boncho duuchcha'n gosa gosake ardi giddo woyyichcha anka summa battoossine. 21 Isira'eelik ardi mareeba duuchcha gosa gosake ardi giddo woyyichcha summa anka batto'aashsha assine; anik kinni summa anke xexe'atannon.

22 «Tennexxee Isira'eelike arda'n hitatto qici, ‹Lumok Duuchchi Woddiki Gootti koo Isira'eelike arda tenne duuchcha assannok ha'noxxeete kaddebaak, martinge gosa gosake ardi giddo bottoossitinemmake woyyichcha anke summixeteen. 23 Gosa gosake ardi giddo batto'eeka, ha'no insa'ne edo battonsitineeka, lumoke anke summika woyyooma leellishannon; ookko'ni ille insa'nexxi uuda'naani ha'no darree'ni ifi woyyonse ege'nishanno wodda, gosa gosak ardinna ani Duuchchi Woddike Gootta kadennexxa egennaan; hiyya'neenni Lumok Duuchchi Woddiki Gootti.

24 « ‹Gosa gosake ardi giddi'ni ha'no'o fulchannon; boga duuchchinaa'ni ha'noo bukki assannon; ha'noge bogiba'a wirri asse idagannon. 25 Ca'ichcha wode'e ha'no'ni fixannon; ha'nonna ca'a hitinaan; battummatena'ninna magenonfatinammaxxe ha'nooxxe fakkuwwa duuchchanaa'ni qullonsannon. 26 Haaroxxa qalbe ha'no'a uwwannon; haaroka hafuura ha'no giddo uggannon; kinjiinxa qalbe ha'nona'ni hoyyannon; shaqqaxxa qalbe ha'no'a uwwannon. 27 Hafuura anka ha'no giddo uggannon; aada anxa hordofinashshanna seera anka xonxommatina'ni heqqexxinaashsha assannoni. 28 Edike ha'noke annuwwi'a uwwennake bogiba hexxinaan; anke ardanna kaddinaan; Aninna Mageno ha'noke kadannon. 29 Battumma ha'no duuchchinaa'n hoyyee ha'noo anjirannon; midha missaashsha ajajannon; solo'okanna ha'no'ni idagabo'no. 30 Solo'okenaa'ni kexxeexxa gosa gosake ardi giddo salphatinabaashsha, hiddichchii fichchixxi gummanna midha missashsha assannon. 31 Ookko'n elobaaka ora ha'nokanna battitte huje ha'nooxixxa qabatinaan; cubbo ha'nooxxena battite ha'noxe hujexee ifinni diqatinaan. 32 Ani tenne'e assa'ennek ha'noxxe hiyyeete kaddebaaxxa tenne egendino'a hasaannen; koo Isira'eelike arda huje ha'noxxee shookkine ifi salphisse; hiyya'neen Lumok Duuchchi Woddik Gootti.

33 « ‹Lumoki Duuchchi Woddiki Goottinna: ani cubbo ha'noxxe duuchchanaa'ni ha'noo ca'a assannoxxa barra, qachchuwwa ha'noka haaroba manji giddo hedhaake assanno. Diigememmakiirinna qammalchemaan. 34 Alallenna adadde uuda'ni sa'ammake manji duuchchixxe ille'ni urma boga huyyememmak hujemaan. 35 Insa'nenna, «Urme'emmak kunni bogi Edeenike hiddichchuwwinke boga labe: findigememmak olete kade'emmak, urma kademmak qachchuwwi ta'a jabake kinjike dalla'ike manji hedhaake kadde'een» hinaan. 36 Ookko'ni qarqara ha'noke'ni gateemmak gosa gosak manni diigememmaka hiisse ijarennexxa, banxo'e ba'emmaka haanjisennek Ante Duuchchi Woddike Gootta kadennexxa egennaan. Ani Duuchchi Woddik Gootti tenne haaso'ennen: Aninni muuxannon.›

37 «Lumok Duuchchi Woddiki Gootti hiyya'nee qici: Isra'eelike arda gargaarannoshsha haroba Isira'eelike arda'n hassemannon; arda insa'nekanna gedhebiinsha horoba assannon. 38 Ayyaaniixxa barra Iyyerusaalemi tolchake shiqammake gedhebinni wo'mitammashsha kunni diigemeek qachchuwwi ardik wo'maan. Yoona! Diigememmak qachchuwwi heddi mannike galduma kadaan: Ookko'ni ani Duuchchi Woddike Gootta kadeneexxa insa'nenna egennaan.»