1 «Koo manjiinke belto qaraka wolaantichcha aaxxettexxi areediinxe haadoshsha umo atikkanna areeda atika haaxxi; atike umika ordichcho kiilote'n kiildee sasebaa qoodi. 2 Atixxi buqatixxi yanna muuxendaa wodda umiinxe sakkaxxe anganaa'ni mitte giissiteteka Iyyerusaalemike qachchikee kaarti giddo gubi; langaxxa anga qachchiinke kartinke qarqara duuchcha'n wolaantichchik kami; gateemmaxxa sakkaxxa anga diidallo adhdhite me'ito'a xeeri; aninna wolaantichchik insa'ne'ee shorrannon. 3 Iitanni umiinke ordichchonaa'n shiixxoka aaxxettexxi seemma atixxike kasa'n gudunfi. 4 Higgeenna ookkonenaa'n shiixxoka aaxxettexxi giirati giddo uggite gubi; giirattinna ookkoo'n kexxeexxi Isira'eelike ardi duuchchibaa geltaan.

5 «Lumok Duuchchi Woddik Gootti hiyya'nee qici: Gosa gosake ardixxe oddo'ni ofo'lshineexxi boga duuchcha qarqara iseke duuchcha'n uggeennexxi Iyyerusaalemi tenneten. 6 Yaane kinni ise seera anke'ninna aada anxe'ni jallatte; qarqara iseke'n hedheeke gosa gosake bogike ardi caala fuggo me'ite; tinninna seera anke'ni jalateemmaxxeenna aada anxa hordofa gibbeemmaxxeeten.

7 «Tennexxee Lumok Duuchchi Woddik Gootti hiyya'nee qici: Qarqara ha'nooke'ni hedheeke gosa gosake ardi caala seeri gadho galdine'een; aada anxanna hordofinebaan; seera ankeenna ajajendinebaan; qarqara ha'nooke'ni hedheek gosa gosak ardi heqqedheeka seera midde heqqexxinebaan.

8 «Tennexxee Lumok Duuchchi Woddik Gootti hiyya'nee qici: Kunnise ani umi angenninni atee Iyyerusaalemi'ni ke'eennen; gosa gosake ardi edonna murte ate'ni murannon. 9 Diqachchiisa'neexxe atixxe magenooffachchoxxe buuto'a konneechchi edo ate'ni assebe'noxxa, konneechchinni udumi'anna assabe'noxxa ate'ni assannon. 10 Tennexxee Iyyerusaalemi giddo annuwwi oose ifixxa oosetinna annuwwa ifika ittaan; konnee qicinni duuchchinge'ni murannon; gateeka manna boga duuchcha'ni xeerannon.✝ 11 Tennexxee Lumok Duuchchi Woddik Gootti hiyya'nee qici: dhugaandinni ani duuchchi wodda hedha anixxe'ni kakataannen; galma anka battoossitineemmaxxe fakkuwwa'ninna diqachchiisaaxxe ha'nooxxe huje duuchchanni battoossitineemmaxxee ha'no'o cire'e birannon; ha'noo'a o'wabe'no yookaan ha'noobaa higabe'no. 12 Ardi atik sase angannaa'ni mitte anga dhukkubik reyaan; ati giddonna solo'ik mudaan; mitte langaxxi anga atike dalla'i gadhi darre wolaantichchoke'ni ibbaan; gateexxa mitte sakkaxxa anga kinni boga duuchcha'ni xeerannon; dobemeeke wolaatichchinninna insa'nee shorrannon.

13 «Ookkoneechchi uduma mufe anxi qiidaan; insa'ne'ni iyyedagennexxi anxi bala illeema higgaan; halo insa'ne'n fulanno wodda habushshi hiyyannon; insa'ne'ni bala anxa ibisenneelchi uduma ani Duuchchi Woddik Gootti hinaaffet haaso'ennexxa egenaan.

14 «Qarqara ha'nooke'n hedheeke gosa gosake ardixxe oddo'ni ha'no birii'n elqe kayya sa'aak duuchchi edo onakenna oso'lchiinke assannon. 15 Mufetinna balati iittanni jabake xixichchinni ha'noo'n muranno wodda qarqara ha'nooke'ni gosa gosake arda'ni oso'lendineekenna gacifatematike, xexxe'achchiisatikenna alayyiinke beessisa kaddinaan; ani Duuchchi Woddik Gootti tennee haaso'eennen. 16 Gabetishsha shiyaaka solo'o ha'noo'n idaganeelchi ha'no'o balleessona'aten; Solo'ong'ni hana solo'o ha'noo'ni iyyedagannon; midha daggabaa'ninna gattaasha assannon. 17 Solo'okanna biniichcha ha'noo'ni ergee'naa oosebelo gattinaan; dhukkubikinna mundetixxi dunema ha'noo giddo bira saxxaan; bagedo ha'noo'ni iyyedaggannon; ani Duuchchi Woddike Goottti haaso'eennen.»✝