1 Duuchchi Woddike Gootik hiyyichchi aniba'a dage hiyyee qici 2 «Koo manjinke belto, ille atixxa Googi'ninna Maagogike boga'ni hedheeke Meesheekikininna tubbalike umo akeekisanjo'n Goggi'n: iso'ninna raaga raagi;✝ 3 Hitatto qici; Dada Duuchchiki Duuchchi Woddik Gootti hiyya'nee qici; ‹Koo, Moosahina Tubbalike umo akeekisanjo Googi ani ate'n ke'ennen. 4 Ani ate'e udumi'a hiisannon, qeqqeshsha atike'ninna lugaama uggennexxi heddi sannachchinni welti, fadhaduwwa atika, fadhado qolchakaara, lolinka miya ba'edheeraraa, lumokanna shiixoka wonte abixeekaara, wolantichcha fi'weka duuchchinga fulchannon. 5 Wonte abixeekaaranna umoke'n gulle uggu'dheeka duuchcha, Faarsi, Tophiyinna Fuuxxi insa'neni welti he'nann. 6 Higgeen Goomeri'a lolinke sannachchi insa'nekinni welti, Beti Togaarmake qachchik middike sannachchinni welti hedhexxexxe heddo gosa gosaka arda atinni welti fulchannon.

7 « ‹Atinna qarqara atike'ni bukki hiyyeki duuchchi ke'we: qophpheefatte; atinna insa'neke akeekisanjo kadi. 8 Heddo barra uduma lolake'e ye'endatton. Udumike baro'ni lolakenaa'n hafuura adhdhiteexxe, iseke gosa gosake heddi ardi giddii'ni fuleexxi, heddo yanna'a ona kaddemmake Isira'eelixe kooba'ni hana bukki hiyyeke ardike bogiba'a daganno. Insa'ne heddo gosa gosake ardi giddii'ni fulle kunni duuching ta'a nage'ik he'na'neen. 9 Atinna atik lolink manni duuchchi atinni welti hedheeki heddi gosa gosak ardi danbala'insha dagaan; duumanchiishshanna boga buqqinaan.

10 « ‹Lumok Duuchchi Woddik Goottinna eettene barra hedumi ate'ni qalbete'ni dagaan; fuggo yaane assatee heddatton. 11 Atinna; «Dalla'a afebaaka qachchuwwike bogi'a dagannon: duuchching dalla'i belo, cufani belonna sibiljinke danqarsanji belo hedha'neka, nage'inkanna soda'a belo hedheeka arda lolannon: 12 Edi wodda urmake kedemmake qachchuwwa'n hedheeka, gosa gosake ardi giddii'ni bukki hiyye'eka, horkinna gargar hedheeke miyinni duromeeka buttatixxe ha'nurake bogi giddo hedheka arda lolannon, booji'annon mulqedhannon» hittatton. 13 Saabanna Dedaani, Terseesixxi daddalisanonna olla'uwwik qachchuwwi duuchchi ate'e hiyyaa qici, «Mulqitotta'a daggete? Boojitotta'a sannachcha bukki assexxeette, worqenna sibljo birre, hore, daddalatika miyuwwa gudhdhite me'itota'a, heddolchcho bojitotaate?» › hiyye.

14 «Tennexxee koo manjinke belto, raaga raagi: Googinna hitatto qici, ‹Dadada Duuchchik Duuchchi Woddik Goottinna eettene barra Isira'eelik anki ardi nage'ik ofo'leexxa egendeboxxo? 15 Middi darree'n bayya hedheeke boonchonaa'n daggatton: atinna atinni welti heddi gosa gosak ardi jabak hunnaameesi sannachchi duuchching fadhado gulufinne dagginaan. 16 Duumanchi boga buqqammashsha arda anke Isira'eeli'ni bobbatatton. Koo Googi insa'ne edii'ni woyyumma anxa leellishanno wodda gosa gosak ardi ane'e ege'naashsha udumike baro'ni boga anke'ni atee idaganon.

17 « ‹Dada Duuchchik Duuchchi Woddik Goottinna edike baro'ni garboole anxe Isira'eelixxi wabeekko haasonaki ikki manjichchi atendemmabaataa? Eettene yanna'ni atee insa'ne'ni ergaaxxa heddo wogga wabeekumma haasonnene. 18 Eettene yanna'ni, Googi Isira'eelika boga lollaa wodda, jabaxxi anxi mufenna kexxaan hiyya'neeni lumok Duuchchi Woddik Gootti. 19 Eettene yanna'ni hinaaffe anixxenna mufe anxenni Isira'eeli'n jabaxxi buttiniinxi lele'ma kaddaan hiyyee haaso'ennan. 20 Abbayya giddixxi quluxu'muwwa, iimatixxi ci'uwwa, bogi giddo hedheek biniichuwwinna hori, butta harkisenda'nexxi daduwwa, iittanni buttate'n hedheek manji duuchchi ani edo culphisaan koobuwwa fottoqqaan bowa'uwwikinna tigaan; kinjik dalla'uwwi duuchinna fottoqaan. 21 Koobuwwa anxe duuchcha'ni Googi'n wolaantichcha ergannon; hiyya'neen lumok Duuchchi Woddik Gootti; mitti mittinge manjik wolaantichchi dayyo ifinge itaan. 22 Shiyaaka dhukuba idagatinna munde dhangalaasati iso'ni murannon; jabaka xeena, kaadetanna giiratishsha ha'itaaxxa dinne* iso'ninna lolinke sannachcha isike'ni, ittanni isinni welti hehdeeke gosa gosatike arda'ni ibisannon. 23 Ookko'o lumminne ankanna woyyumma anxa leellishannon; heddo gosa gosake ardi edo ifi ege'nishannon; ooko'ninna Ani Duuchchi Woddike Gootta kadennexxa egennaan› hiyye.