1 Duuchchi Woddike Goottik hiyyichchi aniba dage hiyyee qici: 2 «Koo manjiinke belto hita'n raaga raagatto qici: Lumok Duuchchi Woddik Gootti hiyya'nee qici:

« ‹Woo woo! Hiyyi, hitatto qici,

«Aanne eettene barra'a!»

3 Barra shiqqe'een,

Duuchchi Woddike Goottixxi barra shiqoten

Iitti duumanchiinxi barra gosa gosake ardi'a ba'netixxe yannan.

4 Gibtsee'n bagedi dagaan;

Tophiyikinna weekemaan.

Manni Gibtsee giddo shiyemaa wodda

qabeenni isekinna adhdhema;

booso isexxinna digendaan.

5 Tophiyikinna Fuuxxi, Lidiyaanna Arabi'a duuchcha, Libiyaanna kakotike bogik ardi Gibtsenni welti mitteba bagedoke'n mundaan.

6 « ‹Duuchchi Woddik Gootti hiyya'nee qici:

« ‹Gibtsee kiphammakiir mudaan.

Isee hollissaammaxxi isexxi hunna gopha'n daggan.

Migidoolii'n Asiwaani qico'n

ise giddo manni shiyemaan;

tenne haaso'eek Lumoke Duuchchi Woddike Goottan.

7 « ‹Gibtsek urumi boguwwi

caala urmake kadaan;

Qachchuwwi isekinna,

findigememmake qachchuwwishsha findigemaan.

8 Ookkoneechchi uduma insa'ne Gibtsee'ni giira ha'ishanno wodda,

isee gargarammak duuchchi hunna enqema,

eettenne yanna ani Duuchchi Woddike Gootta kadennexxa egenaan.

9 « ‹Eettene barra anki erganjuwwi lumoxxe hobolonni marreexxi soda'a belo hedheeka Tophiiyaa sodaachchisaan. Gibtsee'a dukkanate kaddaaxxa barra Tophiyi wixixxi hiyyaa; iitti barra daggaaxxi kokaken.

10 « ‹Dada Duuchchak Duuchchi Woddik Gootti hiyya'nee qici:

« ‹Baabiloonike moyanjo Naabukadanatsoorxe anganni,

laakkossi bira sa'eeka Gibtseeka arda birannon.

11 Gosa gosake ardi duuchchanaa'n hara godoba jabake kande'eek Nabukanatsoorinna isik loliink manni

boga balleessatee dangaashsha assannon;

Wolaantichcha insa'nenna Gibtsee'n gorshe'naan

bogake'n renshi wo'mashsha assina.

12 Aninna abbayike gaalanika yaasumuwwa bassennexxi;

bogakanna fuggaaleeyye mannixxe anga'n sa'isannon;

Alagiinxe anganni,

ise giddo hedheechcho duuchcha birennexxi boga urmake assannon;

Ani Duuchchi Woddik Gootti tennee haaso'ennen.

13 « ‹Dada Duuchchik Duuchchi Woddik Gootti hiyya'nee qici:

« ‹Fakkuwwa balleesannon;

Memifsite hexxeexxa misluwwanna hexxemmabaashsha assannon.

Ta'anni edi'a Gibtsee galchaak hedhaba'a;

bogake'ninna soda'a ibisannon.

14 Phaxxiroosi'i urmake assannon;

Xaaniwoosi'ni giira ha'ishannon;

Teebisiinna xixannon.

15 Gibtsee kollifachcho kadde'eeke

Siinike qachcha mufe anxenni ganannon;

Laakkossi bira sa'eka Teebisika arda birannon.

16 Gibtsee'n giira ha'ishannon;

Siinik qachchinna wixixxi hiyya;

Teebisike qachchik dalla'i digemaan;

Memifisike qachcha'n urritabaaxxe wixxixxi geltaan.

17 Heliyootuke qachchixxinna Bubaasitukixxi dargageeyye,

bagedoke'n muddaani;

konne qachchuwwik manninna booji'eme adhdhemaan.

18 Gibtseexxe galcha gatisannoxxa yanna

Xaafinaasike qachcha'n barrandi haashshate kadda;

ookkonechchi uduma ise hollisammaxxi isexxi hunna baxxaan.

Duumanchikinna isee buqaan;

iseke qarqarik olla'uwwi booje'eme adhdhemaan.

19 Konne qicinni ani Gibtsee xixannon;

insa'nenna ani Lumoke Duuchchi Woddike Gootta kadennexxa egenaan.› »

20 Boji'emmennexxe tommenna mittixxe woga'n, siretike agenjixxe torbeesooxxe barra'n, Duuchchi Woddike Goottiki hiyyichchi higgeen ane'ni dageexxi, 21 «Koo manjiinke belto, Gibtseeke moyanjo Feri'oonixxa hiirre enqeenneni; fayyito'anna ayyinna isee usueraba'a; jabate bagedo abidashshanna leemmik xaasseendeba'a. 22 Tennexxee Dada Duuchchik Duuchchi Woddiki Gootti hiyya'nee qici: Gibtseeke moyanjo Feri'ooni'ni ke'ene; fayya hexxemmaxxanna enqendemmaxxa isixxa laminxa hirre enqannexxi bagedikinna anga isixenaa'n ibaashsha assannon. 23 Aninna Gibtseeka arda gosa gosake ardi giddo xeelagannon; boga boga'nini insa'ne xeerannon. 24 Babilonke moyanjixxa hirre jabeesannoni; bagedo ankanna abixxaashsha assanno; Feri'oonixxa hirre enqena'a isi fuggo mado'eke manjishsha Baabiloonike moyanji edo o'aan. 25 Baabiloonike moyanjixxa hirre jabeesannoni; Feri'oonixxa hirre kinni gophisannon; bagedo anka Babiloonik moyanji abixxashsha asse'naa isinna Feri'ooni'i Gibtseeka moyanjo Gibtseeke boga'n lolaa wodda, insa'nenna ookkone wodda ani Duuchchi Woddike Gootta kadennexxa egenaan. 26 Aninna Gibtseeka arda gosa gosake ardi giddo xeelaganno; boga boga'ninni insa'ne xeeranno; ookonechchi uduma ani Duuchchi Woddike Gootta kadennexxa egenaan.»