1 Duuchchi Woddike Goottik hiyyichchi ane'n dageexxi: 2 «Koo manjiinke belto mitte amanaa'n ilendeexxi lame dubarte hexxemman. 3 Insa'nenna ka'umumma he'nemma wodda Gibtsee yabaabulletee qii'misseexxi yabaabulle; ookkone boga'ni guntuti insa'nek qaqqabeme; ookkonna dubarummatixxi insa'nexxi bobanna hanqalfende. 4 Angaffatik summi Ohoola, isixxe dayyotik summinna Ohoolibatemmani; insa'ne lamiing anke kande; labbaxxanna meyyaxxa oose ani'a ille. Ohoolak summi Semaariyate, Ohoolibakinna Iyyerusaalemite.

5 «Ohoola anxe kaddeenni hexxeexxi yabaabulati qii'misse; ise jaalateeke Asooritotike loliinke manninni yabaabulde. 6 Insa'ne yo'oshsha biifonsitaxxa baddeessite seemma odo'winammake, galchalluwwakenna ajajaluwwake, duuchchiingi danchallamma dargaggeeyyenna fadhado gulufe'emmakeeramman. 7 Isenna gurrafule'eeke Asoorik manni duuchchinni yababulletee ifi sa'issite uute; welti yabaabuldemmake mannixxe fakkuwwa duuchchinninna ifi battoossite. 8 Gibtsee saffemmaxxa yaabaabulle waaldebaan; ookkoo oosumat hexxemma wodda labballi isenni welti diiphe; dubarrummatika iseka guntuttanna qaqqabe; yabaabbulle ifixxanna ise'n bidhine.

9 «Tennexxe'e welti yababuldemmake iseka jaaluwwa'n, halchitemmake Asoorike mannixxe anga'n isee sa'isse uwwenne. 10 Insa'nenna isee saalibelo gatinse; labbaxxanna meyyaxxa isexxa oose adhdhine; wolaantichchikinna isee shinne; melaalle duucha'ninna mammaasiinxe kadde; xixichchikinna ise'n muuxeme.

11 «Dayyo isexxi Ohoolibanna tenne uude'emman, kaddo malee qii'misatinna yaabaabuleti dayyo ifixxa caalde. 12 Isenna galchalluwwikinna ajajalluwwik, kittetixxa seemma oddo'weeke loliinke manninni, fadhado gulufe'ekeerinninna, duuchchiinxe danchallamma dargaggeeyye kadde'exxe Asooritoti welti yaabaabulde. 13 Isenna battooteexxa afenne; lamingi insa'ne mitte ora me'ine.

14 «Yaane kinni Ohooliba Yabaabullet qubasaxxa'n me'itte; gimote'n diimoxxe boo'enni giissendeexxa Kalaadottotike labbalixxa misile affe. 15 Tinne misuluwak labballi hidhake'ni sabata ka'le'ekenna umoke'n rarraateexxa ruufa mirqedhe'eekemman; duuchchiing Kaladototike boga'n ilemeeke Baabiloonike loliinke mannixxe fadhadinxe gaaruwwake ajajalluwwa laba'emmakeeramman. 16 Isenna tenne misiluwwa uuddee wodda welti yababuldo'a hasseexxi tinni misile hexxeeke Kalaadinike boga'n manna ergite. 17 Baabiloonik manninna dage isenni diiphe isee battoosse; isenna battoteechchi uduma insa'nee diqateexxi insa'nenaa'n illee iima higge. 18 Ba'linake'n yaababuliyyoti saala ifi buqedha gophphee wodda dayyo isexxenaa'n illee iima higennashshanni diqatennexxi isenaa'ninna illee iima higenenni. 19 Ise kinni Gibtsee giddo yabaabuldemmaxxa ka'umummatixxa yanna qallita'n bira saxxe yabaabulde. 20 Ookkonna bisi insa'nek harretikishsha, insa'nek sannetik wodi'inna fadhadiinkishsha hedheeke ifike jaaluwwinni welti yabaabulde. 21 Tee Ohoolibaa, Gibtsee giddo boba atixxi qushendemmaxxanna ka'imummatik atik guntuti qaqqabememma woddixxa ka'imummatixxa qii'misa yortette.

22 «Tennexxee, tee Ohoolibaa Lumok Duuchchi Woddik Gootti hiyya'nee qici: diqatte'e insa'nenaa'n illeema higgetaka atika jaaluwwa ate'n kissannon; elqe kayyi'ninna ate bunqashsha iyyedagannon. 23 Isa'nenna Baabiloonitotanna Keledaanito duuchcha, Feqoodika manna, Sho'aanikanna Qo'aka manna, insa'nenni welti Asoorito duuchcha. Isa'nenna danchallamma darggaggeeyye kanda woda duuchchingi galchalluwwakenna ajajulluwwake, fadhadiinxe gaaruwwake ajajaluwwanna jabaxxe baaleke mannamman. 24 Insa'nenna loliinka mi'yuwwa, loliinke fadhadinxa gaaruwwanna gaaruwwat abixxeeke, heddo arda kandeexxi ate'n dangaan; ba'lalammanna odditte wontuwwa abixxine siblinxa gulluwwanna umoke'n uggudhdhine ori orii'n atee qoqqobaan; aninna xixendota'a atee anga insa'eneexxe'n sa'isse uwwannon; insa'nenna aada ifixxishsha ate'n murraan. 25 Anxe hinaaffexxe mufenni ate'n mufatannon; insa'nenna ate'n mufeti ke'naan; sano mansha atixxanna wonxaan; atixxe gamonaa'n gateekiirinna wolaantichchake'n reyaan. Labba meyyaxxa atixxa oose adhdhinaan; gateeka atika manjonna giira ittaan. 26 Seemuwwa atixxanna atenaa'n mulqe'naan; elollamma atika seesuwwanna atenaa'n adhinaan. 27 Gibtseeke boga'n saffettaxxa yabaabullummanna qii'misumma atenaa'n gatisannon; atinna tenne yaanuwwaba'a uudabexxo; ta'ini edi'anna Gibtse yortabexxo.

28 «Lumok Duuchchi Woddik Gootti hiyya'nee qici: kunnise gibbetekiirixxe diqatetekixxe anga'n insa'nenaa'n illee iima higgetekiirixxe anga'n atee sa'isse uwwonna'aten. 29 Insa'nenna atee gibati ate'n ke'naan; huccitetechcho duuchchanna atenaa'n adhdhinaan; ilendetebarishsha duwwinna atee gatinsaan; yabaabulle atixxik saalinna leellaan; qii'misa atixxinna yabaabulle atixxi 30 ate'n tenne'e iyyedage'een; gosa gosake manninni welti yababuldettexxi fakkuwwa insa'nexxenninna battotettaxxee. 31 Dayyo atixxike ora'n me'ite'eten, tennexxee ise ha'witemmaxxe buuda'n xixichcho ha'witattoshsha assanno.

32 «Lumok Duuchchi Woddik Gootti hiyya'nee qici:

«Ba'laxxenna hubbuqitte

dayyo atixxixxe buudanaa'n atinna ha'witaton;

Jirachcho aaxxammaxxee yowwichchokaanna gacifachcho

isenaa'n godditatton.

33 Dayyo atixxe Semaariyaxxa buuda,

diigematixxenna ba'netixxe buudanaa'n,

yo'oshsha machchootenna yaaddaton.

34 Isenaa'n ha'witatton; giddii'ninna cingirsittexxi,

isenna butuchchitatton;

Atika ununaaranna hoqqexxatto;

Ani Lumok Duuchchi Woddik Gootti tennee haaso'eennen.

35 «Tennexxee Lumok Duuchchi Woddik Goottinna anee deetettaxxee, ifi udumi'anna anee laffi assitettexxee, atixxe qili'meetekanna yabaabuleka hira ba'edhi.»

36 Duuchchi Woddik Goottinna ane'n hiyya'nee qici: «Koo manjiinke belto, Ohoola'ninna Ohooliba'n murtota'atte? Yoona diqachchiissaaxxa huje insa'nexxa insa'ne'n kuli. 37 Yabaabullemmaxxee insa'ne mundiinke manjon; fakkuwwa ifixxenni yabaabulle; ani'a illeexxa ifixxa oosenna midde fakkuwwa eetteeneeri'a itate kaddo'a ciincessine'een. 38 Wele insa'ne ane'n hunjeexxi yaane: eettennen barra woyyitte anxa bakka bottoosine; Sanbatuwwa ankaaranna shollinshe. 39 Oose ifixxa fakkuwwa ifixxee tolchineenxe barra'ninni woyyitte anxe bakka'n e'yineexxi isee battoossine. Tinni insa'nee anke mini giddo assineexxe yaanen.

40 «Wele waalin labballi bayyii'n insa'ne'a dago'a manna erge'ne, mannikinna dage. Atinna insa'ne'a biso anshexxe, illetike gaara'ninna hallo buu'litettexxi seesuwwikinna seefattette. 41 Qore hana hexxeeke beeri edo ulfateexxe taqe'ninna ofoldee, anka hixaananna anxa ejersinxa zayite ookkone beeri hana uggitette.

42 «Fenxeya'neke heddi mannik canci qarqara iseke'n hedhemman; insa'ne welti qiilla gammoojjenaa'n dagemmak machcho'alli manninna hedhemman; kunni macho'alli manninna hirre isexxe'ninna isexxe dayyoxxe'n hirboora, umo insa'neke'ninna sesemeeka kallachchuwwanna uggure. 43 Aninna hedho isexxi yabaabulleti muddeexxe eettene manjoxxee, ‹Woldonni isexxi hedha yabaallateete kaddemmaxxee kunni labballi isenni yabaabulaqata› hiyyenne. 44 Insa'nenna isenni welti diinphe; manji yabaabulto manjonni diiphammashshanni insa'ne tenne qii'mito melaalle, Ohoolanna Ohoolibanni welti diinphe. 45 Tinni melaalle yabaabuldexxenna mundiinxe kaddemmaxxee qulliyye kinni yabaabultote'ninna mundiinxe melaalle'n murendaaxxa murte tenne melaalle'n murtaan.

46 «Lumok Duuchchi Woddik Gootti hiyya'nee qici: Lele'misse insa'nen ke'o'a arda iyyedag; saammemo'anna weekkemo'a insa'nee sa'issite uwwi. 47 Ardikinna insa'nee kinjik cancaqaan; wolaantichchikinna insa'nee kochchisaan; labba meyyaxxa insa'nexxa oose shiyaan; minuwwa insa'nekaranna gubaan.

48 «Tennexxee melaalle duuchchi xexe'ato'anna insa'neshsha yabaabula gophpho'a qii'misumma ookkone boginaa'n gatisannon. 49 Ha'noonna qii'misumma ha'noxxika hira adhdhitinaan; fakkuwwa magenoonfatinemmaxxe cubboka xixichonna badhaatinaan; ookkone wodda ani Lumoke Duuchchi Woddike Gootta kadeennexxa egendinaan.»