1 Ookonechchi uduma iikki manjichchi galminxe hulaba ane'e illeema idage; (woyyichchi galmi alba borot darre'n wirri hiyemaxxe) woddi'ikinna galminxe qephphinni hundii'n fula'n boroti darre'n ya'amman; woddi'ikinna galminke bita'i darrenaa'n, tolchimalchiinke bita'anaa'n hundi hundii'n ya'aman.✝ 2 Middi darrexxe hulanaa'n anee fulcheexxi boroti darree'ni alba wirri hiteexxe siretixxe wuddummexxe dowwe'n anee marensiise; woddi'ikinna bita'i darrenaa'n ya'amman.

3 Manjichchi iikkinna miketixxa wodaro anga abixxiyyoti, middi darre'n me'eexxi mitti kuma ciqile mike; ookkoneechchi uduma shane geyeeke wode'i giddonna anee foosse. 4 Higgeni mitte kuma ciqile mikeexxi gulubo iima geyeeke woddi'i giddi'ni anee foosse; higgeenna wele mitte kuma ciqile mikeexxi iima hidha geyyeke wodi'i giddi'n anee foosse. 5 Higgeen wele mitte kuma ciqile mike, yaane kinni wodhi'i wo'meexxi dhi'mo afeeke kademmaxxee dande'e foofabo'noke galaana kade; isinna daakiyotite malee lekkati foossabaakemman. 6 Isinna, «Koo manjinke belto, tenne uuda'ninni hexxette?» hiyye ane'e qore.

Ookkonechchi uduma manjichchi iikki wodi'i qarqarba'a anee illeema hiisse. 7 Ookkonna geyenne wodda galaaniinke gama gama'n heddo haqqichchuwwa uudenne. 8 Manjichchikinna anee hiyyee qici, «Kunni wodi'i boroti darreke bogiba'a ya'aan; abbaayyate'n e'yammaxxe bakkaba'a, Araba'a adadde me'aan; eettene Abbaayya giddi'anna e'yaa wodda, ookko hedhemmak wodi'i maxinummatenaa'n jijjiremeexxi eloke wode'e kadaan. 9 Kunni wodi'i ya'aaxxe bakka duuchcha'n lubbo affeexxi heddo daduwwa hexxa; kunni wodi'i ookko'a ya'ammaxxee qulxumuwwatik laakkossi birasa'eeke kada; tennexxee kunni wodi'i yaa'exxe bakka duuchcha'n yaane duuchcha hedhot hexxa. 10 Qulxu'me abixxaak manni ookkone wodi'ike qarqara'n uurra; Ayiingadinaa'n Eeni egilayim qico'n hexxeexxe bakka'n marabe fa'winaaxxe kaddaan; ookkonna Lumoxxe abbaayyaxxe qulxu'meshsha gargar gargar hexxeexxe gosaxi qulxu'me afendaan. 11 Yaane kinni caffa'atinna weeli wodi'i maxinetike kadeeshanni hedhaa malee ca'ichchake kadaba'a. 12 Galaaniinke qarqara qarqara'n gumma gummisaak gargar gargar hedheek haqichchuwwi lataan, shafa bagaba'a gummatanna harcasaba'a. Kunni haqqichchuwwi galmi hundii'n fulammaka wode'e alfaammaxxe agenjo agenjo'n gummisa; gummatinna itatee, shafikinna fayyatee kadaan.»✝

13 Lumok Duuchchi Woddik Gootti hiyya'nee qici: «Boga tommenna lame Isira'eelike gosatike mini'a qadaadake kadaashsha qoodinaaxxi gabala konnechchinni butti'a hexxeeshshaten; Yooseefi lame qoobbo alfowaal. 14 Ha'noke edike annuwwi'a uwwona'a kakate'enaxxee konne boga qixxe qoodemme; isinna ha'noke qadaada kadaan.

15 «Bogiinxi gabalanna konnechchin butti'a hexxeexxen:

«Middi darree'n Lumoxxe Abbayyanaa'n kexxeexxi, Hetiloonke orii'n Hamati'a saxxeexxi Tsedaadi marte geltaan. 16 Ookko'ninna Demasiqoxxenna Hamaatixxe gabala'n oddote'n hedheeke Berootakanna Sibirayiimika qachchuwwa saxxeexxi, Hawuraanixxe gabala'n hedheeke Hatseerhaatikon qachcha'n marte gelta. 17 Gabalatinna Mediteranixxe Abbaayyanaa'n kexxeexxi Demasiqoxxa middi darrexxa gabala abixxite Hamaatixxa gabala middi darre'n gatisa'n Hatseer'eenaan marte gelta. Tinni middixxe gabalan.

18 «Boroti darrexxi gabala Hawuranxenna Demasiqoxxe oddoo'n saxxeexxi, Yordaanoosi darree'n Gele'adixxenna Isira'eelike bogixxe oddonaa'n saxxa'n borotixxe Abbaayya qico'n muguggiteexxi Tamari marte gelta. Tinni borotixxe gabala kaddaan.

19 «Bita'i darrexxi gabala Tamare'ni kexxeexxi Meribaa Qaadeesike wode'i qico'n, ooko'ninna Gibtseke galaaniinxa Lumoxxe Abbayya qico'ni marte gelta. Tinni bita'ixxe gabalan.

20 «Dhidhim darrexxi gabala kinni Hamaatixxe hulake kallachcha'n hexxeexxe Lumoxxe Abbayya qico'niten. Tinni dhidhimiinxe gabala kaddaan.

21 «Kunnise konne boga Isira'eelike gosatike minike laakkosixxe qixxe'n qoqqodendina. 22 Ha'no ifi'aanna, ha'no giddo hedheeke oose afeeke alaguwwi'a geego kado'a hixik qoodemme; Insa'neenna Isira'eelike ilemi mannishsha uudde; ha'noshanni Isira'elixe gosake minik qadaadi insa'ne'anna uwwemowaal. 23 Alagichchi hoone gosatike mini giddo hedhoole, ookkonee isika geego isi'a uwwe,» hiyya'neen Lumok Duuchchi Woddik Gootti.