1 « ‹Lumok Duuchchi Woddik Gootti hiyya'nee qici, boroti edo hexxeexxe giddixxe wuddummexxi hula jaaniniixxa hujetixxa barra cufendowaal; yaane kinni edi sanbatinxa barranna haaroxxi baate fuldaaxxa barra banemowal. 2 Galchanj gadhi darrexxe wuddummexxe hulaxxe soro hundii'n e'yeexxi hulati mikiklanji bira uurrowaal; qeesoletinna isi'a ciincesinaaka tolchuwwanna mittomiinka tolcha tolchitowaal; isinna hulatixxe buttixxe gubane hane hedhe magnofateexxi fulowaal; wuddummetixxi hula kinni galagal qico'n cufendoqe'e. 3 Bogiink ardinna edi sanbata sabata'ninna haaroxxi baate fulatike ayyaana Duuchchi Woddike Gootti edo wuddumetike e'yinjo'n magonfatowaal. 4 Galchalli sanbatinxa barra ciincesinaake tolchi'a fafa afebaaka mitte gedhechinii korbeesanna jaane gedhebinka buruusuuwanna Duuchchi Woddike Gootti edo shiqinshowaal. 5 Gedhebiinke korbeesiinni welti midhatixxi uwwa mitte Iffi mikisanjo shiqowwal; gedhebinke buruusuwwinni welti shiqqaxxi midhatixxi uwwa annichchinxe eeyyashanni kaddun; mitti mitting iffik mikisanjinni welti mitte mitte inka mikisanjo zayite shiqishowaal. 6 Haroxxi baate fulatika ayyaana'n mitte jibichcha, jaane gedhebinka burusuwwanna mitte gedhebinka korbeessa shiqinshowaal; duuchhcing fafa afebaake kadowaal. 7 Manjichchi jibichik welti mitte iffika mikisanjo, gedhebiinke korbeessininna welt mitte iffika mikisanjo midhatixxa uwwa shiqinshowwal; ittanni gedhebinke burusuwwinni shiqqa'neexxa midhatixxa uwwa kinni manjichchi eeyye qico uwwuun; mitti mitting iffik mikisanjinni welti mitte iink mikisaji zayite shiqqowaal. 8 Galchalli e'yaa wodda wuddummetixxe sorotixxe hulanaa'n e'yowaal; fula woddanna ooko'ninni fulowaal.

9 «‹Bogink giddik ardi muremeeke ayyaanuwwa'n Duuchchi Woddike Gootti edo dagaa wodda, magenofachchotee middixxe wuddummexxe hulanaa'n e'yeek duuchchi bita'ixxe hulanaa'n fulowaal; bita'ixxe wuddummexxe hulanaa'n e'yek middixxe wuddummexxe hulanaa'n fulowaal; kallacha iske'n hexxeexxe hulanaa'n fuloo malee'e ayyinna e'yemmaxxe hulanaa'n fuloqqe. 10 Galchalli insa'nexxe oddo'n hedheexxi e'yina wodda e'ya'n fulla woddanna fulaan.

11 «‹Ayyanuwwake'ninna muremeeke ayyanuwwiinxe barruwwa'n, jibichchik welti mitte iffik mikisanji, gedhebiinke korbeessininna welti mitte iffika mikisanjo midhatixxa uwwa shiqishowaal; gedhebiinke buruusuwwinni welti shiqishaak midhatik tolchi kinni manjichi eeyyeqicike kadowaal; mitte mittinge iffike mikisanjinni welt mitte iink mikisaji ejersiinxi zayite shiqqowaal. 12 Galchalli eeyya ifixxenni Duuchchi Woddike Gootti'a ciincatika tolcha kadi mittummatika tolcha shiqishaaxxa yanna borot darre'n wirri hiteexxi hula isi'a banenduun; edi sanbatixxe barra'n assammashshanni ifika cincati tolchanna kadi ifika mittummatika tolcha shiqishowaal. Okonechchi uduma fulaan; fuleechchi uduma hulatinna cufendaan.

13 « ‹Barra barra'ninni fafa afebaaka mitte woggaka gedhebiinka buruusa ciincatike tolchi'a Duuchchi Woddike Gootti'a shiqishuun; gorsa gorsa'ninni isoo shiqishowaal. 14 Isinni welti gorsa gorsa'ni midhatika tolcha, iffika mikisanjixxa jiyeesoxxa anga bulle karsatee kaddaaxxa iinka mikisanjixxa sakkaxxa anga zayite shiqishuun. Gorsa gorsa'ninni midhatika tolcha shiqishunni; Kunni midhatik tolchi Duuchchi Woddike Gootti'a shiqisha duuchchi woddixxe aadan. 15 Tennexxee duuchchi woddi'a shiqaake cincatike tolchi'a gorsa gorsa'ninni gedhebiink buruusi, midhatik tolchinna zayite shiqqowaal.

16 « ‹Lumok Duuchchi Woddik Gootti hiyya'nee qici: galchalli qadaada ifikenaa'n labbaxxe ifixxe oose giddi'ni mitteke'e uwwoole, itti uwwa isixxe horte'n saxxaan; dhaalatinna insa'nexxe karra kaddaan. 17 Yaane kinni ikki galchalli ifike qadaadanaa'n ifike erganjuwanaa'n mittekee uwwoole, iikki erganji ookkone qadaada qullo fulatixxe wogga qico'n ifike assedha; ookkonechchi uduma iikki qadaad ookkone galchalli'a higeexxi duuchchi woddi'a isixxe labbaxxe ooseke calla kadaan; qadaadi iikkinna insa'neke. 18 Galchalli insa'nexxe karranaa'n finqilcheexxi hoone ardika qadaadanna adhdhiyyo hassissaba'a; ifixxe labbaxxe oose'anna qadaada uwwiyyo hassissaak ifixxe karranaa'niten; tinninna arda ankenaa'n ayyinna ifike qadaadinaa'n finqilchemabaashaten» hiyye.

19 Ookkonechchi uduma manjichchi iikk wuddummetixxe hulake qarqarnaa'n middi darree'n wirri hiteexxe woyyitte qeesoletixxe kutaba anee idageexxi dhidhimake'n uduma hexxeexxa bakka ane'n leelishe. 20 Isinna anee, «Tinni bakka arda woyyonsatee* tolchuwwi siretixxe wuddummeba'a fulchinabaashsha, qeesole balleessatikenna cubbotike tolchika maala gaffaabanna midhatika tolcha ra'issitaaxxe bakkan» hiyye.

21 Ookkonechchi uduma iikki manjichchi siretixxe wudumme'n ane idageexxi shoolnge wuddummetike kasixxe dowwe'n ane'e marensiise; aninna mitte mittenge kasa'n wele wuddumme affeexxa uudenne. 22 Siretixxe wuddummeke shoolnge kasa'n qeerrini shoole tomme ciqile godobi sase tomme ciqile kaddeexxi dalli'ik qoqqobendeexxe wuddumme hexxemman; tinni shoolinge kasa'n hexxemmaxxi wuddummuwwa weli qixetemman. 23 Tenne shoolnxe wuddummexxe dowwe'n giddii'n kinjinxe laango hexxemma'a; laangoti hundixxe dowwe'ninna giiratixxe boosumma hexxemman. 24 Manjichchikinna ane'e, «Kunni shoolng boonchi woyyichcha galma'n ergatemaakiir ardinka tolchuwwa ganfaaxxe bakkan» hiyye.