1 Duuchchi Woddike Goottik hiyyichchi ane'n dageexxi: 2 «Koo manjiinke belto Xiroosi'a boochchisa boochchisi; 3 Abbayyatixxe hulaba heexxaammaxxanna heddo giddichchuwwake ardinni dadda'lendeexxe Xiroosi'n hitatto qici, ‹Lumok Duuchchi Woddik Gootti hiyya'neen hitatto qici:

« ‹Tee, Xiroosi!

«Ani danchummat muxuuxxeten» hite'etten.

4 Gabala atixxi abbayyatixxe oddo;

ate ijaareekirnna atee danchosse muxuuxe fulche;

5 Atixxa becuwwa duuchchanna

Seneerii'n dageeke hi'neesike haqichuwixxe assinne;

Utupha ati'a giissino'a,

Libaanoosii'n birbirsa iyyedange.

6 Baasanii'n dageeke qilxika,

hobolotika shaffisa ati'a giissine;

Qophiroosi'n dageeke birbirsixxa

atixxa fawo dana'iinxe issonni seense giisine.

7 Atixxe lummoxxe hoboluwwak shari,

Gibtseeke bogixxe layinnonn ganeemekemman.

Kunninna ati'a baandiirinxa la'o uwwa'nemman;

atik goluwwinna Elishaxxe giddichuwwanaa'n dage'eke,

Cuqulliissite bifakkenna baddeessitetikemman.

8 Markaba atika shaffisaak manni Sidoonikinna Arewaardi hinaake qachchuwwanaa'ni dagekeeran;

koo, Xiroosi atixxi beekkole atixxe lumollamma hoboluwake akeesanjuwwamman.

9 Angatixxa oge afeek Gebbaalik manni,

atixxa lumolla hoboluwwa duuchcha woddi'i e'yabaashsha qammalchate'e ati giddo hedhemman;

Abbaayyatixxi lumolla hoboluwwanna isee oofammakiir duuchchi

atenaa'n hidhdho'anna ate'n gurgudho'a daga'emman.

10 « ‹Faarsik, Lidiyaakinna Fuuxiki manni loliinke manna

kadnee atike sannachchi giddo ergateme;

Insa'ne ati biifondatoshsha,

wonte ifixxanna ifixxa sibiliinxa gulle, atike kasa'n fannisse.

11 Arewaadinna Heleekik manni,

atike dalla'ike qarqara duuchcha'ni hedhemman;

Gammaadik manninna, atike dalla'ixxe xeeleepho giddo hedhemman.

Insa'nenna ifixxa wonte atike dalla'i qarqara duuchcha'n fanninsse;

Atixxa danchummanna quba sa'isinne.

12 « ‹Atixxe bira saxxeexxe durumanaa'n kexxeexxa,

Tersesinni weli iima dada'litina'nemman;

Ise sibljo birreninna siblik,

qorqoorotike siblinninna irsaase hiyyemmake siblinni miya atenaa'n hidhite'amma.

13 « ‹Ati Yaawaninni, Tubbali'ninna Meesheekinni weli iima dada'litina'eman; insa'ne'e garbikinna sageetotike sibilinni miya atenaa'n hidhina'emman.

14 « ‹Ati Beeti Togaarmak manninninna wei iima dada'litina'emman; insa'nenna hujetike fadhadinni, loliinke fadhadinninna loliinxe gaangenni miya atenaa'n hidhina'emman.

15 « ‹Ati Dedaanike manninni weli iima dada'litina'neman; heddo giddichchuwwa manninna weli iima dada'lina'emmake atike jaaluwwan; insa'ne dana'iinxe issonninna zophi hiyyemaake xilloke jabake haqichchinni miya atenaa'n hidhina'nemman.

16 « ‹Huccitetechchixxe bira sa'nenaa'n kexxeexxa Sooriyanni weli iima dada'litina'neman; isenna bulur hiyyemaake fiixeek kinjinni, baddeessitte seemanni, seesuwwi gobemeexxa semmanninna, layinotixxe seemmanni, elellatinninna fiixeeke diidiimoke kinjinni atenaa'n miya hidhina'nemman.

17 « ‹Yihudanna Isira'eeli atinni weli iima dada'lina'nemman; insa'ne Miniitike bogixxa dinne, xe'mallo kebbo, malebo, ejersixxa zayitenna balasaane hiyyemake haqichchixxa madate'n isemaaka gora idagga'n atenaa'n miya hidhina'neman.

18 « ‹Huccitetechchixxe bira sa'nenaa'n kexxeexxa, Demasiqo ardi Keliboonii'n daggeexxe woyinetixxe bookanninna Zaahari'n daggeexxe gedhebiinxe ordanni atenaa'n miya hidhina'nemman.

19 « ‹Oseeli hedhammak Wendaanikinna Yaawanik manni dangeexxi atinni weli iima dada'la'nemman; insa'ne tumemeeke siblinni, dakadhatinna hanxaxet miya atenaa'n hidhina'nemman.

20 « ‹Dedaanik manni ati'a gilaase idaga'n atinni weli iima dada'litina'nemman.

21 « ‹Arabikinna Qeedariki akeekisanjuwwi duuchcha gedhebika buruusa, gedhebinxa korbeeyyenna, re'etixxa korbeeyye idagati ate'n dada'lina'neemman.

22 « ‹Saabake mannixxinna Ra'imake mannixxi dadalto yo'oshsha eloxxe gargar gargar hexxeexxa qurunfuduwwa duuchcha, fiixe'eka kinjuwwanna worqenni atinni weli iima dada'lna'nemman.

23 « ‹Karaanik manni, Kaanek, Edeenik, Saabake bogixxi daddalto, Asoorikinna Kilimaadiki manni ate'n dada'lina'nemman. 24 Biiffaxxa seemmuwwa, cuqullichcha kaaba, seesiki gobendeexxa seemmuwwa, gargara gargar hexxeexxe bifaxxe wodaronni duudhende ganedeexxa racho atixxe dikko'n ate'n dadda'lina'nemman.

25 « ‹Terseesi bogixxi lumolla hoboluwwa

mi'uwwa atika feeta'nemaani;

Abbaayyatixxe oddo'n

a'urtaxxi ba'o ate'n wo'mitemman.

26 Atixxa lumolla hoboluwwa shafisik oofamakiir

abbaayyatixxee oddo'n ate'e iyyemarre;

Borotibaa'n gandammaxxi diidallo kinni

abbaayyatixxe oddo'n atee enqitaan.

27 Lumoxxe hobol'o'n ba'ne geltaaxxa bara,

atik qabeenni, atik daddalatik miyuwwi,

Atixxe lumollamma hoboluwwak shafisaluwwi, giddo ergatamaakiirinna isee qamalchammakiir,

atixxi dadaltuwwanna atik duuchching loliink manni,

Hoboloti giddo hedheek duuchchi,

abbaayaytixxe dhimmo giddi'a linxaan.

28 Atixxe lumoxxe hobolo giddo hedhemmak manni raaraa wodda,

lumoxxe abbaayya qarqarik bogi duuchchi lele'maan.

29 Lumolla hoboluwwak oofalluwwi duuchchi,

oonfammaxxa lumoxxa hobolo waale'e me'inaan;

Hoboluwatik ajajaluwwinna gargarsanjuwwi duuchchi

dirrineexxi abbayyati qarqara uurrinaan.

30 Insa'ne hafuura gikki assineexxi,

Umo ifike'n buko fiffilxine'e

Bululoke'n gangalanta'n

hiiqqinse ati'a oo'naan.

31 Ati'a umo haaxinee

doonya seemanna oddo'winaan;

Yo'oshshanna yaandeexxi,

ati'a hiiqinse oo'naan.

32 Ati'a oo'nee boochchisa'n oo'no'a;

wi'lishina'ninna,

«Abbaayyate'n liqinseme gateek,

Xiroosike qachchishsha aate?» hina.

33 Atik daddalink miyuwwi abbayyatenaa'ni foofe dagaamma wodda,

heddo gosa gosaka arda goddisaattan;

Atike lumoke qabeenninna atike dadalinke miyuwwinni

buttatka moyanjuwwa duronsitaattan.

34 Ta'a kinni dhi'moo abbaayya giddo,

enqende gateetten;

Atik feemek miyinna ati'a ergatammaki duuchchi,

atinninni welti lixe'een.

35 Abbaayyatike qarqarike boga'n hedhaneek duuchchi,

ate'ni kaddeexxe yaanenaa'n kexxeexxa alanne;

Insa'neki moyanjuwwi culphise;

alba insa'neeke'ni alayyi egenishe.

36 Gosa gosak ardi giddo hexxeexxi daddalto ate'n qacifattaan;

muuxami atikinna alalshaake kade;

langaxxa afendabexxo hinaan.› »