1 Booji'emennexxe torbaxxe woggake, ondike agenjiinxe tommixxe barra'n Isira'eelixxe geedhe giddii'n mitti mitti Duuchchi Woddike Gootta qodhdhatee dangeexxi ani edonna ofole. 2 Duuchchi Woddike Goottik hiyyichchi ane'n dageexxi, 3 «Koo manjiinke beltoo, Isira'eelike akeekisanjuwwa'n ‹Lumok Duuchchi Woddik Gootti hiyya'neen hitatto qici: Anee qodhdhitino'a dagginee? Dhugaa anee hedhaannekixxa, anee qodhdhitino'a eeti ha'no'aa uwwa'ebo'no hiyya'neen Lumok Duuchchi Woddik Gootti.›

4 «Koo manjiinke beltoo konne manna'n mura murtatto? Insa'ne'n murtabexxo? Insa'neke edik annuwwi assemmaxxa diqachchiissaaxxa huje insa'ne'n ege'nish. 5 Insa'ne'ninna ‹Dada Duuchchik Duuchchi Woddik Gootti hiyya'een hitatto qici: Isira'eeli'i fi'lennexxa barra, Ya'iqoobixxe horte'n Gibtsee giddo ifi ege'nishshati anga iima ke'issennexxi insa'ne'aa, «Ani Duuchchi Woddike Gootta ha'noke Magenon» hiyye kakatenne. 6 Eettene barra, ani isa'ne Gibtseeke boganaa'n fulchennexxi insa'ne'aa qophpheesseneke ado callikenna malebi callike boga duuchchanaa'ninna hara danchake kadeeke ookkone boga'n insa'nee aassonaa kakatene.✝ 7 Aninna insa'nee, «Ha'no mitti mittiingi ille uggudhitine'eexxa battitte fakkuwwa fugusse; Gibtseexxe fakkuwwanninna ifi battoossitinoqqe'e; Ani Duuchchi Woddike Gootta ha'nooke Magenon» hiyyenne.

8 « ‹Insa'ne kinni ane'n jallineen; haaso'a ankanna laqa ginbeen; ille itti uggudhineemmaxxa battitte fakkuwwa fugusinebaan; Gibtseexxa fakkuwwanna waalebaan. Tennexxe'e aninna ookkoonni Gibtseke boga'n aare anxa insa'ne'n dhangalaasanno mufe anxanna insa'ne'n wocci assonnaa mureenan. 9 Yaane kinni giddo he'nammakenna Gibtsee'n Isira'eeli fulchona'a haaso'enna wodda, ifi leelisheneke gosa gosake ardi edo summi anki battoo'abaashsha anke summi'a hiyye inisa'ne Gibtse'n fulcheennen. 10 Tennexxee inisa'nee Gibtsee'n fulcheennexxi qiilla gammoojjeba iyyedagenne. 11 Isi'a ajajemeekaa manjo hedhoti hedhisaaxxa anxa aaduwwa insa'ne'aa uuwwene; seeruwwa ankanna insa'ne'aa ege'nishshennen.✝ 12 Iittanni Ani Duuchchi Woddiki Gootti insa'ne woyyonseneexxa ege'naashsha anxenna insa'nexxe oddo'n beessisake kado'a anka Sanbata insa'ne'aa uwwenne.✝

13 « ‹Yaane kinni Isira'eelik ardi qiilla gammoojje'n ane'n jalle; manji ise'a ajajemati hedhoti hedhaaxxa anxa aada insa'ne heqe'nebaa; seera anke'ninna me'inebaa; Sanbata ankanna hara battoossine; tennexxee aninna aare anxe'n insa'nee gananno, qiilla gammoojje'ninna insa'nee bironno hiyyenne. 14 Yaane kinni insa'ne giddii'n Isira'eeli'i fulcha'naa uudemmake gosa gosake ardi edo ank summi batto'abaashsha summa ankixxee tennee assenne. 15 Iittanni boga duuchchanaa'ninna hara danchake kadeeke ookkone ado callikenna malebi callike boga insa'ne'a uwwanno hiyyenneke'n insa'ne aassabo'noxxa qiilla gammoojje giddo anga iimi'a ke'issennexxi kakatennen. 16 Tenneenna assennechchi insa'ne seera anke'n me'a gonpheemmaxxee, ajajuwwa ankanna heqedha gonpheemmaxxeenna Sanbata ankanna battoosinemmaxxeeten; insa'ne godobik fakkuwwa ifixxebaa he'neen. 17 Ani kinni insa'ne'a maraarenne malee insa'nee balleessebo'no qiilla gammoojje giddonna insa'nee birebo'non. 18 Ani qiilla gammoojje giddo oose insa'nexxe'n, «Annuwwi ha'nookixxa aaduwwa hordofinoqqe; seera insa'nekanna heqqexxinoqqe; insa'nexxe fakkuwwanninna ifi battoossitinoqqe'e. 19 Ani Duuchchi Woddike Gootta ha'nooke Magenon; aada anxa hordoffe; seera ankanna xexxe'achchoti heqqedhe. 20 Anixxenna ha'nooxxe oddo'n beessisake kadaashsha Sanbata anka woyyitte barra asse; ani Duuchchi Woddike Gootta ha'nooke Mageno kadeennexxanna egendinaan» hiyyenne.

21 « ‹Yaane kinni oose insa'nexxi ane'ni jallite; ise'a ajajemeek manji hedhot hedhaaxxa anxa aada insa'nee heqqe'nebaa; seera anke'n me'ate'n jabaantebaan; Sanbata ankanna battoossine; tennexxee aninna qiilla gammoojje'n aare anxenni insa'nee gananno, mufe anxanna insa'ne'n bidhdhanno hiyyenne. 22 Yaane kinni Isir'a'eeli Gibtse'n fulchennexxa uudemmake gosa gosake ardi edo summi ank battoo'abaashsha tenne assebe'non. 23 Iittanni gargar hedheeke boguwwa'n gosa gosake ardi giddo insa'nee xeere xeelagonnaa qiilla gammoojje giddo anga iimi'a ke'isse kakatenne.✝ 24 Tenne assennechchi insa'ne aada anxa xireeffante Sanbata anka battoonsine male'e seera anka heqqedha gonpheemmaxxeten; ille insa'neke annuwwixxe fukkuwwa'n uggineen. 25 Aninna eloloxxe kaddebaaxxe aadda'ninna hedhoti insa'nee hedhissabaake seera'n insa'nee sa'isse uuwwenne. 26 Ani Duuchchi Woddike Gootta kadennexxa egenaashsha insa'nee alalishshonnaa angafa ifika belto duuchcha ciincessati battoonaashsha assennen.›

27 «Tennexxee koo manjiinke beltoo Isira'eelike arda'n hitatto qici, ‹Lumok Duuchchi Woddik Gootti hiyya'nee qici: Annuwwi ha'nok anee waaliyyoti tennenni anee salphinse: 28 Insa'ne'a uwwonaa kakatenneke boga'n insa'ne iyyedagenne wodda, lumollamma goorowwa duuchchanna shafi barqaaqeeka haqichchuwwa duuchcha uundeexxi ookko tolchuwwa ifika tolchine, tolchuwwa tolchiyyotinna anee mufachchiinse; eloke foolika ifika hixaanuwwanna gunbe; ifika ha'watika tolchanna dhibaanse. 29 Ookkoneechchi uduma aninna insa'ne'ee: ha'no isebaa martina'neexxi tinni lumollamma gooruwwa ise maachcho?› » telchi qico'n ookkone boonchik summi Baama* hiyyemee ye'emaan.

30 «Tennexxee Isira'eelike arda'n Duuchchi Woddik Gootti hiyya'neen hitatto qici: ‹Ha'nok annuwwi ifi battoossemmake orike orinni mayee ifi battoossitina? Insa'nexxe battitte misilluwwa hordofate'e halchitinaa? 31 Uwwa ha'nooxxa shiqishshinaa wodda oose ha'noxxanna cincesati ha'noxxe fakkuwwa duuchchanni telchii qico'n batto'ate'n hexxineen. Koo Isira'eelike ardaa anee qodhdhitino'a eeti ha'no'aa uuwanota? Dhugaa anee hedhaanekixxa anee qodhdhitino'a eeti ha'no'aa uwwabo'non, hiyya'neen Lumok Duuchchi Woddik Gootti.

32 « ‹Ha'noonna, «Haqichchokanna kinjo magenoonfatamake gosa gosake ardishsha, buttate'n hedheeke ardi duuchchishshanna kandanno» hitineen; yaane kinni godobi giddo heddineexxi hara ha'no'aa kaddabaan. 33 Dhugaa anee hedhaannekixxa, hiyya'neen Lumok Duuchchi Woddik Gootti jabaaxxe anxe anga'ninna qeererxxeexxe anxe hirrenni aare anxenni ha'noo ganee ha'no'n moyannon. 34 Gosa gosake ardi giddii'n ha'noo fulchannon; jabaaxxe anxe anganninna qeerraaxe anxe hirrenni aare anxenni gane xexxeerendinemmake bugguwwi duuchchinaa'n ha'noo bukki assannon. 35 Gosa gosake ardixxe qiilla gammoojje giddo ha'noo iyyedaganon; ookkonna uudinaa'naanni ha'no'n murannon. 36 Gibtseeke bogixxe qiilla gammoojje'n edike ha'noke annuwwa'n murennashshanni ha'no'ninna murannon tenne haaso'eek Duuchchi Woddike Goottan. 37 Ani ha'noo anxe mootumma hunda galdinaashsha assannon; anxe kakkoxxe giddisaba'anna ha'noo iyyedagannon. 38 Ane'ni jalleexxi anee balleessakaara ha'no giddi'n fugusannon; ta'a hexxineeke boganaa'n insa'nee fulchannon; insa'ne Isira'eelike boga'n kinni e'yinabaan; eettene yanna ani Duuchchi Woddike Gootta kadeennexxa egendinaan.

39 « ‹Koo Isira'eelik ardaa Duuchchi Woddiki Gootti ha'noxxee hiyya'nee qici: Ani hiyyannexxa laqa gophina'noole, ha'no mitti mittingi martineexxi ha'nooxxa fakkuwwa magenoonfatte! Yaane kinni ha'nooxxe uwwanninna ha'noxxe fakkuwwanni woyyichcha anka summa ta'anni edi'a battoossitinoqqe'e. 40 Woyyitte anxe kooba'n, qeerraxxe Iisira'elixxe kooba hana, ookkone boga'n Isira'eeliki ardi duuchchi anee magenoffata; aninna ookko insa'nee qophedhannon; uutinaachcho, ha'nooxxa umiixxa uwwa ha'nooke woyyichchi tolchinni welti ookko ha'nonaa'n heqedhannon. Hiyya'neen Duuchchi Woddik Gootti. 41 Gosa gosake ardi giddii'n ha'noo fulchanno wodda xexxeerendinemmake boguwwinaa'ninna ha'noo bukki assannoxxa yanna fishshake hixaanishsha ha'noo qophedhannon; ha'no giddo woyyichchake kadeennexxa gosa gosake ardi edo leellishshannon. 42 Ha'nooke edike annuwwi'a uwwona'a anga iimi'a ke'isse kakatenneke Isira'eelike boga'n ha'noo iyyedaganno wodda ani Duuchchi Woddike Gootta kadennexxa egendinaan. 43 Ookkonna assitinemmaxxa yaanuwwanna ifi battoosinemmaxxa ha'nooxxa huje qaabatinaan; assitinemmaxxe fuggo duuchchi'anna ifi diqatinaan. 44 Koo Isira'eelike ardaa ha'noxxe fuggoxxe me'ashanna ha'nooxxe elobaaxxe hujeshshate kadebaak anke summi'a hiyye ha'noo uudanno wodda ani Duuchchi Woddike Gootta kadeennexxa egendinaan hiyya'neen Lumoki Duuchchi Woddiki Gootti.› »

45 Duuchchi Woddike Goottiki hiyychchi higgeenni ane'n dageexxi: 46 «Koo manjiinke belto bita'i darre'n alba wirri hiyyi; bita'ake'ninna lallabi; bita'ike bogike gongoma'n raaga raagi. 47 Bita'ike gongoma'n: ‹Duuchchi Woddike Goottika hiyyichcho laqi hiyyi. Lumok Duuchchi Woddiki Gootti hiyya'nee qici: Ate'n giira haa'ishonnaaten; giiratinna atika shamoka haqichchuwwanna atika bagoka haqichchuwwa duuchcha ittaan; eettene giirak tallisak bubenjinna xo'abaan; giiratinna bita'ii'n middi qico'n hedheeka manjo duuchcha ittaan. 48 Manji duuchchi ani Duuchchi Woddike Gootti haa'ishenneshsha uudaan; isenna xoxxabaan.› »

49 Aninna, «Lumooke Duuchchi Woddike Gootta ba'ennenii! Insa'ne anee ‹Isi mamaassa calla mammaaka'n hedhaan› hinaan» hiyyenne.