1 Ookkonechchi uduma iikki manjichchi boroti darre'n alba wiri hiteexxe hula'n anee idage; 2 aninna Isira'eelik Magenik gaachchanni boroti darre'n dagaa'na afenne; hafuur iskinna abbayyatike danbala'ike luuljishshatemman; bogikinna isike gaachchananaa'n kexxeexxa ifa'emman.✝ 3 Uudennexxi waleellanna qachcha balleesso'a dagee wodda uudennexxe waleella labbammaxxeenna iittanni Kebaarike Galaanba uudennexxe waleellanni weli laba'emmaxxemman; aninna albik gonbisemenne. 4 Duuchchi Woddike Goottik gaachchaninna borotiba'a alba wirri hiteexxe hulanaa'n galmi giddi'a e'ye. 5 Ookkonechchi uduma Duuchchi Woddike Goottik Hafuur anee ke'isseexxi giddi darrexxe wuddumme'n anee iyyedage; Duuchchi Woddike Goottik gaachchanninna galma wo'me.

6 Iikki manjichch ani bira uurre'naani, galmi giddii'n Duuchchi Woddik Gootti ane'n haaso'aa'na'a laqenne. 7 Isinna anee hiyya'emma qici, «Koo manjiinke belto kunni boonchi anxe moottexxe offo'lchinxe bakkan, anxe lekkaxxe kophexxe hadhatixxe bakkan, Isira'eelike ardi giddo duuchchi woddi'a hedhenoxxe bakkan; Isira'eelike ardi, insa'neke moyanjuwwinna yabaabulatinna magenofachchotixxe bakka'n gooruwwati hana magenofatammaxxe lubbo affebaaxxe insa'neke moyanjuwwixxe fakkuwwanni summa anka langaxxa battoossinabaan. 8 Anxenna insa'nexxe fakkuwwaxxe oddo'n gimo call hexxe'na'a, insa'ne qephinna ifika anki bira, ifika mikiklanjuwwa anki bira, giissedhiyyoti ifixxe diqachchiisaaxxe hujen woyyichcha summa anka battoossine; tennexxe mufe anxenni insa'ne birenne. 9 Ta'anna insa'ne yabaabulle ifixxanna lubbo affebaaxxa ifike moyanjuwwiinxa fakkuwwa ani edii'n bayyinsuun; aninna insa'nexxe oddo'n duuchchi woddi'a hedhannon.

10 «Koo manjinke belto cubbo ifixxee shoonko'a konne galma Isira'eelike arda'n leellish; hitta ijaareme qiconna hubante uunduun; 11 hunjeexxe cubbo duuchixxeenna shoonke'eexxe kaddooole galmiinke ijaarsika karta ege'nish, tinninna isi hitta ijaaremaa qico, dhagga isixxa, e'yinjibanna fullatiba; isi hita ijaaremee qico duuchcha, isixxa aadanna isika seeruwwa ijaaremaa qiconna aada duuchcha heqe'naashshanna hordonfaashsha konnechchuwwa duuchcha insa'ne edo borreesi.

12 «Konne Galmik seerii: koobatixxe xungoxxe dowwe duuchcha'n hedheeke looli duuchchi hara woyyichchake kadaan. Kunni konne galmiike seeran.

13 «Konne tolchimalch qeerrinni ciqiletenna taakkoten; isik darrexxi dhimo mitte ciqile kadaa woda godobikinna mitte ciqile, isexxe dowweke irgik godobinna mitte taakko; kunni tolchimalchinke qeerrinnen:✝ 14 Hundi darrexxe isixxe boosonaa'n iimi'a butti darrek hadhisaji qico'n ejuma lame ciqile, godobikinna lame ciqile; shiixxoke hadhisanjonaa'ninna iimi'a lumoke hadhisanji qico'n ejuma shoole ciqile godobikinna mitte ciqilemman. 15 Konne tolchimalchiixxe boosumma ejjuma shoole ciqilen; tenne boosumaxxi ejjuma mitte miite ciqile kadeek shool tolchimalchink gaafuwwi hedhemman. 16 Konne tolchimalchixxi boosumma shoole weli qixxeke gami gamixxe kaddaa wodda qeerrinni tommenna lame ciqile godobikinna tommenna lame ciqilen. 17 Iimi darrek irgi shoole kasike kadaa wodda qeerni tommenna shoole ciqile, godobakanna tommenna shoole ciqilen; isixxe dowwe'n hedheek dareeri godoba gamisa ciqilen; isixxe boosoxxi dowwenna mitte ciqilen; hana hadha'n e'yatik isik irguwwinna boroti darre'nitemman.»

18 Isinna anee hiyyee qici, «Koo manjinke belto Lumok Duuchchi Woddik Goottinna tolchimalchi ijaaremeexxa yanna, itti cinceessatikinna munde itti fiffixatik seeri konneechchinni butti'a hedheeke kaddaan: 19 Ani'a ergatendo'a ani edo shiqqaaxxe, Leewwike gosatike minenaa'n, Saadoqike mini hadixxe qeesole'n cubbotike tolchi'a kadaaka mitte jibbichcha utinaa'n; tenne hasoe'ek Lumoke Duuchchi Woddik Goottan. 20 Atinna eetene mundenaa'n heenoxxa aaxxe, tolchimalchiinke shoolnge gaafuwwa'n, iimi dareke isike shoolnge kasa'ninna isike irgixxe dowwe duuchcha'n fifixxatton; konne qicinni tolchimalcho ca'a assite cubbo birtatton. 21 Cubbotike tolchi'a korma aaxxetexxi, galmiinke foyemeeke boncho'n galmii gadhi darre ciincesitatton.

22 «Langa baro fafa afebaaka re'etika korbeessa cubbotike tolchi'a tolchitatto; jibichchiinxe mundenni assiteteshshanni recciinxe mundenninna tolchimalcho ca'a assitatto. 23 Ca'a assa muuxxettechchi uduma fafa afebaaka jibichchakanna gedhebiinka korbeessa shiqishshatton. 24 Lamiinga Duuchchi Woddike Gootti edo shiqishshetelchchi uduma qeesole lamiinge'n maxine hana fiffixeexxi Duuchchi Woddke Gootti'a ciincatike tolchi'a tolchitatto.

25 «Barra barra'n torbaane barra'a, cubbotike tolchi'a re'etika korbeessa shiqishshatto; iittanni fafa afebaaka jibichchanna gedhebiinka korbeessa shiqishshatto 26 Kunni hori torbaane barra'a tolchimalchiinxa cubbo biraan; konne qicinni tolchimalckinna ca'a assaan ittanni woyyonsaan. 27 Tinni barruwwa muxendechchi uduma, saddeetesoxxe barranaa'ni qeesole ha'noka ciincatika tolchanna mittummatika tolcha tolchimalchoke'n shiqishsha. Ookkonechchi uduma aninna ha'no'n gammadanon» hiyya'neen Lumok Duuchchi Woddik Gootti.✝