1 Sase tomme wogga'n sholgake agenjixxe ondixxe barra'n Kebaarike galaani qarqara booji'emeemmake mannixxe oddo'n hedhee'naa, iimmuwwa banende; aninna Mageniinxa waleella uuddenne.✝

2 Moyanji Iyo'aakinni booji'emeexxe ondixxe wogga'n sholgake agenjixxe ondixxe barra'n,✝ 3 Baabiloonke mannike boga'n Kebaarike galaani bira Duuchchi Woddike Goottik hiyyichchi Buuzike belto'n anee qeessichcho Hiziqeeli'n dage; ookkonna Duuchchi Woddike Goottixxi hunna ane'ni hexxemman. 4 Aninna tammi asse uudenne wodda hobonbalte middi darrenaa'n dagge; tinninna jabaki ifinninni elqe kayyii'n buqqeexxe, banqo balaaqisaammak ha'uraake duumanchamman; eettene giiraxxe oddo giddi holateeke sibiljo fakkaata'nemman. 5 Ise giddonna shoole manjo fakkaattaaxxi dada hexxemman.✝ 6 Yaane kinni mitti mittiing shoole albanna shoole keela afeeman. 7 Lekka konneechchiirixxi toggi hiteexxemman; lekkattixxi faannanna jabbettixxe kotteshsha hexxeexxe kaddaa wodda lekkattinna morondemeeke sagetootike sibilsha cala cala hitaa'emman. 8 Eetten Shoolii darre'n manjo fakkaattammaxxe daduwwa keelluwwi hunda manjiinxe anga fakkaattaaxxe anguwwa hexxemman; koonneechchuwwik shooliingi albuwwinna keelluwwa afe'eeman. 9 Konneechchuwwik keelluwwinna weli'aanni weli tuqa'eemman; mitti mittingi toggi hiyye edi'a me'aa'nemman; udumi'aanna wirri hiyye uunda'emabaan. 10 Konneechchuwwik albuwwinna labaama qici: shooliingi mitti mitti edi darre'n manjiinka alba afe'eemmaaran; middi darree'n neenqiinka alba, bita'i darree'ninna jibbichchiinka alba afe'eemaaran; mitti mittingi kinnichchiiri udumii'n sinbiriinka alba afe'eemmaaran.✝ 11 Yooni kunni qici albi konneechchuwwik fakkaataamma qicon. Konneechchuwwik Keelluwwinna iimi'a farri hiyyeemman; kunni mitti mittingichchuwwi lame lame keela afe'eemman; mitti mittiniingik keeli weliinka keela tuqa'eemman; konneechchuwwik lami lami keeluwwi biso konneechchuwwika buqa'emman. 12 Mitti mittiniingi kunnichchuwwi edi'a toggi hiyye me'a'neemman; udumi'aanna wirri hiyyebaangi Mageniink hafuuri me'aammaba duuchchiinbaa me'a'neemman. 13 Tenne hedho affeexxe daduwwaxxi bifa ha'yita'neexxe giirake kashilo yookaan buba'neeke bubanjo fakkaata'eemman; eettene daduwwaxxe oddo'ninna giira elqenna kayya higa'n ha'yaammake qaqqassunjishsha lele'mita'emman; ifikkinna wa'a hiyyeemmakeemman; eettene giira giddii'ninna banqo fulda'nemman. Elqe kayya darbenda'emmani. 14 Iitti hedho affe'eexxi daduwwanna banqotike balaqishsha elqe kayya xalqise. 15 Tenne hedho affe'eexxa daduwwa tammi asse uudenne wodda eettene shoole albuwwa afe'eemmaxxe mitte mittende dada bira butti darree'n mitte mitte mole afenne.✝ 16 Eettene mitte mittende molexxi bifanna giissendeemma qici: fiixe'eeke kinjishsha cala cala hitaa'eemman; iitti shooliinxi mole weli labbaaxxe kaddeexxi mitte mittend mole wele mole giddo sikkendeexxi giissendeexxe fakkaatta'nemman. 17 Me'itaamma woddanna daduwwa welebaa wirri hitebaang shoolii darre duuchcha'n me'a dandeeta'eemman; daduwwa me'itaa woddanna moluwwa elqe kayyi'a hita'eemmabaan. 18 Moluwwatinna lumoxxenna sodaachissaaxxemman; shooliinxe moluwwake kasike qarqara'ni illuwwa wo'mitteemman.✝ 19 Iitti hedho affe'eexxi daduwwa lele'mitaa wodda qarqara konneechchuwwike'n hexxeexxi moluwwanna lele'miitaamman; iitti hedho affe'eexxi daduwwa buttii'n iimi'a qophphi hitaa wodda iittti moluwwanna weltinni iimi'a qophphi hita'eemman. 20 Daduwwa Mageniink Hafuuri me'ee boonchi duuchchibaa me'itaamman; iikki hedhotik Hafuuri moluwwa giddo hedheemmaxxee moluwwa insa'nenni welti kexxaamman. 21 Daduwwa lele'mitaa wodda moluwwa lele'mitaan; hedho affeexxi daduwwa uurritaa wodda moluwwatinna uurritaan; daduwwa butti'n iimi'a qophiphi hita wodda moluwwa giddo hedhotik Hafuur hedhemaxxee'e moluwwatinna daduwwati welti iimi'a qophphi hitaan. 22 Hedho affeexxe daduwwa umi iimi darre sodaachisachchinna daa'witetishsha calacala hiyye ille siphphi siphphi assaachchi dhisendeexxe iima fakataachchi isi iimi darre hedheman.✝ 23 Dhisendeexxe iima butti darrenna mitte mittendi dada keeluwwa welekiba'a farri hiyyeekanna biso ifika buqexxaaxxa lame keela affe'eemman. 24 Hedho affeexxi daduwwa me'itaa wodda keela isekika luuljo laqenne; luuljikinna dageemmake wedi'ike luuljishsha Dada Duuchcha ajajaake Magenixxe dindinsoshshanna loliinke mannike cancishshatemman; me'a waaldaa wodda keeluwwa ifika bukki assexxaan. 25 Me'a waaldeexxi keeluwwa bukki assexxeeshshanni umo iseki iimi darre hexxeexxe dhisendeexxe iima iimi darree'n hafuuri laqeme.✝ 26 Umi isek iimii darre hexxeexxe dhisendeexxe iima iimi darre senpheere hiyyemaake fiixxeke kinjixxe moote fakaataachchi hedhemman; mooteti hananna manjiinxa bifa fakkaataki hedhemani. 27 Hidha isike fakkaatachchinni iimi'a giirattixxe oddo'n hedheeke holateeke sibiljishsha, hidhiki butti'a giira fakkaata'naa uudenne; wa'a hiyyeek ifinna qarqara isike'n hedhemman.✝ 28 Xeeniinxa barra duummanchi giddo leellammake dowwichchiinsha qarqara isike'n hedhemmak wa'a hiyyeek ifi ittandemman.

Kunninna Duuchchi Woddike Goottike ulfinnike fakkeennamman. Aninna isoo uuddenne wodda albikii buttinake'n gonbisemennexxi haasoa'neeke mitte manjika hafuura laqenne.