1 «Koo manjiinke belto faarinxa mitte xuube aaxxee ati albi edi darre uggitee Iyyerusaalemike qachchika kaarta itti giissi. 2 Ookkoneechchi uduma lolinki manni isee buqeemmashsha assite buqi; ayyinna fulabaashsha dalla'a iseke qarqara'n giissi, loliinke mannixxa kollo dalla'i gadhi darre'n giissi, iimi qico'n buttinakanna tullub; dalla'a iseka diigaatika lumoke haqichchika gubbo qarqara isike'ni uggi. 3 Sibljiinxa she'la aaxxettexxi atixxenna qachchiinxe oddo'n sibljinke dalla'ishsha uurrisi; fuggoxxe illenni ise'e uudi; isinna buqemeeke kadaan; atinna isoo buqqatton; tinni Isira'eelike ardi'a xexxe'achchiisatike beessisa kaddaan.

4 «Ookkoneechchi uduma bita'ike cinaachcha'n diiphi; tinninna Isira'eelike ardi cubbo ifixxe xixeemaaxxa beessisake kaddaan; konne bita'ike cinaachcha'n irkattoxxee bariinke laakkossixxe qixxe'ni Isiraa'eeli ardi hitta xixeemaaxxa leellishshatton. 5 Isira'eelik ardi cubbo ifixxee hitta xixeemaaxxa leellishatee 390 barruwwa irkattotta'a atee murronseennen; mitte mittendi itti barra mitte mitte xixichchiinxe wogga leellishshaan.

6 «Tennee iitta assa muuxxeteelchi uduma kinni Yihuda ardi cubbo ifixxee hitta xixeemaaxxa leellishatee middike cinaachcha'n iittanni 40 barra'a irkattotta'a ani atee murroonse'eennen; mitti mittendi barra insa'neke xixichchixxe mitte mitte wogga leellishaan. 7 Alba atika Iyyerusaalemixxe buqenshaba'a wirri hiyyi; angatanna tunutumeessite ise'n raaga raagi. 8 Buqenshatixxi barruwwanna muuxendaa qico'n mitti cinaachchinaa'ni mittinba'a wirri hitabexxoshsha wodaroti atee usurannon.

9 «Dinnetanna so'a, baaqelakkanna misira iittanni mishinqanna darga'e aaxxe'e oddoolcho giddo uggitee ookkoneechchi uduma umo atengee ita ra'isedhi; sase dhibbanna sallane tomme barra cinaachik irkattatto wodda isee'e ittatton. 10 Barra barra'nde'n oobo mitte, mikka'ni murendeexxe yanna'n ittaton. 11 Ha'witattoka wode'enna mikka'ni barrate'ni lame bekeedhe murendeexxe yanna'n ha'witatton. 12 Bageeke manjiinke fooli'a'ni giira ha'ishetexxi ardi duuchchii edo isoo so'iinke buddeenishsha ra'issexxe ittatton. 13 Duuchchi Woddiki Goottinna, «Konne qicinni Isira'eelika arda gosa gosake ardi giddi'a xeerranno wodda battootteexxa ita itaan» hiyye.

14 Aninna hiisse hiyyeene qici, «Ee! dada Duuchchike duuchchi Woddike Goottaa! Haranga batto'e ege'nebo'non; oosummandenaa'n telchi qico'n reyeeka yookaan biniichchi shiyeeka ite ege'nebo'non; batto'eeka maalanna afo'o anke'n maqebo'non.»

15 Duuchchi Woddik Goottinna anee'e, «Eloxxen, eega manjiinke foolo'ixxa bakka horiinxa faando adhdhitettexxi isoo ha'ishshe buddeena ra'issitattoshsha assannon» hiyye.

16 Isinna ookkoneechchi uduma anee: «Koo manjiinke beltoo! Qalbeeffati, Iyyerusaalemibaa daggammaxxi ita gattaashsha assona'aten; ardikinna murendeexxa ita rakkoti itaan; mikemeeka wode'enna ruphphi hiyya'nek ha'waan. 17 Tinninna itattixxenna wodi'iinxi gophensha hexxaammaxxe'e ardi weli'aanni weli uudaa wodda alayyaan; hunjeemmaxxe cubbonaa'n kexxeexxa shonqoroorree lugginaan.