1 Duuchchi Woddike Goottik hiyyichchi ane'n dageexxi: 2 «Koo manjiinke belto raaga raagga'neexxe Isira'eelixxe wabeeko'n raaga raagi yaada ifika raaga raagaakaara: ‹Duuchchi Woddike Goottika hiyyichcho laqqe! 3 Lumok Duuchchi Woddik Gootti: Mittelchonna afebaang ifika yaada hordofaaxxe gowwa wabeeko'a aanne'e! 4 Koo Isira'eelike ardaa wabeekole ha'noxxi oleti giddo hexxammaxxe yayyuwwashshaten. 5 Duuchchi Woddike Goottixxe barrake lola'n jabaante uurrinaashsha diigemeeka kinjiinka dalla'a Isira'eelike ardi'a qammalchitino'a alalle martineba'a. 6 Insa'ne uunda'neexxi leellanna dharaken; moro insaneexxinna sobaken; Duuchchi Woddik Gootti insa'nee ergebaang, «Duuchchi Woddik Gootti hiyya'nee qici» hinaan; yaane kinni haasonemmaxxi muuxendo'a heqqenaa'n. 7 Ani haaso'ebe'nong «Duuchchi Woddik Gootti hiyya'nee qici» hitinaa wodda dharitte waleella uudinebaata? Dharinxa moro mortinebaata?

8 « ‹Tennexxee Lumok Duuchchi Woddiki Goottinna hiyyichchi ha'nok dharake, leella ha'noxxinna sobake kaddemmaxxee ani ha'no'n ke'eennen; ani Lumoke Duuchchi Woddik Gootti tenne haasoe'ennen 9 Dharinxa waleella uuddaxxe'ninna sobik mortaaxxe wabeekole'n ani ke'annon; Insa'ne arda ankixxe songo giddo he'nabaan; Isira'eelike ardi boreessemmake maxaafa'ninna borreesamabaan; Isira'eelike boga'inna e'yinabaan; ookkone wodda ani Lumoke Duuchchi Woddike Gootta kadennexxa egendinaan.

10 « ‹Tinni wabeekole nage'i hedhebaang «Nage'aken» hita'n arda anka dedhissemmaxxee insa'ne dooqqexxe gimo'n boo'e issati qammalcheeke hujalluwwa lanbaa.✝ 11 Tennexxee gimo itti ibaaxxa boo'e issammakera'n kuli. Baradi xeeni ganaan; jabaxxa kaadenna wocci assannon; hobonbaltetinna isoo gandaan. 12 Dalla'i ibaa wodda ardi ha'noo «Iso'n isitinemmaxxi boo'e haba hexxe hiyye ha'noo qorabaata?» hiyye.

13 «‹Tennexxee Lumok Duuchchi Woddik Goottinna aare anxenni hobonbalte baradakannna kaade eettenne gimo'n wocci assee isoo diigannon. 14 Ha'nooxxa noora issitinemmaxxa gimonna diigannon; booso isixxi banqarte leellitaa qico'n buttink buttinake assannon; gimo ibaa wodda ha'nonna isi giddo muddinaan; ookkone wodda ha'nonna ani Duuchchi Woddik Gootta kadennexxa egendinaan. 15 Aare anxi qiida qico'n gimote'n boo'e isseeke manna xixannon; dalla'akanna diigannon; ookkonechchi uduma ani ha'no'n, «Gimo ittinna ise'n boo'e issemmak manni hedhebaan hiyyannon. 16 Iyyerusaalemi'a wabeekumma haasotemmaxxinna nage'i hedhebaang nage'inxa waleella ise'a uuddemmaxxi tenne Isira'eelixxe wabeekkolen; hiyya'neen Luomk Duuchchi Woddike Gootti.» ›

17 «Ta'anna koo manjiinke belto yaada ifikenaa'n raaga raaggaaxxe atike ardixxe dubarteba'a alba wirri hitee insa'ne'n raaga raagi 18 hitatto qici, ‹Lumok Duuchchi Woddik Goottinna: Ardinxa lubbo fonxoratee gojotika qudhaama ifixxe angake mikita duuchcha'n gobilsitaaxxeri'anna gargar gargar hexxeexxe qeerrinixxa umo buqecatixxa boonde giissexxaaxxe melaalle'a aanne'e! Ha'no anke ardixxa lubbo addandina'n kinni ifixxa lubbo anjidhitinaata? 19 Oobo wo'mabaake so'i'anna kutisanjo buddeeni'a hitineexxi dhara laqaaka anka arda sobbiyyoti reyammabaakaara shiyiyyoti, hedhiyyo hasisabaakaara gatisiyyoti arda anki giddo anee salphissine'een.

20 « ‹Tennnexxe Lumok Duuchchi Woddik Gootti Ardinxa lubbo ci'atishsha fonxortineeke qudhaama'n ke'edhennen; ha'noxxe angake mikitinaa'inna isoo dadarannon; ci'atishshanna fonxortineeka ardanna ha'noxxe anga'n fulchannon. 21 Ha'noka umo buqecatixxa boondenna daddarennexxi arda anka ha'noxxe anganaa'n anjirannon; ta'inni edi'a insa'ne ha'no unda galabaan; eettene yanna ani Duuchchi Woddike Gootta kadennexxa egendinaan. 22 Ani yaadisebe'noka qulcha manjo dharik yaadissinemmaxxee, fuggichchi fuggoke orinaa'n higeexxi lubbo ifixxa anjirabaashsha cubbote'n tirtirsitnemmaxxee, 23 Ta'anni edi'a tinni melaalle dharnixa waleella uuddinaba'a; morotanna mortinaba'a; arda anka ha'nooxxe anganaa'n anjirannon; eettene yanna ani Duuchchi Woddike Gootta kadennexxa egendinaan.› »