1 «Isira'eelixxe Hayyoolexxee boochchisa 2 hite fulchitatto qici:

« ‹Ama atixxi neenquwwi giddo hitatta

hexxeexxe neenqamma'a!

Neenquwwinxe lummexxeexxe beltanaxxe odo'n wexxi hiteexxi

beltanna ifixxa nossexxe.

3 Ifixxe beltanna giddii'n mitte nossite,

isinna worba neenqa kade;

Adame ninnifa barate;

manjokanna ite.

4 Odo isixxinna gosa gosake arda'n laqende;

insinna insa'ne qontexxe balle giddo abideme;

Insa'nenna isoo haachchabik usurre,

Gibtsee boga'n iyyemarre.

5 « ‹Heddeexxi yaane wo'mitebaaxxa,

addatteexxinna baxxeeexxa isenna udde wodda,

Ifixxe beltannuwanaa'n wele aaxxeexxi,

worba neenqa aasite nossite.

6 Isinna neenquwwi giddo mammareme,

worbakenna kade;

Adame ninnifatanna barate;

manjokanna ite.

7 Kinjiinka insa'neka dalla'uwwanna diige;

qachchuwwa insa'nekaaranna findige;

Bogi ookkonna giddo hedhemmak manni duuchchi,

isixxe ittansonaa'n kexxeexxa culphise;

8 Qarqarake'n hedheek gosa gosak ardi iso'n ke'e;

boga boga duuchchinaa'n iso'n bukkiyye;

Fonxoro ifixxanna isi'a fanne;

isinna insa'ne qonteexxe bale giddo e'ye abideme.

9 Haachchabik usurreexxi,

Isoo Baabiloonike moyanjiba iyyedange;

haafuri iski langaxxa Isira'eelixxe koobuwwa hana,

laqemabaashsha, usurinke mini giddo isoo e'yinshe.

10 « ‹Ama atixxi wode'inii qarqara kaasemeeke, fichchake'n hedheeke,

wodde'inxe birasa'nenaa'n kexxeexxa,

Barqaaqe gummiseeke woyyinetike hiddichcho

fakkaatteemman.

11 Damuwwa iseexxi galchalixxe bokko'a,

kaddaaxxe jabaxxeramman;

Isenna bankararteexxe ifixxe damuwwa giddo,

ejjuma qeerreexxeexxi ifixxe damuwwake,

tagagginninni adda leellita'nemman.

12 Yaane kinni aareti goshende buttinake'n hunnende;

butti'anna hunde;

Boroti darreexxi qiilla gammoojjexxi diidallo isee bassite;

gumma iseexxanna harcaasse;

Jabaxxi isexxi damuwwanna bagge'naa,

giiratinna isee itte.

13 Ta'a shamini wode'i hedhebaake bagoke boga'n,

qiilla gammoojje giddo kaaseende.

14 Umoke kaddeexxe isexxe damenaa'ni giira fulde;

giiratinna gumma isexxanna itte;

Galchaliixxe bokko'a kaddaaxxi

mitte jabaxxi damenna ise'n gattebaan.›

Kunni boochchisaken; wi'lishshatishshatenna kaddan.»