1 Booji'emennexxe Sallanixxe wogga'n tommike agenjixxe tommixxe barra'n Duuchchi Woddike Goottik hiyyichchi ane'n dageexxi: 2 «Koo manjiinke belto, Baabiloonik moyanji tennee barra'n Iyyerusaalemika qachcha buqeen; telchiixxe barraxxa barraka summa borreesi. 3 Konne jallichcha ardiinxe mammaaka'ni: Lumok ‹Duuchchi Woddiki Gootti insa'nee hiyya'neen hitatoo qici:

« ‹Disite booso uggi;

wode'ekanna iti wori.

4 Maalakena'ni guma,

elolaamma wowwoxemee maala duuchcha, luka, haye,

Filendexxa miqqenna ise'n wonshi.

5 Filemeeka gedhebokenaa'n aadhi;

Miqe isixxinna raxxo'a disteti hunda, haqqe tuuli;

raxxe musukki hittaashsha assi;

miqqe isixxinna raxxowaal.

6 Tennexxee Lumok Duuchchi Woddik Gootti hiyya'nee qici:

« ‹Ookkone munde manjiinxa dhangalaaseeke qachchi'a aanne'e!

isi ciilakenaa'ninna luqqitebaaxxe disteshaten;

munde dhangalaaseke qachchi'a aanne'e;

Gargar hiissitatoka hixa ibissebexong,

mitti mittinga maala giddii'n fulchite disite duwwi gatis.

7 Dhangalaatexxi munde qachchi giddo hexxeen;

qachchiink manni care duwwixxe'n munde dune malee'e;

Bukko buqa dandeetake,

buttina'n dhangalaaseba'a.

8 Aare anxi bubbe'na'a halo fulonna'a,

munde itti buyyendabaa qico'n,

care duwwixxe'n dhangalaataashsha assenne.

9 Tennexxee Lumok Duuchchi Woddik Gootti hiyya'nee qici:

« ‹Munde manjiinxa dhangalaaseeke qachchi'a aanne'e!

Aninna, iittanni isi gubataaxxa haqqe tuulannon.

10 Haqqetanna tuuli;

giiratanna itti ha'ishshi;

Maalakanna adda gafi;

qimamuwwatanna iso'n wori;

miqetinna gubatowaal.

11 Xuri isek ke'o'a

ciili isekinna gubato'a,

Eebbitaa qici'a duwwixa disite

maalde'i isekinna diimmata qici'a kashiloke'n uggi.

12 Jaba qico eloosiseek isek ciil,

bira sa'netenaa'n kexxeexxa,

giiratinna midde ba'ebaan.

13 « ‹Ati battotetek atixxe qii'misanniten; ani atee luqqi assonna'a wo'laanenen yane kinni ati luqqitebexxo, mufe anxa ate'n bidhano qici'a ta'anni edi'a luqqitabexxo.

14 « ‹Ani Duuchchi Woddik Gootti haaso'ennen. Hujannoxxi yannanna gelte'een. Udumi'a higabo'no; mararabo'no, hoodatanna hoodabo'no. Me'injo atikishshanna huje atixxishshaani ate'n murannon; hiyya'neen Lumok Duuchchi Woddiki Gootti.› »

15 Duuchchi Woddike Goottik hiyyichchi ane'n higgeen dageexxi: 16 «Koo manjiinke belto ati ille uggiteetexxa ikki woddi atenaa'n adhdhonaaten; kinni ooxxoxxe'e; indidotanna fulchitoxxe'e. 17 Fiixisi malee reyeekee ooxxoxxe'e. Ruufatanna umokenaa'n hoyyitoxxee; leekatenaa'ninna kophe fulchchitoxxe'e; yaaddo leellishatee suumeti qico'n buqexxoxxe'e; haqaqotanna ittoxxe'e.»

18 Aninna ardake'n gorsa haaso'ennen; galgala eetteneen are anxinna rerte; langa baro gorsa aninna ajajemennexxa assenne.

19 Ardiknna, «Assitettexxi tinni yaane no'o'a maa erga affe'eexxa no'o'n kuldabexxoo?» hiyye anee qore.

20 Aninna insa'ne'n hiyyennee qici: «Duuchchi Woddike goottik hiyyichchi ane'n dageexxi: 21 Isira'eelike arda'n hiyyi hiyyee qici: ‹Ani ha'nooxxe hollaxxee hunna hiyya'nen Duuchchi Woddik Gootti: ha'no ille uggudhitine'ekanna ha'noxxe qalbexxe gammashsho kade'eeka anka galma battosona'aten. Waaldine me'itinemmaxxi ha'nooxxi labba meyyaxxi oose wolaantichchoke'n rertaan. 22 Ha'nonna ani assennashsha assitinaan. Yaaddo leelshate suumeti qico'n buqexxinabaan, haqaqotanna itinabaan. 23 Ruufatanna umokenaa'n hoyyexxinaba'a, kophetanna leekkatenaa'n fulchchexxinaba'a. Cubbo ha'nooxxenaa'n kexxeexxa tallalootina; weli'a fiixisinaa malee oodhishsha afoldinabaan yookaan ooxxinabaan. 24 Hiziqeeli ha'no'aa beesisake kadaan; isi assemmashsha ha'noonna assitinaan tinni kaddaa wodda ani Lumoke Duuchchi Woddike Gootta kadennexxa egendinaan.›

25 «Atinna, koo manjiinke belto, insa'nexxa hunna, gammachcho insa'nexxanna gaachchanna insa'neka, insa'ne ille uggudhinnaaxxa insa'nexxa ifi duka kade'aka galmanna labba meyyaxxa oose insa'nexxenninni insa'nenaa'n aadhdhannoxxa barra 26 eettene barra ba'netenaa'n gateek manji tenne odo ate'n oddeeso'a dagaan. 27 Eettene barra afo'i atik baneme'naa isinni haasottatton; ookkoneechchi uduma afo'o duudake kaddabexxon; ardakeenna beessisake kaddatton; insa'nenna ani Duuchchi Woddike Gootta kadennexxa egennaan.»