1 Koo Duuchchi Woddike Gootta! No'o'n gelteexxa hedi;

uudi, salphinne no'okanna afi!

2 Qadaadi no'ok alaguwwakee

mini no'okinna annafeeke manni'a uwwemedheen.

3 No'o anni hedhebaake manna

ammuwwa no'oxinna aro'o shi'witeexxe hiyyeette kadde'een.

4 Wode'e maalaqik ha'wine;

haqqetanna maalaqiki hidhdha hasisaan.

5 Qanbar fe'emeeke horiinsha oofemiyyot

lumoshsha kurbu hinenne; hafuura adhdhanna hoyyemmenne.

6 Goddine indonna'a hinee

Gibtsee'anna Asoori'a anga uunenne.

7 Annuwwi edik no'ok cubbo huje sa'ne;

no'o kinni insa'nexxe balleessa'a xixemmenne.

8 Garbi no'o'n moyedheen;

anga insa'nexxenaa'ninna no'o dande'e fulchaak ayyinna hedheba'a.

9 Qiilla gammoojje giddo manjo anga sa'a hedhatenaa'n kexxeexxa,

lubbo no'oxxa gurgudhineete indanochcho alfinennen.

10 Gubaake solo'inke holatinaa'n kexxeexxa

bisi no'ok qaqiinsha xiledhe.

11 Tsiyooni giddo melaalle

Yihudake qachchuwwa'ninna dubarra hunnati diinphe.

12 Akeekisanjuwwi no'ok anga insa'neexxe'n fanniseme;

geedhuwwatinna ulfeesendeba'a.

13 Dargaggeeyye daamma daltaashsha assende;

labbaxxi oose haqqe dukati lelleqqe.

14 Geedhe qachchinxe hula'n offo'la waalde;

dargaggeeyye sirbitammaka sirba uurrise.

15 Gammashsho qalbe no'oxenaa'n baxxe;

sirb no'ok yaadote'n jijjiremeen.

16 Kallachchi no'oke uminaa'n ibe'een;

cubbo hunje'enaxxee aanne no'o'a.

17 Tennenaa'n kexxeexxa qalbe no'o ela gophphe;

tenne yaanuwwaxxeeranna ille no'oxxi garjite.

18 Urmite gattetexxe tee Tsiyoonixxi Kooba,

jeedaluwwinxe dikka kadde'en.

19 Ee, koo Duuchchi Woddike Gootta! Ati duuchchi woddike mootichcha;

moote atixxi ila ila'a hexxaan.

20 Ati maayee hara no'o'o deetete?

Mayeeta no'o qeerake bari'a waaldette?

21 Ee, Duuchchi Woddike Gootta! Atiba'a hingona'a no'o hiisi

jiro no'oxxa olmi woddishsha haaronsi.

22 Haranga anee waldetten;

yo'oshanna ane'ni mufateeten.