1 Mageniinxe mufetixxe siqqoxxa

rakko uudennek manji anten.

2 Ifi edii'n anee fulcheexxi

ifake kadebaak, dukkana giddo me'annoshsha asse.

3 Barra duuchcha, hige higeexxi

anga ifixxenni anee gane.

4 Isi goga ankanna maala anka cinse;

miqe anxanna enqe.

5 Qaraarto yaaddokanna rakkoka

dalla'a ane'n ijaare, ane'e qoqqobe.

6 Edo, qeeraxxe yanna'n reyemmakeerishsha

dukkana giddo hedhannoshsha asse.

7 Fulabonoshsha qarqara anke'ni dalla'a ijaare;

usuremeneka haachchabanna ane'n a'urse.

8 Gargaarsa halse ye'edhenne wodda midde

soodachcho anxa laqa gibe.

9 Ora anka bocendeexxe kinonn duuchche;

qaxaamura ankanna midamiddichchake asse.

10 Gaadammake dibbi hinaake biniichishsha

sho'ommemake neenqishshanna,

11 Harkise orakenaa'n anee fulche kochchiseexxi

duwwi anee gatise.

12 Gabe dobeexxi

ifike mogidixxe ille anee assedhe.

13 Mogiduwwa gonofakenaa'n fulcheexxi

onna anaxxa ote.

14 Anke ardi duuchchi'a oso'lichchiinke kadenne;

barra duuchcha sirbinaa'n ane'n gacifante.

15 Hedho anxa rakkoti qaraarse

heexote asse.

16 Isso anxa kinot enqee;

bukko giddonna anee hirbeesse.

17 Hedho anxi nage'a gophphe;

gammashsho maacho kaddeexxa dedhenne.

18 Tennexxee, «Ulfaata anke,

Duuchchi Woddike Goottanaa'n heqqedhannaxxi addachchiisa duuchchanna gatte'een» hiyyenne.

19 Wixixxinna doonsa kiyya anixxa qaabata

ane'n heexotenna ha'lootote kadde.

20 Tennera hedaa'naa

hedho ani giddo xo'o hite.

21 Kaddo malee mitte yaane heda

ossunte ane'n wo'nshite; tinninna

22 Mundeebo'nok ganteenek Duuchchi Woddike Goottixxe lumoxxe jaalalaxxeeten;

mararte isixxinna hara muddabaaxxen.

23 Isenna gorsa gorsa'ninna haaroxxe;

addatensha isixxinna lumoxxe.

24 Ani ifi'anni, «Duuchchi Woddik Gootti anke qoobbon

tennexxee isoo heqedhannon» hiyyenne.

25 Isoo heqqedhakeeri'a,

halsaake manji'a Duuchchi Woddik Gootti eloken.

26 Manji Duuchchi Woddike Goottixxa anjira

sammi hiyye heqqedha eloxxen.

27 Manji dargageesummate'n

qanbara ba'edha eloxen.

28 Iso'ni Dada Duuchchik Gootti qanbara ba'isemmaxxee,

qofitti sammi hiyye offo'lowwaal.

29 Edi'a adde isi'a hedhaa dandeetammaxxee'e

bukkote'n ifi moogowwaal.

30 Dhabanaasaake boqo ifixxa gedowwaal

salphinekanna goddowwaal.

31 Dada Duuchchik Gootti manjo,

duuchchi woddi'a hune waalabaan.

32 Yaaddo manjoke'n geltashsha asseexxe kaddoolenna

bira saxxeexxe ifixxe jalalanaa'n kexxeexxa mararaan.

33 Tinninna kaddeechchi isi anga ifixxenni

manjiinke belto'n rakko daggaashsha assa gopheemmaxxeten.

34 Bogi giddik usuremalluwwi duuchchi

lekkati hirbeesemaa wodda,

35 Dada Duuchchike Duuchchi Woddike Gootti edo

seeriinxa ifixxa yaane manji gophaa wodda,

36 Mitte manjo'n yaane seerin gadho murendaa wodda

Dada Duuchchik Gootti eetene yaane afabaata?

37 Dada Duuchchiki Gootti mureexxe yaane kadde'exxe malee

hiyyeexxa assa dande'aak ayyete?

38 Eloxxenna kaddo elobaaxxi yaane kaddaak

Dada Duuchchike Duuchchi Woddik Gootti haaso'ee qicishatebaata?

39 Hedhot hedheek manji hujeexxe cubboxxee

xixemaa wodda mayee gunguma?

40 Ora no'oka qonte qonise uundo

Duuchchi Woddike Goottiba'anna hingo.

41 Qalbe anga no'oxxen welti

iima hedheek mageniba'a ke'isinno; hinnano qici,

42 «Cubbo hunje'ennen; jalline'enen;

atinna no'o'a gattowwaal hiteeboxxon.

43 «Yo'oshsha mufatte no'o fiisitete;

mararte belo no'o shilteten.

44 Soodachcho no'oxxi atiba geltabaashsha

duumachchik ifi buqeexxette.

45 Gosa gosake ardi giddo

no'o ceegenshanna koriinsha assiteten.

46 «Naaphi no'ok duuchchi,

afo'o ifka no'o'ni fulchedhe.

47 Bararaqatinna iba

iittaanni diigenshatinna ba'ne no'o'ni gelte.»

48 Ardi ank gelteexxe ba'nenaa'n kexxeexxa

ille anxenaa'n indiddo galaani wode'ishsha yaate.

49 Ille anxenaa'n indiddo wode'uffa yaata;

sammitte yaataan,

50 Tinninna kaddaak

Duuchchi Woddik Gootti iimi'n butti'a

no'o uuda qici'aten.

51 Qachcha anke'ni hexxeexxe dubarte duuchcha'ni gelteexxa uuda anxi

anee yaadisse.

52 Mitte buuto belo anke naapha kade'emmakiir

ci'uffa anee adamme.

53 Bale giddo lubbo ane'e balleessino'a

ane'ninna kino darbine;

54 Wodi'i anke umi hanii'ni yaa'e;

ba'eneelcho ane'ni labbe.

55 Dhi'mo bale giddo hedhennexxi

Ee, Duuchchi Woddike Gootta summa atika ye'edhenne.

56 Kadha anxa laqe'eten; gargaarsa halse wiiganno wodda

laqa gibate'e mansha buqexxoxxee.

57 Ate'e ye'edhenne wodda ani bira shiqetexxi

ane'e «Sodaatoxxe» hitette.

58 Ee, Dada Duuchchike Gootta! Anxe yaanexxe tukke kadde'e;

hedho anxa woddette.

59 Ee, Dada Duuchchike Goottaa! Ane'n assemmeka mancira duuchcha uude'eten;

murte anxa ani'a muri.

60 Naaphi anki ani'a afeexxa halonna

ane'ni hedeeka daba duuchcha uudeeten.

61 Ee, Dada Duuchchike Goottaa! Yowwichcho insa'neka duuchcha;

ane'n hendeeka daba duuchcha laqqe'eten;

62 Kunninna naaphi ank barra duuchcha

anee hashasha'nexxeenna gunguma'nexxeeten.

63 Ofo'lanna ke'a insa'nexxa uudi;

sirbik ane'n gacifanta'neen.

64 Ee, Duuchchi Woddike Goottaa! Insa'nexxe angaxxe huje'a

geyaaka hira insa'ne'a uwwi.

65 Maa hiyyemunuu qalbe insa'nexxenaa'n hoyyi

badino atixxinna insa'ne'ni hexxuun.

66 Duuchchi Woddik Gootti mufet insa'ne fiiseexxi

iimati butti'a insa'ne birowwaal.