1 Dada duuchchik Gootti ifixxe mufenni,

Tsiyooni'i hittatta salphisee!*

Eetennee Isira'eelike ulfinna kadeemmaka iimi'n butti'a darbe;

ifixxe mufexxa barra

ifixxe lekkake hadhisanjo kada isexxanna qalbeefatebaan.

2 Isira'eelike ardika galduma duuchcha,

Dada duuchchiki Gootti mararte belo balleesse;

Yihudake ardixxa kollowwanna mufe ifixxenn diige bire

Mootumma isixxanna hayyoole isixxa,

salphise'e butta dibbi asse.

3 Bubba'neexxe jabaxxe ifixxe mufenni

Isira'eelixxa hunna duuchcha gophise;

Suruureexxi naaphi dageexxa yanna

middixxa anga ifixxa illee iima hiisedhe.

Qarqara ifike'n hedheechcho duuchcha ittaammaxxe giirashsha,

Ya'iqoobixxe sanne'n bubenno bubbi asse.

4 Naaphiinsha mogido ifika dobe;

middixxi iifxxi anganna qophpheeffate;

Illete'n elaaka duuchcha;

naaphiinsha insa'ne gorra'e;

Tsiyoonike ardike duunkaana'n

aare ifixxa giiruffa wocci asse.

5 Dada duuchchik Gootti naaphuffa

Isira'eelika arda liqiinse;

Mootummatika isika minuwwanna balleesse;

kolluwwa isixxanna balleessse.

Yihudake arda'ni

wiiganna hunbaashsha bira sa'isse.

6 Galma ifika hiddichchiinxe bakkashsha duwwi gatise;

bukki hiteexxa ifixxa bakkanna diige.

Duuchchi Woddik Gootti Tsiyooni,

ifika ayyaanuwwanna ifika Edika Sanbatuwwa deetashsha asse;

Jabaxxe ifixxe mufenni,

moyanjokanna qeesichcho yo'oshsha tuffate.

7 Duuchchi Woddik Gootti tolchimalcho ifika gibe;

ifika Woyyichcha Galmanna waale;

Mootummatike minika dalla'uwwanna

naaphakee sa'isse uwwe.

Ayyaaniixxe barra'n assendammashsha

Duuchchi Woddike Goottike mine'n honga'ni cancine.

8 Duuchchi Woddik Gootti Tsiyoonke qachchike qarqara'ni hedheeka dalla'a diigo'a mudhdhe.

Miketixxa wodaronna ibise;

balleessatena'ni udumi'a higebaan.

Kolluwwakanna dalla'uwwa diige;

mitteba olete kande.

9 Huluwwa isexxi buttinake'n lixxe;

sibljiinka danqarsanjuwwa enqe balleesse.

Moyanjuwwi isikinna hayyoole isixxi booji'endeexxi gosa gosake ardi giddi'a booji'ende;

ta'anni edi'a yoona seeri olmiki hedhebaan.

Wabeeko isixxinna ta'anni edi'a

Duuchchi Woddike Goottinaa'n waleella insa'ne'a uwwendabaan.

10 Tsiyoonike qachchiinxi geedhe

buttinna duwwike'n sammi hitee offolde;

Umo ifike'n bukko fiffilxiteexxi

jooniyya seemmanna oddo'wite'een;

Iyyerusaalemik dubari

umo butti'aa hangulli asse.

11 Ardi ank shiyememmaxxee,

oosetinna annoole;

Qachchi giddike oruwwa'n wexeqendeemmaxxee'e

ille anxi oodhishshati garjite;

madhuma anixxi raafend;

godobikinna ane'e culphise.

12 Ookkone qachchiinke ora'ni otemeeke manjishsha shaqine gaggabee wodda,

lubbo insa'nexxi amatixxe anga'ni fula geltee'naa

«Indaachchinna woyinetixxi booka habaxxee?»

hita'ni oose ama ifixxa qortaan.

13 Ani ha'noo maa hiyyannoota?

Mayiki ha'noo fakkeesannotaa?

Koo eeyyendineeke Iyyerusaalemike qachchike ardaa!

Ha'noo dayyeesonnaa mayik ha'noo fakkeesanno?

gargar hexxineek koo Iyyerusalemik arda!

ha'noo'ni geltaaxxi ba'ni abbaayyatishsha ba'lake kadeemmaxxe'e,

ayyeteta ha'no fayyisutaa?

14 Ha'nooxxi wabeekoxxi waleella dharakenna toliinxe;

booji'o atixxanna hiisinaasha cubbo ha'nooxxa gatisatenna

cubbo ha'noxxa farri assine kuleba'a;

Haasonneek wabeekuminna dedhakenna

orakennaa'n gorsaken.

15 Ora sa'ak duuchchi;

anga insa'nexxa ate'ni calaan;

«Danchoomiinxi muxxe, butta duuchchixxi gammashsho

hiyyemek qachchi isi konnendee?»

Hina'ni umo le'minsati,

Iyyerusaalemi'ni gacifantaan.

16 Naaphi ha'nok duuchchi

afo'o ha'no'n fulchedhaan

Isso ha'no'n qara'ninna ha'no'ni gacifata'n

«Insa'nee liqinsineennen;

Halchinaannaxxi yanna tennetemman;

hedhondinni he'ne isee uundenne» hina.

17 Duuchchi Woddik Gootti hedeexxa muuxe;

qeeraxxe yanna edi gama haaso'emmaka

Hiyyichcho muuxxe;

mararte belo ha'no'o balleesse;

Naaphi wixixxi hiyya ha'nooxxe'n gammadaashsha,

naapha ha'nookixxa hunnanna jabeesse.

18 Koo Iyyerusaalemike dalla'i giddo hexxina'neke arda

mitte godobinni dada duuchchike Goottiba'a raare;

Hashsha barra

indiddo ha'nooxxi wode'uffa duneddowwaal;

Ifi'aani hafuura adhitinoqqee;

ille ha'nooxxenaa'ni indiddo qootoqqe'e.

19 Hashshixxi yanna geltaa wodda

kexxine, hashshat raarre;

Dada duuchchik Gootti edo qalbe ha'nooxxi wode'uffa cingitowwaal;

Ora ora'n solo'ik ibbeexxe

ha'nooxxe oosexxe hedho'a

soodachchot anga isiba'a ke'isse.

20 «Ee, duuchchi Woddike Gootta! Ballo uudi!

Konneechchi edo hoone arda'nite konne qico godoba kultite egendettek?

Amuwwa ifixxa anoole

kookkise nossiteexxa ifixxa oose ittaachchoo?

Wabeekinna qeesichchi

Duuchchi Woddike Goottike galmi giddo shiyemaachchota?

21 «Ori orixxe buko giddo

geerchikinna ka'untichchi ibe;

Ka'umi dubartenna ka'umi labballi

wolaantichchik shiyemme;

Atixxe mufexxa barra insa'nee shiltete;

mararte belonna dulemaashsha assitete.

22 «Ayyaaniixa barra ita ha'watee yexxattashsha

bararassa duuchchinn darre'n ane'n yexxete

Duuchchi Woddike Goottixxe mufexxa barra

ayyinna fulebaa yookaan gatebaan;

ile xoo'mamik nossedhennekaara,

naaphi anenaa'ni shiye bire.»