1 Worqe hitta shibbillite!

Eloxxi worqe hitta jijjiirende!

Galmi ijaarememmaxxi kino,

weldeenna weldeena'n xerendeen.

2 Ca'itte worqeshsha uudendeemmaxxi,

ulfaatto Tsiyoonixxi labbaxxi oose,

Faarinke hujallixxi anga,

ta'a hitta giisitemmake faarinke miya kadde!

3 Jeedaluwwi midde ununa farri assee beltanna ifixxa unuunsedha;

ank ardi kinni qiilla gammojeke balguduwwishsha

godoba jabaate.

4 Wode'e dheebo'watenaa'n kexxeexxa;

annooletik arabi quumeti quumete kade;

Oose ittaachcho kadhatte

yaane kinni mittikinna ittaachcho uwweba'a.

5 Elo eloxxa ita ita'emmakiir

ora oranni mude;

Baddeesitte seemma oddo'wa'n nophemmakiir

ta'a bululiinxe kose'n hana diiphe.

6 Arda anke'n geyeek xixichchi,

ayyixxi anganna kissebaang;

Hirbake'n ba'emmake,

Soodoomike qachchixxenaa'n caalde.✝

7 Hayyoole insa'nexxi kaadeti caala ca'a hiteexeramman;

addoti caalanna gola'liteexeramman;

Bisi insa'nek diimoke fiixa kinji calla dhiilletemma'a

dhagga insa'nexxinna senper hiyyemaake fiixa kinjishsha danchatema'a.

8 Ta'a kinni insa'ne cilaateti caala xille'ne'een;

orake'n insa'ne ayyinna ege'neba'a;

Bisi insa'nek miqeti miqete kade'een;

haqqetishshanna bage'een.

9 Solo'ik reyeekiir mannii'n,

wolantichchik reyeekaara woyya

Sagale buttin fulcheechcho gophatenaa'n kexxeexxa

solo'ik bange munde.

10 Ardi ank shiyememma wodda

ifi'a sagale kaddo'a

Olo'we melaalle anga ifixxenninni

finna ifika gaffe.✝

11 Duuchchi Woddike Gootti jabaxxa aare ifixxa muuxe;

bubbaaxxa ifixxa mufe dhangalaase.

Booso isexxi itendashsha

Tsiyooni'ni giira bubbi asse.

12 Naaphuwwakenna kado yabaabuluwwi,

Iyyerusaalemixxa huluwwa diinge e'yinaan hine,

Buttatike moyaanjuwwanna

yookaan buttatike arda duuchchana'ni amaneek ayyinna hedhemmabaan.

13 Yaane kinni tinni kaddeechchi

ise giddo qulliyyetixxa munde dundemmaxxe

Isexxe wabeekolexxe cubbonaa'n

isexxe qeesexxe balleessanaa'n kexxeexxenniten.

14 Insa'ne ille ba'eeke manjishsha,

orake'n gadaadonna.

Ayyinna seemma insa'nexxa dande'eexxi tuqaba qici'a,

mundeti battonne'een.

15 Manni insa'ne'e «Ha'no battoole ookko'a me'we!» hiyya'ne canca;

«Bayyatte! Bayyatte! No'o'o tuqinoqqe» hiyyaan;

Insa'ne baanja'n gadaadonnee wodda,

gosa gosake ardi giddo hedheek ardi, ta'anni kayyi'a,

«Insa'ne kaba hekki hiyya hasisabaan.»

16 Duuchchi Woddik Gootti umo ifingenninni insa'nee xeeredheen;

ta'anni kayyi'a insa'nee heqqabaan;

Qeese insa'neexxe ulfeesendebaan

geedhe insa''nexxinna elle alfitebaan.

17 Tolla boddichcha gargaarsa coo'minaa'naanni,

ille no'o gophphe;

Heqqecatixxe no'oxxe xelleepho hana he'ene no'o'o dande'eexxi,

anjirabaaka wele gosa gosa arda heqe'nenne.

18 Manni faana no'oxxa qore;

tennexxee ora me'a dandenebo'no;

Muuxami no'ok shiqe dagemmaxxee

bari no'okinna qubichchik laakko'emeeke; ba'ne no'oxxinna gelte'een.

19 Iimma me'ammake sinbiri caala

no'oo shorredhekiir xinniqa'ni

Koobuwwati hana no'o shorre;

qiilla gammoojje giddonna riphe no'o gaade.

20 Duuchchi Woddik Gootti harireek hedho no'oxxik hafuur,

insa'nexxe fonxoronni abideme;

Gaaddisi isiki hunda,

gosa gosake ardi giddo he'na'no hine hendeennan.

21 Ha'no Uuzike boga'n hexxina'neeke

koo Eedoomike arda gammadde, ilillisse!

Yaane kinni ha'no bado ha'noxxe'n;

Dada Duuchchike Goottixxe mufetixxe buudanaa'n,

ha'witine machchootineexxi saali belonna gatinaan.

22 Koo Iyyerusaalemike ardaa! Mura woxa ha'nooxxi muuxendaan;

isi ta'anni edi'a booji'o giddo turtinaashsha assabaan;

yaane kinni koo Eedoomike ardaa!

balleessa ha'noxxee mura woxxinaan;

cubbo ha'noxxinna faajje fuldaan.