1 Mitte wodda manni wo'me hedheemmaki qachchi

hittata hadiyyo'e gate!

Gosa gosake arduwwa'n lummedhdhe hedhemmak

hittatta aro'i reyeexxe hiyyeete labe!

Awuraajuwwiinxe oddo'n mootittete kade'emmaxxi

ta'a garbake kadde.

2 Hashsha cumumit hite ooxxaan;

indiddo boqo isexxeenaa'ni yaataan;

Iseke eeyyalluwwi duuchchi giddii'ni,

ise dayyeesaak mittikinna hedheba'a.

Jaaluwwi isek duuchchi isenaa'ni finqile;

naapha iseke kade.

3 Rakkatematixxenna hirbeessematixxe bira sa'neenaa'n kexxeexxa

Yihudiink ardi booji'eme;

Gosa gosa ardi giddonna offoldeen;

hafuura adhdhitaabanna gophphe;

Wixxi hiyyati giddo hexxe'naani,

isee shorrammak duuchchi isee dhaqabe.

4 Ege'nemeeka iseka ayyaanuwwa ulfeesatee'e

Ayyinna ulfeesatee'e daga gophammaxxee

Tsiyoonike bitumiixxe huluwwabaa e'yaakinna fulaak hedhebaan;

qeese isexxi duuchchinna fooxxi hitaan;

Dubarruwwi isek duuchchinna fuggo yaade'een;

isenna abara uudda.

5 Diini isek umo iseke kade;

naapha isekeeri'anna elde

Isexxe cubboxxe bira sa'nenaa'n

kexxeexxa Duuchchi Woddik Gootti yaaddo ise'ni geltaashsha asse;

Oose isexxanna naaphi boji'e

adhdhe me'e.

6 Tsiyoonixxi meyyaxxi belto,

gaachchanni duuchchi isenaa'ni lugge'een;

Hayyoole isexxi

bobba'aaba gopheeke gadansuwwishshaten,

Shorrishammakiir edo

hexxebaaxxe hunnanni baajje.

7 Wixixxi hiteemmaxxa doonsakiyya hitemmaxxa barruwwa

Iyyerusaalemi olmi baro'ni affemmaxxa,

karra duuchcha heddaan;

Ardi isek duuchchi naaphiinxe anga'n ibeexxa yanna

isee gargaarek ayyinna hedhemmabaan;

Naaphi isekinna isee uudeexxi

isexxe ba'neexxee isee ooso'le.

8 Iyyerusaalemi jaba qico cubbo hujjemmaxxee

tennexxee battootte;

saala iseka uudemmaxxee,

Isee ulfeesammakiir duuchchi isee tuffate;

isenna fooxxi hita'n

udumi'a higge.

9 Dubartetixxi aada ise ka'liteexxe seemma'n leellitte;

heger ise'n mayi geyaaxxa heddeba'a;

Iba isexxi yo'oshsha alashshiitaaxxe kadde

isee dayyeesaammakinna hedhemmaba'a;

Ee, Duuchchi Woddike Goottaa

naaphi injifatemmaxxee,

Rakko anxa uudi.

10 Ise horateexxe karra duuchcha'ni,

naaphi anga ifixxa laa'mi asse;

Atike ya'i giddo e'yabaashsha

hoyyiteetak,

Fakke magenooffatammak gosa gosak ardi,

galmi giddi'a e'ya'naa affe.

11 Ardi isek duuchchi itatika hassito

fooxxi hiyya'n oodhaan;

Hedhoti hedhatee'e,

ifixxa fiixa karra itati jijjiidhinaan;

«Ee, Duuchchi Woddike Gootta tuffatemme'naxxee

anee'e qallite uudi.»

12 «Ha'no ora saxxina'neeke duuchcha, tinni ha'no'a shollaxxe hiyyatebaata?

amme uude; affe;

Jabaxxe isixxe mufexxa barra,

Duuchchi Woddik Gootti ane'ni iyyedageexxe

Ane'ni gelteexxe,

anxe rakkoshsha hexxeexxi rakko hexxeeta?

13 «Iimmii'n giira erge,

iseenna butti'a, anixxe miqe giddi'a wocci assee

Lakka anixxenna fonxoro fayeexxi

uudumi'a anee hiisse;

Barra duuchcha shaqishshati,

anee duwwichcho asse waale.

14 «Cubbo anxi qanbarke ane'n kadde;

isixxe anganni mitteba wodarende;

Gooba aneke'ninna ba'ende;

dada duuchchik Goottinna hunna anee gophise;

Dande'enexxi ifinaa'n hoyyedhabe'nokeera'n

anee sa'isse uwwe.

15 «Ani giddo hedhemmaka loliinka manna duuchcha.

Dada duuchchik Gootti fuggusse.

Anke ka'umiwwixxa hunna bulleesso'a

sannachcha ane'n ye'e;

Eettene dubarichcho Yihudaxxa belto

dada duuchchik Gootti woyine miicatixxe bakka'n hirbeesse.

16 «Ani oodhaa'nechchi tenne yaanerixxeeten;

anxe ille'n indiddo wo'miteen;

Anee dayyeeso'a shiqeek

anee jabeeso'a hedho anxa ukeeki ayyinna hedheba'a;

Naaphi midditte adhdheemmaxxee

oose anxi wixixxi hite'een.»

17 Tsiyooni anga ifixxa farri assite;

kaddomale isee dayyeesaak hedheba'a;

Olla'uwwi isik iso'n diinake kado'a,

Duuchchi Woddik Gootti Ya'iqoobi'n ajaja fulche'een;

Iyyerusaaleminna insa'ne giddo battitte yaaneshsha uudende.

18 «Duuchchi Woddik Gootti qullichchaken;

ani kinn isike ajaja'n jalle'eennan;

Ha'no koo arduwwa duuchchaa laqqe;

anxa ko'onna uudde;

Anxi dargageeyye labba meyyaxxi oose

booji'endee me'ite'een.

19 «Ani jaaluwwa anka ye'edhennen;

insa'ne kinni anee ginbe;

Qeese anxinna geedhe anxi

hedho ifi ifixxa gatisatee ita halsina'ninni

ookkone qachchi giddo munde.

20 «Ee dada duuchchike Goottaa wixixxi heyyee'naa

madhumma anee raafende'een balloo uudi!

Yo'oshsha jalleennaxxee'e

godobi anee raankeen;

gadho wolaantichchi

mini giddo reyote hexxeen.

21 «Manni ani wixixxi hiyye oodhaa'na laqe

yaane kinni anee dayyeeseek ayyinna hedhebaan

Naaphi ank duuchchi abara anxa laqe;

ati tenne assiteettaxxe'ni gammade.

Ballo iitti hitettaxxi barra dagguun;

insa'nenna ani kadeennexxa kanduun.

22 «Fuggo insa'nexxi duuchchi ati edo leelitowwaal;

cubbo anxe duuchchanaa'n kexxeexxa,

Ane'n assiteetteshanni,

insa'ne'ninna iittanni assi;

Wixixxiitixxi oodhishsha ane'ni bira saxxe'een

qalbetinna anee gophpheen.»