1 Daariyoosi moyeexxe langaxxe woggake jiyake agenjixxe taakkaxxe barra'n Duuchchi Woddike Goottik hiyyichchi wabeeka Haage darree'n Yihudiinka moyanjo Selaatiyaka belto Zerubaabeli'aanna umo qeesichcho Iyyooseedeqika belto Iyyaasuubaa daggeexxi:

2 Dada duuchcha ajajaak Duuchchi Woddik Gootti hiyya'nee qici, «Kunni ardi ‹Duuchchi Woddike Goottik mini ijaaremaaxxi yanna ta'i qico gelteebaan hiyyaan› » hiyye.

3 Duuchchi Woddike Goottik hiyyichchinna wabeekichcha Haage'n dageexxi hiyyee qici, 4 «Kunni mini diigemeexxi hedhee'naa ha'no umo ha'nookenni danchoomeeke ifi ifike mine'n hexxino'a yannatee isii?»

5 Tennexxee dada duuchcha ajajaak Duuchchi Woddik Gootti hiyya'nee qici, «Amme ora ha'nooka hubattine uudde; 6 lumoxxa midha rokineen; yaane kinni heenoxxa haa'mitine;

ittineen kinni godditinebaan;

ha'witineen kinni dheebo fuldinebaan

oddo'witineen kinni eebbitinebaan;

runda adhdhitineen kinni uremeeke subba'n uggudhdhitineeshshaten.»

7 Dada duuchcha ajajaak Duuchchi Woddik Gootti hiyya'nee qici, «Amme ora ha'nooka hubattine uudde; 8 koobatanna qabattine'e haqqe iyyedagge; mine ookkonne ani'a ijaarre; aninna iso'ni gammadannon; iso'ninna ulfatannon» hiyya'neen Duuchchi Woddik Gootti. 9 Dada duuchcha ajajaak Duuchchi Woddik Gootti hiyya'nee qici, «Jirachcho heqqexxineen alfitineechchi kinni heenochcho; mine aassexxineechcho'n ani uffuu hiyyenne; tinni kaddeek mayeete ha'no'n labbe?» hiyya'neeni dada duuchcha ajajaak Duuchchi Woddik Gootti. «Mini anki diigemeexxi hedhee'naa duuchchiingi ifi ifika mine ijaadhdhatee gongitinenmmaxxeeten. 10 Tennexxee ha'nooxxe buuto'a iimuwwa xeena hoyyexxe; buttatinna ifixxa gumma uwwa gibbe. 11 Aninna fichchuwwake'ninna koobuwwate'n, eettene midhate'ninna eettene reefixxe woyinetixxe booka'n eettene zayite'ninna butta gummissaachcho duuchcha'n, hore manjoke'n anga ha'nooxxenni huccitineechcho duuchcha'n bange iyyedagannon.»

12 Ookkoneechchi uduma Selaatiyak belti Zerubaabeli, umo qeessichcho Iyyooseedeqik belti Iyyaasu booji'otenaa'n gateek ardi Duuchchi Woddika Gootta ifike Magenika haaso'anna Duuchchi Woddiki Gootti ifik Mageni ergeeke kaddeemmaxxee wabeekichcha Haage darree'n ergendeexxe erga'a ajajemme; ardikinna Duuchchi Woddika Gootta sodaatte.

13 Higgeenni Duuchchi Woddike Goottik erganji Haage tenne Duuchchi Woddike Gottixxa erga ardake'n hiyya'n haaso'ee qici, «Ani ha'nonni welt hedhennen» hiyya'neen Duuchchi Woddik Gootti. 14 Tennexxee Duuchchi Woddiki Gootti Yihudaka galchallo Selaatiyaka belto Zerubaabeelika irra ookkone umo qeesichcho Iyyooseedeqika belto Iyyaasuuka irranna booji'otenaa'n gateeke ardi duuchchika irra ke'isse; insa'nenna dangeexxi dada duuchcha ajajaaka Duuchchi Woddike Gootta ifike Magenika mine ijaara sanfe. 15 Tinninna kaddeek Daariyoosi moyeexxe jiyaxxe woggaxxe lame tommenna sholgaxxe bara'nitemman.