1 Xaqartichchakeenna battoo'eeke

Iyyerusaalemike qachchi'a aanne!

2 Isi ayyi'anna ajajemebaan;

ayyika gorsanna adhdhebaan;

Isi Duuchchi Woddika Goottanna addatebaan;

ifike Magenibaanna shiqabaan.

3 Ja'laabuwwi isik ittanaake neenqa,

galchalluwwi isikinna soodixxa heddabaaxxe

hashshixxe yayyeshaten.

4 Wabeeko isixxi hollaammeyyetenna

sobi callixxen;

Qeese isixinna Woyyichcha Galama battossitaan;

ookkone seera'ninna jallitaan.

5 Isi giddo hedheeki

Duuchchi Woddiki Gootti qullichchaken,

Isi haranga dedha hujaba'a;

gorsa gorsa'ninni toggitte murte muraan:

Bara bara'ninni tennee assebaak gatabaan;

fuggaaleyye kinni shooko egendeba'a.

6 «Ani gosa gosaka arda fuguseennen

kolluwwa insa'nexxinna olete kade'een;

ayyinna ookko'ni sa'abaashsha

ora insa'neka urmake asseennen

Qachchuwwa inisa'neka diigennen:

mitti manjinna ookko hedhabaan; ookko hedhaakinna haranga afemabaan.

7 Aninna ookkone qachcha,

dhugaaten anee sodaataton;

‹Barachchotanna adhdhiitaton› hiyyennen;

Tennexxee galdumi isiki ba'abaan

xixichchi anki duuchchinna isoo geyabaan.

Ardi anki kinni assaaxxe yaane duuchcha'ni,

fuggoxxa muuxati miidheme.»

8 Duuchchi Woddiki Gootti hiyya'nee qici,

«Ani inisa'ne'ni murannoxxi barra geltaa qico'ni;

anee heqqe;

Gosa gosak anka arda mitteba hiissonaa;

moyanjuwwakanna bukki assonaa,

Balatanna jabaxxa mufe anxa,

insa'ne'ni hana dunonnaa mudhdheennen;

Butta duuchcha anxe hinaaffexxe mufexxe giiranni;

gubattee baxxaan.

9 «Eettene yanna ardi duuchchi Duuchchi Woddike Goottika summa ye'aashsha,

mittomik isoo ergatemaashsha;

haaso'a insa'neka jijjiirannoni.

10 Tophiyiinke galaanuwwi wido,

ane magenoofataak xexxeeremeeki anki ardi

uwwatika tolcha ani'a aadhe dagaan.

11 Ane'ni hujjineexxe balleessa duuchchanaa'ni kexxexxa,

eettene barra ha'no shookinabaan;

Holla insa'nexxe'ni gammada'nekaara;

ookkone qachchana'ni fugusaannaxxee

Konneechchinni edi'a,

woyyitte kooba anxe'ni hollitinaba'a.

12 Ha'no Duuchchi Woddike Goottike summa'ni amandina'neek

ifi heeshshi assaaka qajeelanna arja manna

ha'nooxxe oddo'ni gatisanno.

13 Booji'emebaak gateeke Isira'eelike ardixxi hafe,

dharakanna haasotabaan;

afo'o insa'neke'ninna xaqaro afendabaan.

Insaa'ne indaani, nage'iki diinphaan;

insa'nee sodaachisaachchi hedhebaan.»✝

14 Koo Tsiyoonike arda gammadiki faarsi;

Tee Isira'eel ilillisi;

Koo Iyyerusaalemike ardaa;

mitte godobinni gammadde; ilillinna hiyye.

15 Duuchchi Woddiki Gootti mura woxa atixxa fugusse'een;

naapha atika atenaa'ni hiise'een.

Isira'eelk moyanji Duuchchi Wodik Gootti atinni welti hedheen;

konneechchinni edi'a mittetanna fuggoxxa yaane sodatabexxo.

16 Eetene barra Iyyerusaalemii'i

hinaa qici;

«Koo Tsiyoonike arda sodaatinoqqe;

anguwwa ha'nooxxinna gophphoqqee.

17 Duuchchi Woddiki Gootti atiki Mageni oddo atixxe'ni hedheen;

isi jabake anjirallon.

Isi ate'ni yo'oshsha gammadaan;

jaalala ifixxenn atee foorfachchiisaan;

faarotinna ate'ni ulfaate'e gammadaan.»

18 «Ulfaateeke atike ayyaani'a mekki hite doonsa kiyya hiteettexxa

yowwichchiinxa ba'o;

atenaa'ni fugussannon.

19 Eettene barra,

atee wixixxi asseemakaara duuchcha mura woxissannon;

Naafekaara anjirannon;

xeeremeemmakaaranna bukki assannon;

Salphantemmake boga duuchcha'n,

saalphinne insa'neka ulfinikenna saadinotike assannon.

20 Eetene yaanna ha'noo bukki assannon;

ookkone wodda ha'noke bogibaa ha'noo hiisannon;

Ille ha'nooxxi uuda'naann

booji'o ha'nooxxa ani hiissanno wodda

Saadematanna ulfaata

butta duuchchike gosa gosake ardixxe oddo'ni ha'no'a uwwannon»

hiyya'nen Duuchchi Woddik Gootti.