1 Sofooniyaasi Kuushike belto kadaa wodda Kushshi kinni Gadaaliyake, Amaariyake, Amaariyake moyanjo Hiziqiyaasike belton; Amoonik belti Iyyosiyaasi Yihudiinka boga moye galchamma sane Duuchchi Woddiki Gootti Sofooniyaasi'n haaso'eeki raagi konneechchi butta hedheeken.✝

2 «Duuchchiinxa yaanenna,

butta duuchchanaa'ni balleessannoni»

hiyya'neen Duuchchi Woddik Gootti.

3 «Manjo hore, biniincha balleessannon

iimate'n hexxeexxa ci'a,

abbaayya giddixxa qulxu'me birannon;

ani manjiinxa sanne buttatenaa'n kutti assano wodda,

Fuggaaleeyye oletixxe tuulo kaddaan»

hiyya'neen Duuchchi Woddik Gootti.

4 «Anga anxa Yihudiinke arda'ni,

Iyyerusaalemi giddo hedheeke duuchcha'ni ke'isannon;

Ba'aali hiyyema magenixxa hafenna

fakkuwwa magenoofachchotixxe qeeseka summa konne boonchinaa'ni balleessannon.✝

5 Iimate'n hexxeexxa daduwwa magenoofatatee,

fooqeti iima qabateexxi sagadakaara,

Duuchchi Woddike Gootti'a saganda'ni isik summinn kakanta'ni

Miilkomike summinni kakataakaara,

6 Duuchchi Woddika Gootta hordoffatenaa'ni udumi'a higaakaara,

Duuchchi Woddika Gootta halsabaakaara insa'nee gargaarona'a anee laqedhabaakaara balleessannon.

7 Dada duuchchike Duuchchi Woddik Gootti edo ha'no sammi hiyye;

Duuchchi Woddike Goottixxi barra shiqqe'een.

Duuchchi Wodik Gootti tolcha qophphesse'een

isi ye'eekaara woyyonse'een.

8 Duuchchi Woddike Goottixxe tolchiinxe barra'ni

Eeettene hayyoolenna moyanjiinka arda

iittanni alagiinke galdumixxa seemma oddo'wakaara mura woxisannon.

9 Eettenne barra'ni,

ookkone qephphinni hana burraaqaaka duuchcha,

insa'neeke magenuwwike mine'n,

xaqarotanna soba itti wo'nshaaka duuchcha mura woxisannon.

10 «Eettene barra» Duuchchi Woddik Gootti hiyya'nee qici:

«Qulxu'metixxe hula darree'ni raare kexxaan

langake ba'linana'ni hunbaashsha,

tulluchchiwwake'ninna lumoxxi weekensha laqendaan.

11 Ha'no Mekiteeshike qachchi giddo hexxina'neek woo hiyye;

daddalto ha'nooxxi duuchchi kutti hitaan;

Birretika sibiljo dadda'laak duuchcha reyaan.

12 Eettene barra Iyyerusaalemi xassik findigee hasannoni;

danqasha galaakaara,

booro'e hunda gateeke woyinetike bulubulika atala kadeekaara,

‹Elobaaxxenna kaddo eloxxa

Duuchchi Woddiki Gootti mittechchonna assabaan› hiyya'ni ga'ma'mi hiyyaakaara mura woxisannon.

13 Karra insa'neexx saamendaan;

minuwwi insa'neekinna findigemaan;

Eettene yanna minuwwa ijaadhinaani;

yaane kinni insa'ne giddo he'nabaan;

Woyinetika hiddichcho kalsinaan;

isexxa booka kinni ha'winabaan.»

14 «Jabaxxi Duuchchi Woddike Goottixxi barra bayya hexxeebaan;

shiqo hexxeen; isenna rakke daggaan:

Duuchchi Woddike Goottixxe barra'ni laqendaaxxi oodhishsha qaraartotten;

ookko loliink manninna hiiqisee oodhaan.

15 Iitti barra aaretixxe barra,

rakkotixxenna wixxi hiyyatixxi barra,

Weekenshatixxenna ba'netixxe barra,

dukkanatixxenna cuguggotixxe barra,

duumanchiinxexnna dimmi dukkanaxxe barra kaddaan:

16 Eettene barra kinotik dalla'inni ijaaremeeke qachchuwwinna

Qeerrarama kinjiinke minuwwa'ni,

malagatiink hafuurinna loliinxe raafemaxxi raare laqendaaxxe barra kaddaan.

17 Insa'ne balla'iinsha timminsaashsha,

mannake'ni rakko iyyedagannon;

insa'ne Duuchchi Woddike Gootta'ni cubbo hunjemmaxxee,

Munde insa'neexxi lola'iinsha lolaataan;

renshi insa'neek koriinsha afeemba hunemaan.

18 Duuchchi Woddike Goottixxe eettene mufexxa barra,

manna worqetinna birreti sibili insa'neek

Insa'ne anjira dande'abaan;

butta duuchcha giiratishsha hexxeexxe isixxe hinaafenni ittendaan;

Tinninna kaddaachchi buttate'ni hedheeki manni duuchchi,

dedhange'n mudaake kademmaxxeeten.»