Sofooniyaasikaa Raaga 2

Aadde Aagatee Mageniika Ye’injo

1 Ha’noo shookinabaak koo gosa gosake arda

mitteba bukki hiyye; gumme;

2 Iitti murendeexxi yanna geltebaang,

barra iitti huuriinsha ha’noo filtebaangi,

Duuchchi Woddike Goottixxi jabaxxi mufe ha’no’ni daggebaang

Duuchchi Woddike Goottixxi balatixxi barra

Ha’no’ni dagge geltebaagi bukki hiyye.

3 Ha’no buttatik qajeeluwwi duuchchi,

ajaja isika muuxina’neekiir Duuchchi Woddika Gootta halse;

Qullumatanna qajeelumma halse;

jabaxxe Duuchchi Woddike Goottixxe mufetixxe barra’ni,

gattinaaxxe hexxeen.

Wele Arda’ni Uwwendeexxa Murte

4 Gaaza samendee urmite gattaan;

Asiqeloonanna diigendaan;

Ashidoodike qachchik ardi barra saafo’a shorremaan:

Aqaroonike ookkone qachchik ardinna qachchakenaa’n goshemee fulaan.

5 Ha’no abbaayyati qarqara hexxineek,

koo Keelitootike arda ha’noo’a aane’e;

Filisixeemike ardik boga tee Kenaani;

ate’ni kulemeeki Duuchchi Woddike Goottik hiyyichchi hiyya’nee qici;

«Haranga atee balleesannon;

ati giddo hedha’neeke manninaa’ni mittikinna gataak hedhebaashsha asse atee balleesannon.»

6 Qerxesik manni hedheeba abbaayyatike

qarqara’n hedheek bogi,

allalsanotike galdumanna gedhebiinke galdumixxe bakka kaddaan.

7 Kunni bogi Yihudake ardixxe hafe’a uwwemaan;

insa’nenna ookko hore ifika bobbaalsinaaba alfinaan;

Asiqelonike mini giddonna,

Hashsha diinphaan;

Duuchchi Woddik Gootti insa’nek Mageni insa’nee heqqaan,

booji’o insa’neexxanna insa’ne’a hiissaan.

8 «Ani Mo’aabike ardika yowwichcho Amoonitotixxa cee’manna laqeennen;

Arda anka insa’ne cee’mine’een;

boga insa’nenaa’ninna adhdhatee dhaadante’een.✝2:8 Isa. 15:1—16:14; 25:10-12; Erm. 48:11—49:6; Hiz. 21:28-32; 25:1-11; Amo. 1:13-15.

9 Tennexxee hedhaaneke kada anxe’ni kakataannen,»

hiyya’neen dada duuchcha ajajaak Duuchchi Woddik Gootti Isira’eelik Mageni.

«Mo’aabii’i Soodoomishsha,

Amoonika ardinna Gomorashsha,

bada’a liqinsiteexxe bakkashshanna

maxinetixxe baleshsha duuchchi woddi’a urmake kandee gantaan;

anke ardanaa’n gateekiir insa’nee saamaan

Anxe gosake manninaa’n gateekiir boga insa’neka,

dhaalaan.» ✝2:9 Dada. 19:24.

10 Insa’nexxe ifisadanaa’n kexxeexxa insa’ne’n geltaaxxi,

dada duuchcha ajajaake Duuchchi Woddike Goottika arda,

yowwinee insa’ne’n gacifanteemmaxxeten.

11 Duuchchi Woddik Gootti ookkone bogika magenuwwa,

duuchcha biraaxxa yanna, isi konnechchuwwa’n sodaatemaake kadaan;

Abbaayyati qarqara’ninna oddoolluwwake’n hedhaak gosa gosak ardi,

mitti mitting hedhe hedheenba isi’a sagadaan.

12 Ha’no Tophiyiinke ardaa

ha’nonna anke wolaanitichchinni shiyendinaan.✝2:12 Isa. 18:1-7.

13 Middi bogibaa anga ifixxa diriirisse’e

Asoorinna balleessaan;

Nenewee onake assaan;

qiilla gammoojjeshshanna bagoxxe assaan.

14 Gedhebikinna lali,

gargar gargar hexxeexxi dada duuchchi ise giddo ciisa;

Urungotinna dhaddo,

iseke utuphuwwi hana galda’n

raaretanna maskoote maskotenaa’n laqisa;

oletinna hula hula’ninni tuulenda;

birbirsiinke haqichchik dagalsanjuwwinna banqara.

15 Danqansha galeek,

iikki gammashoti qachchi konete;

Isinna qalbe ifixxi giddo,

«Ane callanni; ani gadhi darre ayyinna hedheba’a» hiyyemmak,

Hittata biniinchi itti ciisaaxxe,

ona bakka kade gate?

Isike qarqarinaa’n sa’aak duuchchi,

iso’n gacifata’n qubichcho ifika iso’n wirsaan.✝2:15 Isa. 10:5-34; 14:24-27; Nah. 1:1—3:19.