1 Faaroti shiqqeexxa wabeeka Ibaaqoomixxa soodachcho;

2 Ee Duuchchi Woddike Gootta, gurra atika laqeenne

ee Duuchchi Woddike Gootta huje atixxinna anee sodaachchisse

No'oke baro'ninna isee haaronsi;

no'oxxe yanna'ninna ege'nendaashsha assi;

aartatto woddanna mararte atixxa hedi.

3 Mageni Temaanike boganaa'n dage;

iikki woyyichchinna Faaranixxe koobanaa'ninna dage;

Isik gaachchaninna iimuwwa buqe'een;

saadino isixxinna buttate'n wo'mite.

4 Wa'inni isikinna arishshotike ifishshaten

hunna isixxi sho'ondemmabaa'n

isixxe anganaa'n ifi ife.

5 Dhukkubi isi edo me'aan;

balatinna faana isixxa hordoffaan.

6 Uurree wodda buttanna linqi linqi asse;

uudeen, gosa gosak ardinna culphise;

Duuchchi woddixxi koobuwwa diigende

oolmik tulluchchuwwi fodhoki hiyye;

ori isik duuchchi woddiken.

7 Tophiyiink dunkaanuwwi wixixxi hiyyaa wodda

Midiyaamike mannik galduminna weekemaa'naa uudenne.

8 Ee Duuchchi Woddik Goottaa! Ati mufateetak galaanuwwake'niteeta?

Aare atixxita muummuwwate'nitemmata?

Atike fadhado'ninna

atike injfachchotike sarageelluwwa'n gulufette wodda

mufateetak abbaayyate'nitemmata?

9 Mogido atika qophpheessitete;

gabetinna dagaashsha ajajjete;

buttatanna galaanuwwik qooddete.

10 Koobuwwa atee uudde wixxixxi hite;

Wodi'iink danbala'i sa'e me'e;

hundixxi baari jabaka luuljonna laqisse;

iseki danbala'inna iimi'a qophphi hiyye.

11 Darbema'neeke atik mogidinaa'n

atike bagedike calalaqanaa'n kexxeexxa

arishshonna agenji ifi ifixxe bakka'n uurre.

12 Buttate'n aare atixxenni mammarendete

gosa gosaka arduwwanna atixxe mufenni hirbeessitete.

13 Arda atika dandandotaa

hariitetekanna anjirtota'a daggete

Fuggichcha bogika ookkone akeekisanjonna cancaqqette;

isoo umokenaa'ni lekkatike qe'yi qico'ni duwwi gatissete.

14 Danbala'iinsha no'o xeero'a dageemmaka

buxanjokanna sho'ik liqiinso'a hasaake

Loliinke mannike sooreessika umo,

isinge bagedininni ottette.

15 Jajabba wode'uwwa raasati

eettene abbaayyanna atike fadhadinni hirbeessitete.

16 Aninna laqe'eennen qalbe anixxinna dhiqqise

suume anxinna ye'injo isikenaa'ni kexxeexxa roqonsite;

Soda'atinna miqe anxi giddo e'yite

lakka anxinna gilgilde

Kaddo malee'e no'oke naapha'n rakko geltaaxx yanna

ossunteti heqqedhannon.

17 Yaane kinni belesetik haqichchi gummisa gophoole,

woyyinetike hiddichcho'ni gummanna afema gophphoole,

Ejersiink haqichchinna gumma uwwa gophoole,

fichchuwwikinna midha uwwa giboole,

Gedhebiinxi goodhenna midde duwwi gattoole,

lalikinna moonna giddo afema gophoole,

18 Ani kinni Duchchi Woddike Gootta'ni gammadannon;

anke anjirallo Mageno'ni ililisannon.

19 Dada duuchcha ajajaak Duuchchi Woddik Gootti anxe hunnan

lekka anxanna waala hiyyemaake biniinchixxe lekkashsha assaan;

isi koobuwwati iimanna tarkaafatannoshsha anee me'isaan. ✝