1 Heqqecatixxe Anxe bakka'n uurrannon

dalla'iinxe guuto hana hedhannon;

ane'n maa hiyyaaxxa

Tenne aallachcho'anna,

maa hiissichcho uwwaxxa uudona'a heqqedhannen.

2 Duuchchi Woddik Goottinna hiyya'ni hiisse haaso'ee qici:

«Shollake orinni haasessendaashsha tennee,

leella borreessi;

bidiroke'n isee qunqumati borreessi.

3 Tinni leellanna ise'a murendeexxa yanna heqqexxaan

muuxamiinxanna haasottaan

ise dharakanna haasotabaan

Turtaaxxe labboolenna heqqedhi;

daga isexxinna dhugaaten turtabaan.✝

4 «Kunnise isi ifi dukeedheen;

halcha isixxi qajeeldabaan

qullichchi kinni qulumma ifixxenninni hedhaan.✝

5 Dhugaaten woyinetixxi booka isoo dedhise'een;

isi hollameessaken; ijje shookabaan;

Buttini giddike wiiddishsha donnaken;

reyotishsha hara goddakebaan

gosa gosaka ardanna ifibaa bukki assedhaan

manna duuchchanna lolee booji'ee adhdhaan.

6 «Eega iitta hedheeke manjo'n cee'miyyotinna iso'ni gacifatit,

«Mooremeeka miya ifi'a tuu'lati

ifi duroonsakee aanne!

Tinninna haani qici'a kadda'ni hexxaaxxe?» hiyya'n Manji duuchchi isoo mammakabaata?

7 Hidake'n ibissetak manni keekkatendebaaxxe yanna'n ate'n ke'abaata?

Ate'n qophpi hiyyeexxi atee sodaachchisabaata?

Atinna anga insa'neexxe'n ibbaton.

8 Atinna heddo gosa gosaka arda saandetaxxee,

manjiinxa munde dundetaxxee

gateek ardinna atee saamaan;

Ookkone boguwwake'ninna ookkone qachchuwwi giddo hedhammaka duuchchinga birteeten.

9 «Seeri beloxxe la'onn galduma ifika ijaadhaak

naaphiinxe anganaa'n,

gatatee mine ifika iima qephphichcha booncho'n ijaadhaakee isi'a aanne'e!

10 Heddi mannixxi lubbo baxxo'a fuggoxxe'ni kexxeeten;

ati ifike mine'n salphinne, umo atike'ninna ba'ne iyyedageeten.

11 Kinjikinna gimo giddii'n raraan

haqqeti minik utuphinniki dagalsanjuwwinna tenneenni hiyyaan.

12 «Manjo shiyati qachcha ijaaraakee isi'a aanne'e

seeri belo orinninna isoo giisaakee isi'a aanne!

13 Ardi giiratixxe haqqe kado'a eloo'o'a

gosa gosak ardinna tola kurbu hiyyaashsha

dada duuchcha ajajaak Duuchchi Woddik Gootti mure'ebaata?

14 Wodi'i abbaayya buqammashshanni

Duuchchi Woddik Goottika gaachchanna ege'na buttate'n wo'mita.✝

15 «Insa'neka saala uudatee

jaaluwwa ifika hawwisaake

machchonaa qico'ninna insa'ne'a woyine cossaakee isi'a aanne'e!

16 Ulfaattatixxa bado salphinne godditaton;

ta'a bado atixxe kaddemmaxxee ha'wi, saali atikinna leellowwaal

Duuchchi Woddik Gootta'ni hexxeexxi buuda ate'ni higgaan;

gaachchanna atikanna salphinnik buqaan.

17 Libaanoosi'n hujjetaxxi xaqaro ate'ni geltaan;

hore biniincha bira atixxi atee alalshitaan

Manjiinxa munde dundetaxxee

ookkone boguwwanna ookkone qachchuwwi giddo hedheeke duuchchininni balleessite'eten.

18 «Manjiixxi anga giissiteexxi misle

dharakanna haasotaxxi magenooffachchotixxi fakke maa la'o affe?

Isee giisseek anga ifixxixxa huje addatammaxxee

haaso'a dandetabaaxxxa magenooffachchotixxa fakkuwwanna giissaan.

19 Haqichcho, ‹dammaaqi›

hedho afebaaka kinjonna, ‹ke'i› hiyyaakee isi'a aanne'e!

dhugaandinta isi barsiisa dande'aata?

Kunnise isi birretinna worqeti buqemedheen

isi giddonna hafuuri hedheba'a.

20 Duuchchi Woddik Gootti kinni woyyichcha ifike galmi giddo hedheen.

Butta duuchchinna isi edo sammi hitowwaal.»