Hagekaa Raaga 2

Addachchiisa Uwwendeemmake Ookkone Haaroke Minika Gaachchanna

1 Ookkone torbake agnjo’n lame tommena mitte barra’n Duuchchi Woddike Goottik hiyyichchi wabeeka Haage darree’n dageexxi hiyyee qici, 2 «Yihudak galchallallo Selaatiyaka belto Zerubaabeli’n, umo qeesichcho Iyyooseedeqika belto Iyyaasuu’ninna, booji’otenaa’n gateeke manna’n hite haasoottatoo qicinna hite’e insa’nee qortato qici 3 ‹Konnee mine edi woddike isike gaachchanninni hedheena’a uudeek ha’noo giddo gateek hedhee? Ta’ata kunni mini hitta hedhee’naa uuddina’ne? Isi ille ha’noxxe’n mittichchishshannatebaan hiyyatebaata?✝2:3 Izr. 3:12. 4 Ta’a kinni koo Zerubaabel jabaat› hiyya’neen Duuchchi Woddik Gootti; ‹Umo qeesichchike Iyyooseedeqike belto koo Iyyaasuu jabaati; ha’noo konne bogiki ardi duuchchi jabaatte› hiyya’neen Duuchchi Woddi Gootti ‹Ani ha’nonni welt hedhenen hujjee› hiyya’neen dada duuchcha ajajaak Duuchchi Woddik Gootti. 5 Gibtsee’n fuldinee wodda ‹Hafuuri ank ha’nooxxe oddo’n hedhaan sodaattinoqqe’e› hiyye ha’no’a aageennaxxi kako tenneten.

6 «Dada duuchcha ajajaak Duuchchi Woddik Gootti hiyyee qici, ‹Ani shiqoxxe yanna’n iimatanna butta, abbaayyatanna abbaayya hexxebaaka bago boga mittele sheke sheke assannon. 7 Gosa gosaka arda duuchchanna sheke sheke assannon; gosa gosake ardi duuchchixxi karra duuchchanna kabaa daggaan; konnee mine’ninna gaachchanna wonshannon› hiyya’neen duuchchiinga galchaak dada duuchcha ajajaak Duuchchi Woddik Gootti. 8 ‹Birretik sbili anken; worqetinna anixxen› hiyya’neen dada duuchcha ajajaak Duuchchi Woddik Gootti. 9 ‹Konne ta’ike minik gaachchanni edike minike gaachchaninaa’n sa’aan› hiyya’neen dada duuchcha ajajaak Duuchchi Woddik Gootti; ‹Konne booncho’ninna naga’a uwwannon› hiyya’neen dada duuchcha ajajaak Duuchchi Woddik Gootti.»

Xixichchokanna Eebbaa

10 Daariyoosi moyeexxe langaxxe woggake sallanke agejixxe lame tommenna sholgaxxe barra’n Duuchchi Woddike Goottik hiyyichchi wabeeki Haage darree’n dageexxi hiyyee qici, 11 «Dada duuchcha ajajaak Duuchchi Woddik Gootti hiyya’nee qici, ‹Seeri maa hiyya’neexxa qeese hite qortatto qici, 12 mitti manji woyyichcha maala ifixxe seemma’n abixxoole eettenee abixxeemmaxxa bakkanna iitti ita yookaan qaa’matichchi yookaan woyinetixxi booka yookaan zayite yookaan wele ita tuqqoole woyyittete kaddaata?› »

Qeesetinna «Waawwo woyyittete kaddabaan» hiteexxi hiissite haasotte. 13 Haagenna «Rensha tuqati batto’eek manji konnechchirinaa’n mitte tuqeexxe kaddoole, iitti tuqndemmaxxi battoottabaata? Hiyye qore?»

Qeesetinna «Eeti battoottaan» hite hiissite haasotte.✝2:13 Lak. 19:1-22. 14 Ookkoneechchinni uduma Haagenna, « ‹Kunni ardinna tinni gosa ani edo iittanden› hiyya’neen Duuchchi Woddik Gootti; ‹Anga insa’neexxi hujjeechchi duuchchinna shiqinshaachchi duuchchi batto’eeken.

15 « ‹Yoonna ta’anni edi’a Duuchchi Woddike Goottike galmi’a mitti kinji mitte kinji hana uggememmabaa edi darre hexxemmaxxa yaane hubattine uudde. 16 Mitt manji lame tomme safaranjo kaddaaxxe midhaxxe tuulobaa daggeexxi tomme calla alfe; onde tomme ikkilsanjo woyinetixxa booka ikki’latee iitti woyine miicendammaxxe bakkabaa marreexxi lame tomme calla alfe. 17 Ani ha’noxxe angaxxa huje duuchcha midhatike dhukkubinni buqunikinna kaadeti ganneenen; ha’no kinni anibaa higginebaan› hiyya’neen Duuchchi Woddik Gootti. 18 ‹Tenne barranaa’n tinninna sallank agenjixxe lame tommenna shoole barranaa’n Duuchchi Woddike Goottike Galmixxi booso kaasendeexxe barra qico’n hexxeexxa barra qalbeeffatte; qalbeeffatine hedde. 19 Gootaar giddo gatteexxi midha ta’a hexxeeta? Woyinetikinna balasetik haqichchi roomaankinna ejersiink haqichchi ta’i qico gummisebaan.

« ‹Ani ha’noo tenne barranaa’n safe eebbisanon.› »

20 Ookkone agenjixxe lame tommenna sholgaxxe barra’n Duuchchi Woddike Goottik hiyyichchi langaxxa dageexxi Haage’n hiyyee qici, 21 «Ani iimatanna butta sheke sheke assannoxxe Yihudaka galchallo Zerubaabeli’n kuli. 22 Ani moottumuwwatixxa moote gonbisannon; alagiinxe moottumuwwaxxa hunna balleessannon; sarageelluwwakanna sarageelluwwa oofaakaara gonbisannon; fadhado gulufaammakiir ifi ifike dayyuwwike wolaantichcha’n ibaan.

23 «Dada duuchcha ajajaak Duuchchi Woddik Gootti hiyya’nee qici, ‹Eettne barra anke erganjoo Selaatiyake belto koo Zerubaabeli ani atee anke erganjo assedheennen› hiyya’neen Duuchchi Woddik Gootti. ‹Ani atee fi’leennaxxee anxe maxansiinxe qube atee assedheennen,› hiyya’neen dada duuchcha ajajaak Duuchchi Woddik Gootti.»