1 Daariyoosi moyeexxe langaxxe wogga'n saddeetike agenjo'n Duuchchi Woddike Goottiki hiyyichchi Beraakiyu Adoke belto'ni wabeekichcho Zekkaariyaasi'n hiyya'ni dagee qici: 2 «Duuchchi Woddik Gootti edike annuwwa ha'nooke'n yo'oshsha mufateemman. 3 Tennee ardake'n kul: Lumok Duuchchi Woddik Gootti hiyya'nee qici: ‹Anibaa higge,› hiyya'neeni Lumoki Duuchchi Woddik Gootti, ‹Aninna ha'nooba higannon,› hiyya'neni Lumok Duuchchi Woddik Gootti. 4 Edixxi wabeeko, annuwwa insa'neekee hite lallabbeemma qici: Lumoki Duuchchi Woddik Gootti hiyya'nee qici: ‹Fuggoke ornaa'ninna fuggoxxe ha'nooxxe hujenaa'n higge.› Yaane kinni insa'neexxa lanqeba'a ani hiyyennexxanna lanqeba'a, ha'no insa'neeshsha kaddinoqqe'e hiyya'nee'n Duuchchi Woddik Gootti. 5 Ha'nook annuwwi ta'a haba hedhetaa? Wabeeko duuchchi woddi'a hexxaata? 6 Ani'a ergatenda'neexxe wabeeko'n ajajanneki anki hiyyichchinna seeri anki ha'nooke annuwwa'n kadebaata?

«Insa'nenna aadde angeexxi hinee qici, ‹Lumok Duuchchi Woddik Gootti muremmashshanni huje no'oxxishshanna me'inji no'okishsha no'o'n asseexxi seeraken.› »

7 Daariyoosi moyeexxe langaxxe wogga'n Sabaaxxi hiyyemaake tommenna mittike agenjixxe lame tommenna sholgaxxe barra'n Duuchchi Woddike Goottik hiyyichchi Beraakiyu Adoke belto'ni raagichcho Zekkaariyaasi'n dage.

8 Hashshati waleella uudenne: ookkonna ani edi darre'n mitti manjichchi diimmoka fadhachcho gulufeexxi dhooqa giddo Barsaneeti hiyyemmaake haqichuwwixxe oddo'n uurre'emman; isi udumii'ninna diimmok, boorajichchinna gola'laak fadhadi hedhemman.

9 Aninna isoo «Koo aadi kunnichchi maachcho hiyye qorenne?»

Aninni haaso'ammaak iimik erganjinna «kunni maachcho kadeexxa ate'n leellishannon» hiyye. 10 Ookkonneechchi uduma Baarseneeti hiyyemaake haqichchuwwixxe oddo'n uurreemmaki manjichchi ane'ni «Kunniiri butta duuchcha'n mammaremo'a Duuchchi Woddik Gootti ergeeke mannani» hiyye. 11 Insa'nenna Barsaneti hiyyemaake haqqichchuwixxe oddo'n uurre'emmake Duuchchi Woddike Goottike iimike erganjo'n «No'o butta duuchcha'n mammaremmennen; butta duuchchanna nage'ik sammi hitee hexxeen» hiyye haaso'e.

12 Ookkonneechchi uduma Duuchchi Woddike Goottik iimki erganji «Lumoke Duuchchi Woddike Goottaa konne torbaane tomme wogga itti mufattetteke Iyyerusaalemikenna Yihudake qachchuwwi'a marartabexxok haani qici'ate?» hiyye. 13 Ookkonneechchi uduma Duuchchi Woddiki Gootti aninni haaso'ammake iimike erganjo'n gammachchiisaakanna jajjabeessaaka haaso'a haaso'e.

14 Ookkonneechchi uduma aninni haaso'aammak iimiki erganji anee hiyyee qici, «Konnee hiyyichcho ardakee lallabi: Lumoki Duuchchi Woddik Gootti hiyya'nee qici: ‹Ani Tsiyooni'anna Iyyerusaalemi'a lumo qici'a hinaafaannen. 15 Yaane kinni nage'ik hedheeke gosa gosake arda'n lumo qico mufate'ennen. Ani heeno qico mufateennan insa'ne kinni anke arda'n rakko bira sa'issine.›

16 «Tennexxee Duuchchi Woddik Gootti hiyya'nee qici: ‹Ani mararteti Iyyerusaalemi'a higannon: ookkonna mini ank qammachchemaani: mikatixxa wodaronna Iyyerusaalemi iima ibinsaan› hiyya'neen Lumoki Duuchchi Woddik Gootti.

17 «Higgeenn hita'ni lallabbatto qici: Lumik Duuchchi Woddik Gootti hiyya'nee qici: ‹ank qachchuwwi haaroba durummat celqe hiyyaan: Duuchchi Woddik Gootti Tsiyooni'i haaroba jajjajbeessaan; haarobanna Iyyerusaalemi'i fi'laan› » hiyyi.

18 Ookkonneechchi uduma iimi'a uudenne wodda ani edi darree'n shoole gaafuwwa uudenne! 19 Aninni haaso'ammaka iimika erganjonna, «Kunni gaafuwwi maachcho?» hiyye hiisse qorenne.

Isinna ane'n, «kunni Yihuda'a Isira'eelinna Iyyerusaalemii'i xeereeke gaafuwwan» hiyye.

20 Ookkonneechchi uduma Duuchchi Woddik Gootti shoole angatixxe ogeka manna ane'n leellishe. 21 Aninna, «Kunniiri maa asso'a dage'ekera?» hiyyenne.

Isinna ane'n, «Kunni gaafuwwi ayyinna umo ifika qokki assabaa qico'n Yihuda xeere'eeken; kunni angatixxe ogeki manni dage'echchi kinni Yihudaka boga balleesseexxi arda giddika xeereemmaka gosa gosaka arduwwa bararasseexxi gaafuwwa insa'neekanna enqe ibiso'aten» hiyye.